1 አሞፀ ናአይ፥ እሳያስ ጎዳይ ባብሎነባ ቆንጭስን በእዳይስ ሀይሳ።

2 አይኮይ ባይና ደርያ ቦላ ማላ ኤስድ፥ ህንተ ቃላ ꬎቁ ኦꬅድ ዋስተ፤ ኤንቲ ሀላቃታ ፐንግያራ ገላና መላ ዉትተ። 3 ታኒ ሀንቀትዳይሳታ ሴራና መላ ታ ጌሻታ ኪታስ፤ ታ ፆኖይ ኡፋይስያ ታ ዎልቃማታ ፄጋስ።

4 ዳሮ አሳይ ዎጫመይሳዳ ደርያ ሁጵያን ደእያ ዎጫማ ስእተ! ቃስ ካዎተꬃት እስፈ ሺቅድ ፓላምያ ፓላማ ስእተ! ኡባፈ ዎልቃማ ጎዳይ ኦላንቾታ ኦላስ ጊግስስ። 5 ጎዳይነ እያ ሀንቆ ኦላ ሚሸይ ቢታ ኡባ ꬋይሳናዉ ሃሆ ቢታፈ፥ ሳሎ ጋፃፐ ዮሶና።

6 ጎዳ ጋላሳይ ማትዳ ግሾ ዬክተ! ሄ ጋላሳይ ኡባፈ ዎልቃማ ፆሳ ማታፐ ꬋይሳናዉ ያና። እዩ 1:15. 7 ሄሳ ግሾ፥ ያሻን ኤንታ ኩሸይ ዶጫና፤ አሳ ኡባ ዎዛናይ ትልአና። 8 ኤንቲ ዳጋማና፤ እቀꬅነ ኡንኤተꬅ ኤንታ ኦይካና። የሎ ከይዳ ማጫሳዳ ኤንቲ እንፃፃና። ኤንቲ ዳጋምድ እሶይ እሱዋ ፄላና፤ ኤንታ ሶምኦይ ብዶ ግድስ። 9 ሄኮ ቢታ ባይሳ ከሳናዉነ እያን ደእያ ናጋራንቾታ ꬋይሳናዉ ይሎንነ ሱልዳ ሀንቆን ጎዳ ጋላሳይ ያና። 10 ሳሎ ፆልንቶትነ ፆልንቶ ኮጨት ባንታ ፖኡዋ ድጋና፤ ዶልያ አዋይ ꬉማና፤ አጌናይካ ባ ፖኡዋ እመና። ህዝ 32:7፤ ማቶ 24:29፤ ማር 13:24-25፤ ሉቃ 21:25፤ ቆን 6:12-13.

11 ጎዳይ፥ “ታኒ ሀ ሳኣ እያ ኢታተꬃ ግሾ፥ ኢታታካ ኤንታ ናጋራ ግሾ ሴራና። ታኒ ኦቶራንቾታ ኦቶሩዋ ሻራና፤ ኢታታ ጬቁዋ ካዉሻና። 12 አትዳይሳት ዋላህ ባይና ዎርቃፈ አልኦ ግዳና፤ አሳ ናእ ኦፍራ ዎርቃፈ አꬍድ ቦንቾ ግዳና። 13 ሄሳ ግሾ፥ ኡባፈ ዎልቃማ ጎዳ ሀንቁዋን፥ እያ ሀንቁዋ ሱላ ጋላስ፥ ታኒ ሳሎታ ኮኮርሳና፤ ሳኣካ እያ በሳፈ ቃꬃና” ያጌስ።

14 ሻንካፈ ባቃትያ ጋራዳ ዎይኮ ሄምያ አስ ባይና ዶርሳ ዉደዳ አስ ኡባይ ባ አሳኮ ስማና፤ ኡባይ ባ ቢታ ባቃታና። 15 በንትዳ ኦንካ ጫደታና፤ ኦይከትዳ ኦንካ ማሻን ሀይቃና። 16 ኤንታ ጉꬃ ናይት ኤንታ ስንꬃን ቡሰታና፤ ኤንታ ኬꬃይ ቦንቀታና፤ ኤንታ ማቸታ ሀራ አስ ኢሳና።

17 ብራ ኮዮናነ ዎርቃን ኡፋይቶና ሜዶና አሳ ታኒ ኤንታ ቦላ ደንꬃና። 18 ኤንታ ዶንገይ ናአተꬃታ ዎꬋና፤ ዮጋ ናይታካ ማሮኮና፤ ኤንታ አይፈይ ናይታስ ቃተና። 19 ካዎተꬃታስ ቦንቾ፥ ባ አሳስ አሌቆ ግድዳ ባብሎነ ቢታ፥ ጎዳይ ሶዶመዳነ ጋሞራዳ ሽር የጋና። መ 19:24. 20 ሄ ቢታን አስ ኡተና፤ ዎይኮ የለታፐ የለታ ጋካናዉ ያን አስ ዴና። አራበ አሳይ ያን ባንታ ዱንካንያ ቶሎኮና፤ ዶርሰ ሄመይሳትካ ያን ባንታ ዉድያ ሄሞኮና። 21 ሽን ባዞ ዶአት ያን አቃና፤ ዎርካናት ኤንታ ኬꬃ ኩማና፤ ጉቶት ያን ዳና፤ ያንቾት ያን ኬፃና፤ ባዞ ዴሻት ያን ጉፓና። እሳ 34:14፤ ሶፎ 2:14፤ ቆን 18:2. 22 ኤንታ ኬꬃታን ጎዳረይ ዋሳና፤ ኤንታ ካዎ ጋꬎን ዎርካናት ቦጫና። እያ ዎደይ ማትስ፤ እያ ጋላሳይካ ጋምኤና።