1 ግብፀ ቦላ ጎዳይ ሀይሳዳ ያግድ ኦድስ:ኤርም 46:2-26፤ ህዝ 29:1—32:32. “ሄኮ፥ ጎዳይ ኤሶትያ ሻራ ቶግድ፥ ግብፀ ዬስ። ግብፀ ኤቃት እያ ስንꬃን ኮኮራና፤ ግብፀ አሳ ዎዛናይ ያሻን ትልአና። 2 ግብፀ አሳ እሱዋ እሱዋ ቦላ ደንꬃና። እሻይ እሻ ቦላ፥ ሾሮይ ሾሩዋ ቦላ፥ ካታማይ ካታማ ቦላ፥ ካዎተꬃይ ካዎተꬃ ቦላ ደንዳና። 3 ግብፀ አሳይ ኤሾ ꬋያና፤ ታኒ ኤንታ ሀልቹዋ ሀዳ ኦꬃና። ኤንቲ ባንታ ኤቃታ፥ ሞይትለራ ኦደተይሳታ፥ ብታንቾታነ ማሮታ ዞረ ኦይቻና። 4 ታኒ ዎዛና ምኖ ግድዳ ግብፀ ካዋ ኩሸን አꬃዳ እማና፤ እ ኤንታ ሃራና” ያጌስ ኡባፈ ዎልቃማ ጎዳይ።

5 ናይለ ሻፋ ጉፅ ጉፅ ባና፤ ሃꬃይካ መላና። 6 ꬋዋይ ፅንቃና፤ ግብፀ ሃꬃት ጉፃናነ መላና፤ ማይረይነ ማቃይ ሹላና፤ 7 ናይለ ሻፋ ጋፃን ደእያ ጭልኦባይ መላና፤ እያ ሄራን ዘረትዳ ካꬃ ኡባይ መላናነ ꬋያና። 8 ሞሎ ኦይከይሳት ካዮታና፤ ናይለ ሻፋን ግተነ ሞሎ ማንፃቆ የግያ ኡባይ ዬካናነ ዶጫና። 9 ፓደትዳ ታልባፈ ሊኖ ማኦ ኦይሳት፥ ቦꬃ ማኦ ዳድያ ዶርዘት ኡፋይስ ቃንፃና። 10 ፒቀይሳትነ ኡነ ኦꬅያ ኡባይ ካዮታና።

11 ፆኣነ ሃረይሳት ኤያ፤ ግብፀ ካዋ ዞርያ ጭንጫት ፓꬆና ዞረ ዞሮሶና። ያትን፥ ህንተ ግብፀ ካዋኮ፥ “ኑኒ ጭንጫታ ናይታ፤ ኑኒ በን ካዎታ ናይታ” ጋናዉ ዋንድ ዳንዳኤቲ? 12 ያትን፥ ነ ጭንጫ አሳት ሀእ አዉን ደኦና? ኡባፈ ዎልቃማ ጎዳይ ግብፀ ቦላ ኦꬃናዉ ሀልችዳባ አነ ኤንቲ ነዉ ኦዶነ ነና ኤርሶና። 13 ፆኣነ ሃረይሳት ኤይዶሶና፤ መምፕሳ ሃረይሳት ጭመትዶሶና። ግብፀ ዞርያ ግታ አሳት እያ ባለꬅዶሶና። 14 ጎዳይ ኤንታ ግዶን ኤይስያ አያና የድስ፤ ኤንቲ ማꬆትዳ አስ ባ ጮሻን ጎንዶረተይሳዳ ግብፀይ ባ ኦሶ ኡባን ጎንዶረታና መላ ኦꬅዶሶና። 15 ዛምቦይ ዎይኮ ቦዝ፥ ዛምባ ታሸይ ዎይኮ ማይረይ ግብፀን ኦꬃናባይ አይብካ ባዋ።

16 ሄ ጋላስ ግብፀ አሳይ ማጫሳ መላ ግዳና። ኤንቲ ኡባፈ ዎልቃማ ጎዳይ ኤንታ ቦላ ቃꬅያ እያ ኩሽያ በእድ ያሻን ኮኮራና። 17 ይሁድ ግብፀ ያሽሳና፤ ኡባፈ ዎልቃማ ጎዳይ ኤንታ ቦላ ኦꬃናዉ ቆፕዳ ቆፋ ግሾ ይሁዳባ ስእያ ኡባይ ያያና።

18 ሄ ጋላስ ግብፀ ቢታን ደእያ እቻሹ ካታማት ካናነ ቃላን ኦደተይሳታነ ኡባፈ ዎልቃማ ጎዳስ አማነታናዉ ጫቀይሳታ ግዳና። ሄ ካታማታፐ እሶይ፥ “አዋ ካታማ” ጌተትድ ፄገታና።

19 ሄ ዎደ ግብፀ ቢታስ ግዱዋን፥ ጎዳስ ያርሾ በሳይ ጊጋና፤ ቃስ ግብፀ ቢታ ዛዋን ጎዳስ ቱስ ኤቃና። 20 ሄስ ኡባፈ ዎልቃማ ጎዳስ ግብፀ ቢታን ማላነ ማርካ ግዳና። ኤንቲ ባንታና ኡንኤይሳታ ግሾ ጎዳኮ ዋስያ ዎደ ኤንታዉ አሸይሳ ኪትድ ኤንታ አሻና። 21 ሄ ዎደ ጎዳይ ግብፀ ቢታን ኤረትዳይሳ ግዳና፤ ግብፀ አሳይ ሄ ጋላስ ጎዳ ኤራና። ያርሾነ ካꬃ ያርሾ ኤክ ይድ እያ ጎይናና። ኤንቲ ጎዳስ ቃንጋናነ ባንታ ቃንገꬃ ጋꬃና። 22 ጎዳይ ግብፀ ቢታ ሾጫና፤ እዮ ዛሪድ ፓꬃና። ኤንቲ ጎዳኮ ስማና፤ እ ኤንታ ዎሳ ስእድ ፓꬃና።

23 ሄ ጋላስ ግብፀፈ አሶረ ጋካናዉ ዳልጋ ኦገይ ከያና፤ አሶረ አሳይ ግብፀ፥ ግብፀ አሳይ አሶረ ስመረታና፤ ግብፀ አሳይ አሶረ አሳራ እስፈ ጎይናና። 24 ሄ ጋላስ እስራኤለይ ግብፀራነ አሶረራ ሄꬓንꬆ ቢታ ግድድ፥ ሳኣስ አንጆ ግዳና። 25 ኡባፈ ዎልቃማ ጎዳይ ኤንታ ሀይሳዳ ያግድ አንጃና፦ “ታ አሰ ግድዳ ግብፀይ አንጀቶ፤ ታ ኩሸ ኦሶ ግድዳ አሶረይ አንጀቶ፤ ታ ላታ ግድዳ እስራኤለይ አንጀቶ” ያጋና።