10 “ኔኒ ነ ኢታተꬃን አማነታዳ፥ ‘ኦንካ ታና በኤና’ ያጋዳሳ። ነ ኤራተꬃይነ ጭንጫተꬃይ ነና ባለꬅን፥ ኔኒ ነ ዎዛናን፥ ‘ታፐ አትሽን፥ ሀር ባዋ’ ያጋዳሳ። 11 ሽን ኔኒ ዋታዳ ነ ብታን ሃሳኔኮ ኤሮና ኢታይ ነ ቦላ ያና። ኔኒ ጋተ ቃንፃናዉ ዳንዳኦና ꬋዮይ ነ ቦላ ዎꬋና፤ ቃስ ኔኒ አይኮካ ቆፖና ጋዶይ ነ ቦላ ያና።

12 “አነ ኔኒ ነ ናአተꬃፈ ዶማዳ ኦꬃሸ ደእዳ ነ ብታነ ነ ሙሩኑዋ ሀእካ ኦꬃ። ኦን ኤር ነ ቆፕዳይሳ መላ ሀናኔኮ ዎይኮ ኔኒ እያራ ዳጋንꬃኔኮ። 13 ኔኒ ኤክዳ ዞረይ ኡባይ ዳቡርሳፈ አትሽን፥ ነና አይኮካ ማድቤና። ሳሎ ፆልንቶ ታይበይሳትነ እያ ፄልድ አጌናን አጌናን ሀናናባ ኦደይሳት አነ ነና አሾ። 14 ኤንቲ ቡረ መላ፤ ታም ኤንታ ማና። ኤንቲ ታማ ላጩዋፐ ባንታና አሻናዉ ዳንዳኦኮና። አስ ካያ ቦንቆይ ዎይኮ አስ እያ ስንꬃን ኡትድ ሆእያ ታማ ግደና። 15 ኔኒ ኤንታራ ዳቡርዳይሳት፥ ናአተꬃፈ ዶምድ ኔራ ዛልእዳይሳት ነዉ ሄሳ መላ። ኤንቲ እሶይ እሶይ ባ ባላን ባላን ኦይከታና፤ ነና አሽያ ኦንካ ባዋ።”