1 እስራኤለ አሳይ ምፅጳን ሺቅዳ ዎደ፥ “ኑ ግዶፈ ኦንካ ብንያመ አሳስ ባ ናአ ማቾ እሞፎ” ያግድ ጫቅ ኡትዶሶና። 2 እስራኤለት ቤተለ ካታማ ብድ፥ ያን ሳእ ቃማና ጋካናዉ ፆሳ ስንꬃን ኡትድ፥ ባንታ ቃላ ꬎቁ ኦꬅድ ዬክዶሶና። 3 ኤንቲ፥ “አቤት ጎዳዉ፥ እስራኤለ ፆሳዉ፥ ሀይስ እስራኤለን አይስ ሀንዴ? ሀች እስራኤለ አሳ ግዶፈ እስ ኮቻይ አይስ ፓጭዴ?” ያግዶሶና።

4 ዎንተꬃ ጋላስ ጉራ ደንድድ፥ ያርሾ በስ ጊግስድ፥ ፁሳ ያርሾነ እስፈተꬃ ያርሾ ሺሽዶሶና። 5 እስራኤለት፥ “እስራኤለ ዛረ ኡባፈ ጎዳ ስንꬃን ሺቅያ በሳ ዮና ኮቻይ ኦኔ?” ያግድ ኦይችዶሶና። ኤንቲ ሄሳ ኦይችዳ ጋሶይ፥ “ምፅጳ ካታማን ጎዳ ስንꬃን ሺቃናዉ ይቦና አስ ኦንካ ሀይቆ” ያግድ ካሰ ጫቅዳ ግሾሳ።

6 እስራኤለ አሳይ ባንታ እሻታስ፥ ብንያመ ኮቻታስ ቃትድ፥ “ሀች እስራኤለፐ እስ ኮቻይ ꬋይስ። 7 ኑኒ ኑ ማጫ ናይታ ኤንታዉ እሞና መላ ጎዳን ጫቅዳ ግሾ ሀይቆፐ አትዳ ብንያመ ኮቻት ማቾ ኤካና መላ ኑኒ አይ ኦꬅኖ?” ያግዶሶና። 8 ቃስካ ኤንቲ፥ “እስራኤለ ኮቻታፐ ምፅጳን ጎዳ ስን ዮናይ ኦኔ?” ያግድ ኦይችዶሶና። ጋላዳን ደእያ ያበሳ ካታማፐ እስ አስካ ቃንገꬅ ጋꬃናዉ ዮናይሳ በእዶሶና። 9 ኤንቲ አሳ ታይብዳ ዎደ ጋላዳን ደእያ ያበሳፐ እስ አስካ በንትቤና።

10 ሄሳ ግሾ፥ ማባራይ 12,000 ምኖ ኦላንቾታ ጋላዳን ደእያ ያበሳ ካታማ ኪትዶሶና። ብድ፥ “ያበሳን ደእያ ማጫሳነ ናይታ እሱዋካ አሾና ማሻን ቡꬅተ። 11 ሄሳዳ ኦꬅድ፤ አደነ አደራ አቅዳ ማጫ ኡባ ዎꬍተ” ያግድ ኪትዶሶና። 12 ያበሳ ካታማን ደእያ አሳ ግዶፈ አደራ አቅቦና ኦይዱ ፄቱ ጌላኦ ማጫ ናይታ ደምዶሶና። ኤንታ ካናነ ቢታን፥ ሴሎን ዱንካንዳ ጉታ ኤክድ ይዶሶና።

13 ሄሳፈ ጉየ፥ ኩመꬃ ማባራይ እርሞና ዛላ ማታን ደእያ ብንያመ አሳራ ስገታናዉ ጭማ የድዶሶና። 14 ብንያመ አሳት ስሚድ ይዶሶና። እስራኤለ አሳይ ያበሳ ካታማፐ ዎꬎና ኤህዳ ጌላኦ ናይታ ኤንታዉ እምዶሶና። ሽን ጌላኦታ ታይቦይ አደታ ታይቡዋራ ግንቤና።

15 እስራኤለ ኮቻታ ግዶን ደእያ እስፈተꬃይ ዱፃና መላ ጎዳይ ኦꬅዳ ግሾ አሳይ ብንያመታስ ዳሮ ቃትዶሶና። 16 ማባራ ጭማት፥ “ብንያመ ኮቻታፐ ማጫስ ሀይቅድ ዉርዳ ግሾ፥ ሀይቆፐ አትዳ አደታስ ኑኒ ማጫስ ዋትድ ደማኔ? 17 እስራኤለ አሳ ግዶፈ ቁሸትድ ꬋዮና መላ ብንያመ ኮቻታፐ አትዳይሳታ ላትያ ናእ ዳናዉ ኮሼስ። 18 ግዶሽን፥ ኑኒ ኑ ማጫ ናይታፐ ኤንታዉ እማናዉ ዳንዳኦኮ። እስራኤለ አሳይ ካሰ፥ ‘ባ ናአ ብንያመ ኮቻስ እምያ ኡራይ ባደትዳይሳ ግዶ’ ያግድ ጫቀትድ ኡትዶሶና” ያግዶሶና።

19 ያትን፥ ጭማት፥ “ሄኮ፥ ላይꬃን ላይꬃን ሴሎን ጎዳ ቦንችያ ባለይ ማትስ” ያግዶሶና። ሴሎይ ቤተለፐ ፑደሀ ባጋራ፥ ላቦናፐ ዱገሀ ባጋራ፥ ቤተለፐ ሴከማ ኤፍያ ኦግያፐ ዶሎሀ ባጋራ ደኤስ። 20 ሄሳ ግሾ፥ ጭማት፥ ብንያመ አሳታ ሀይሳዳ ያግድ ኪትዶሶና፤ “ብድ ዎይነ ጋደ ግዶን ቆሰትድ፥ 21 ናግተ። ሴሎ ካታማ ማጫ ናይት ባኣለ ጋላስ ካራቦ ኦይክድ፥ የፅሸነ ዱርሸ ያ ዎደ ህንተ ዎይነ ጋደ ግዶፈ ከይተ። ሴሎ ማጫ ናይታፐ ዳፍ ኤክድ፥ ብንያመ ቢታ ኤፍተ። 22 ኤንታ አዋት ዎይኮ ኤንታ እሻት ኑኮ ማጋናናዉ ያ ዎደ ኑኒ ኤንታኮ፥ ‘ሀያና፥ ኤንታ ኑስ እምተ፤ ኑኒ ኤንታ ኦላ በሳፈ ኡንኤꬅድ ኤክቦኮ። ህንተ ዶስድ እምቦና ግሾ ባላ ግደከታ’ ያጋና” ያግዶሶና።

23 ብንያመ አሳይ እስራኤለ ጭማት ግዳይሳዳ ኦꬅዶሶና። እሶይ እሶይ ሴሎን የፅያ ማጫ ናይታፐ ባዉ ማቾ ዳፍድ ኤክስ። ኤንቲ ባንታ ላታ ቢታ ስሚድ፥ ካታማታ ዛር ኬፅድ ያን ደእዶሶና። 24 ሄ ዎደ እስራኤለ አሳይ ያፐ ላለትድ፥ እሶይ እሶይ ባ ኮቻኮ፥ ባ ኮቻኮነ ባ ሶ አሳኮ ብስ።

25 ሄ ዎደ እስራኤለ ቢታን ካዎይ ባዋ፤ አስ ኡባይ ባዉ ሎኦ ዳንዳባ ኦꬄስ።