1 ግብፀን ምግዶላ፥ ፃፍናሳ፥ መምፕሳነ ጳትሮሳ ቢታን ደእያ አይሁደታስ ጎዳ ቃላይ ኤርምያሳኮ ሀይሳዳ ያግድ ይስ። 2 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመ ቦላነ ይሁዳ ካታማ ኡባ ቦላ ታ ኤህዳ ꬋዮ ኡባ ህንተ፥ ህንተ አይፈን በእደታ። ኤንቲ ሀች ጋካናዉ ላለትድ አትዶሶና፤ ኦንካ ያን ዴና። 3 ሄስ ሀንዳይ፥ ኤንቲ ኢታ ኦሶ ኦꬅድ፥ ታና ሀንቀꬅዳ ግሾሳ። ኤንቲ ዎይኮ ህንተ ዎይኮ ህንተ ማይዛት ኤሮና ሀራ ፆሳታስ እፃነ ጩይስድ ኤንታዉ ጎይንዶሶና። 4 ‘ታ እፅያ ሀይሳ መላ ኢታባ ኦꬆፕተ’ ያግድ ኦዳና መላ ዛራ ዛራ ታ አይለታ፥ ናበታ ኪታስ። 5 ግዶሽን፥ ኤንቲ ስኦና ዎይኮ አኬኮና እፅዶሶና። ሀራ ፆሳታስ እፃነ ጩይስያ ኢታ ኦሱዋ አጎና እፅዶሶና። 6 ሄሳ ጋሶን ታ ሱልያ ሀንቆይነ ይሎይ ይሁዳ ካታማታ ቦላነ የሩሳላመ ኦገታን ኤፅስ። ኤንቲ ሀች ህንተ በኤይሳዳ ላለትዶሶና፤ ባይሳ ግድዶሶና።

7 “ሀእካ ጎዳይ፥ ኡባፈ ዎልቃማ ፆሳይ፥ እስራኤለ ፆሳይ፥ ሀይሳዳ ያጌስ፤ ህንተ ኮቻይ አቶና መላ፥ ማጫሳ፥ አደታ፥ ናይታነ ዮጋ ናይታ ይሁዳ ቢታፈ ꬋይሳናዳ ኢታባ ህንተ፥ ህንተ ቦላ አይስ ኦቲ? 8 ህንተ ዳናዉ ይዳ ግብፀ ቢታን ሀራ ፆሳታስ እፃነ ጩይስድ ታና አይስ ሀንቀቲ? ሳአን ደእያ ካዎተꬃታ ኡባ ግዶን ባደꬃስነ ቦረስ አትድ፥ ህንተና ꬋይሳናዉ አይስ ኮዬቲ? 9 ካሰ ህንተ አዋት፥ ይሁዳ ካዎትነ ኤንታ ማቸት፥ ህንተነ ህንተ ማቸት ይሁዳ ካታማታንነ የሩሳላመ ኦገታን ኦꬅዳ ኢታ ኡባ ዶግደትዬ? 10 ህንተ ሀች ጋካናዉ ህንተናተꬃ ካዉሽበከታ፤ ታና ቦንችቤከታ። ታ ህንተዉነ ህንተ ማይዛታስ እምዳ ህግያነ ዎጋ ካልበከታ።

11 “ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ታ ህንተና፥ ይሁዳ ዘርታ ኡባ ꬋይሳናዉ ቆፋ ቃቻስ። 12 ይሁዳን አትዳ አሳ ግዶፈ፥ ግብፀ ብድ፥ ያን ዳናዉ ቆፋ ቃችዳይሳታ ታ ꬋይሳና። ኤንቲ ኡባይ ግብፀን ዉራና፤ ኦላንነ ኮሻን ሀይቃና። ግታፐ ጉꬁ ጋካናዉ ደእያ ኡባይ ኦላንነ ኮሻን ꬋያና። ኤንቲ ዳጋማስ፥ ጫሻስ፥ ባደꬃስነ ሚቻስ አታና። 13 ታ የሩሳላመ፥ ኦላን፥ ኮሻንነ ቦሻን ሴርዳይሳዳ ግብፀ ቢታን ደኤይሳታ ሴራና። 14 አትዳ ይሁዳ አሳፐ ግብፀ ብድ ደኤይሳት ግብፀታ ኩሽያፐ ፖሎ ከስ ኤኮኮና። ኤንቲ ስሚድ ዳና ግድ አሞትያ ይሁዳ ቢታ አይ አስካ ስመና። ጉꬃ አሳፐ አትሽን፥ ኦንካ ስሚድ ዬና” ያግስ።

15 ኤንታ ማቸት ሀራ ፆሳታስ እፃነ ጩይሰꬅ ኤርያ አደይ ኡባይ፥ ያን ደእያ ማጫሳ ኡባይነ ግታ ማባራ ግድድ፥ ግብፀንነ ጳትሮሳን ደእያ አሳ ኡባይ ኤርምያሳኮ ሀይሳዳ ያግዶሶና። 16 “ኔኒ ጎዳ ሱንꬃን ኑስ ኦድያባ ኡባ ኑ ስኦኮ። 17 ኑ ኦꬃና ግድ ቆፕዳባ ኡባ ኦꬃና። ኑኒ፥ ኑ ማይዛት፥ ኑ ካዎትነ ኑ ሀላቃት ይሁዳ ካታማታንነ የሩሳላመ ኦገታን ካሰ ኦꬅዳይሳዳ ሳሎ ካውዉ ጌተትያርስ ኑ ፆሴስ እፃነ ጩይሳና፤ ኡሻ ያርሹዋ እዉ ጉሳና። ኑ ካሰ ሄሳ ኦꬅያ ዎደ፥ ኑስ ዳሮ ካꬅ ደኤስ፤ ሄ ዎደ ኑስ ሳእ ኬሀ፤ ኑና አይብካ መትቤና። 18 ሽን ሳሎ ካዌስ እፃነ ጩይሰይሳነ ኡሻ ያርሾ ጉሰይሳ አግዳፐ ጉየ፥ ኑስ ኡባባይ ፓጭስ፤ ኑ ኦላንነ ኮሻን ዉርዳ” ያግዶሶና።

19 ማጫሳት ጉጅድ፥ “ኑ ሳሎ ካዌስ ማላን ኡይꬁ ኡክያ ዎደ፥ እፃነ ጩይስያ ዎደነ ኡሻ ያርሾ እዉ ጉስያ ዎደ ኑ አዝናት ኤሮና ደእሽን፥ ኑ ኦꬅዳባይ አይብካ ባዋ” ያግዶሶና።

20 ሀይሳዳ ያግድ ዛርዳ አሳ ኡባስ፥ ማጫሳስነ አደታስ፥ ኤርምያስ ሀይሳዳ ያግስ፤ 21 “ህንተነ ህንተ ማይዛት፥ ህንተ ካዎትነ ህንተ ሀላቃት፥ ቢታን ደእያ አሳ ኡባይ፥ ይሁዳ ካታማታንነ የሩሳላመ ኦገታን እፃነ ጩይስዳይሳ ጎዳይ ኤረና ዎይኮ ዶግስ ግድ ቆፔቲ? 22 ህንተ ኦꬅያ ኢታነ ሻትያ ኦሱዋ ጎዳይ ስእ ጋናዉ ዳንዳእቦና ግሾ፥ ህንተ ቢታ ሀች ህንተ በኤይሳዳ ላለትዳ፥ ባይሳነ ባደትዳ ቢታ ኦꬅስ። 23 ሀ ꬋዮ ኡባይ ህንተና ጋክዳይ፥ ህንተ ሀራ ፆሳታስ እፃነ ጩይስዳ ግሾሳ፥ ጎዳ ቦላ ናጋራ ኦꬅዳ ግሾሳ፥ ጎዳ ቃላ ስኦና እፅዳ ግሾሳነ እያ ህግያ፥ እያ ዎጋነ አዋጁዋስ ኪተቶና እፅዳ ግሾሳ” ያግስ።

24 ሄሳፈ ጉየ፥ ኤርምያስ አሳ ኡባስነ ማጫሳስ ሀይሳዳ ያግስ፤ “ህንተኖ፥ ይሁዳፐ ይድ፥ ግብፀ ቢታን ደእያ አሳዉ፥ ጎዳይ ግያባ ስእተ። 25 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ህንተነ ህንተ ማቸት፥ ‘ኑኒ ሳሎ ካዌስ እፃነ ጩይሳና፤ ኡሻ ያርሹዋ እዉ ጉሳና’ ግድ ጫቅዳ ጫቁዋ ፖልድ፥ ኦሶን በስደታ። ህዛ፥ ጉየ ጎፕተ፤ ህንተ ጫቁዋ ፖልተ።

26 “ግዶሽን፥ ህንተኖ፥ ግብፀ ቢታን ደእያ ይሁዳ አሳዉ፥ ጎዳይ ግያባ ስእተ! ጎዳይ ሀይሳዳ ያጌስ፤ ‘ህዛፐ ጉየ ግብፀ ቢታን ደእያ ይሁዳ አሳፐ እሶይካ ታ ሱንꬃን፥ “ኡባ ሃርያ ጎዳይ ኤሮ” ’ ግድ ጫቆና መላ ታ ግታ ሱንꬃን ጫቃስ። 27 ታ ኤንታ ቦላ ሎኦባ ግዶናሽን፥ ኢታባ ኤሀናዉ ምናይስ። ግብፀን ደእያ ይሁዳ አሳይ ዉራና ጋካናዉ ኦላንነ ኮሻን ሀይቃና። 28 ኦላፐ አትዳ ጉꬃ አሳት ግብፀፈ ይሁዳ ስማና። ሄ ዎደ ግብፀን ደእያ ይሁዳ አሳይ፥ ታ ቃላፐነ ኤንታ ቃላፐ አዉስ ቱሜኮ ኤራና። 29 ታ ህንተና ሀ በሳን ሴርያ ዎደ፥ ‘ታ ህንተ ቦላ ኢታባ ኤሀና’ ግዳይስ ቱማ ግደይሳስ ታ ህንተዉ ማላታ እማና። 30 ታ ይሁዳ ካዋ ሰደቅያሳ እያዉ ሞርከ ግድድ፥ እያ ዎꬋናዉ ኮይያ ባብሎነ ካዋ ናቡካዳናፆራስ አꬃዳ እምዳይሳዳ ግብፀ ካዋ ሆፍራ እያ ዎꬋናዉ ኮይያ እያ ሞርከታስ አꬃዳ እማና” ያጌስ ጎዳይ።