22
ኤልፋዛ ሃሳያ
1 ሄሳፈ ጉየ፥ ተማና ቢታፈ ይዳ ኤልፋዝ ሀይሳዳ ያግድ ዛርስ፤
2 “አስ ፆሰ ጎአናዉ ዳንዳኢ?
ሀር አቶሽን ጭንጫ ግድኮካ፥
ባና ጎአናፐ አትሽን፥ ፆሰ ጎኤና።
3 ኔኒ ፅሎ ግድኮ ሄስ ኡባ ዳንዳእያ ፆሳ ኡፋይስዬ?
ነ ኦገይ ቦረይ ባይናባ ግድኮ ሄሳን እ አይ ዎ ደሚ?
4 “እ ነና ሴረይነ ፕርደይ፥
ኔኒ እያዉ ያይያ ግሾዬ?
5 ነ ኢታተꬃይ ዳሮ ግደነዬ?
ነ ናጋራስ ዛው ባዋ ግደኔ?
6 ጋሶይ ባይና ነ እሻታ ዋሰ ፄግሳዳሳ፤
አሳ ማኡዋ ቃራ ኤካዳ ኤንታ ካሎ የዳዳሳ።
7 ሳሞትዳይሳታ ሃ ኡሻባካ፤
ኮሻትዳይሳታ ካꬅ ሙዛባካ።
8 ኔኒ ዎልቃማ፥ ዱረነ
ቦንቸትዳ አስ ግዳዳ ደአሸ፥
9 አምኤታ መላ ኩሸ የዳዳሳ፤
ይኦታስ ዎልቃ ꬋይሳዳሳ።
10 ነ ዩሾይ ግተትዳይ፥
አኬኮና ያሽ ነና ኮኮርሰይ ሄሳሳ።
11 ነ በኦና መላ ꬉምዳይ፥
ቃስ ክፃ ሃꬃን ነ ሙከትዳይ ሄሳሳ።
12 “ፆሳይ ꬎቃ ሳሉዋን ኡትድ፥
ꬎቃን ደእያ ፆልንቶታ ዱገ ፄሌስ።
13 ሽን ኔኒ፥ ‘ፆሲ አይ ኤሪ?
ሳካና ꬉማ ግዶራ ካንꬅድ፥
ፕርዳናዉ ዳንዳኢ?
14 ሳሎ ጉፋንꬆ ቦላ እ ስመረትያ ዎደ፥
እ በኦና መላ ስከትዳ ሻራይ እያ ጎዜስ’ ያጋሳ።
15 ናጋራንቾት ሄመትዳ በን ኦግያራ
ባናዉ ቆፋ ቃቻዲ?
16 ኤንታዉ ዎደይ ጋኮና ደእሽን ሀይቅዶሶና፤
ኤንታ ደኦ ባሶይ ድኦን ሜጨትድ ꬋይስ።
17 ኤንቲ ፆሳኮ፥ ‘ኑፐ ሃካ!
ኡባ ዳንዳእያ ፆሳይ ኑስ አይ ኦꬃናዉ ዳንዳኢ?’ ያግዶሶና።
18 ግድኮካ፥ ኤንታ ኬꬃ ሎኦባን ኩንꬅዳይ ፆሳ፤
ሄሳ ግሾ፥ ኢታ አሳ ቆፋ ታ ኤክከ።
19 “ኢታ አሳት ሴረትያ ዎደ፥
ፅሎት ኡፋይቶሶና፤
ሱረ አሳት ሀይሳዳ ያግድ፥ ኤንታ ቦላ ቀልቅሶሶና።
20 ‘ኑ ሞርከት ꬋይዶሶና፤
ኤንታ ዱረተꬃይ ታማስ አትስ’ ያጎሶና።
21 “እዮባ፥ ሀእካ ፆሳራ ጊጋ፤
እያራ ሳሮ ደአ፤
ያትኮ ኔኒ አንጀታና።
22 እያ ትምርትያ ስአ፤
እያ ቃላ ነ ዎዛናን ዎꬃ።
23 ኔኒ ኡባ ዳንዳእያ ፆሳኮ ስምኮ፤
ነዉ ሳእ ስማና፤
ኢታ ኦሶ ኡባ ነ ሶፐ ድጋ፤
24 ነ ዎርቃ ሳአን ሆላ፤
ነ ኦፍራ ዎርቃ ሻፋን የጋ።
25 ያትኮ ኡባ ዳንዳእያ ፆሳይ፥
ነዉ ዎርቃነ ዶረትዳ ብራ ግዳና።
26 ሄ ዎደ ነ ኡባ ዳንዳእያ ፆሳን ኡፋይታና፤
ዬላቶና ፆሳኮ ፑደ ፄላና።
27 ኔኒ እያ ዎሳና፥ እ ነና ስአና፤
ነ ቃንገꬃ እያዉ ጋꬃና።
28 ነ ቆፕዳባይ ፖለታና፤
ነ ሄመትያ ኦገይ ፖኦ ግዳና።
29 ፆሳይ ኦቶረይሳታ ካዉሼስ፤
ሽን አሽከታ አሼስ።
30 ነ ኩሸይ ጌሽ ግድኮ፥
ባላ አሳይ ነ ጋሶን ማሮታ ኤካናነ አታና” ያግስ።