ፅዮነ ናእዉ፥ ዋትድ ዎꬅደ!

ባ ሀንቁዋ ጋላስ፥

እያ ቶሆይ የꬍያ በሳ ቆፕቤና።

ባ ሀንቁዋን ይሁዳ ቢታ ሚፃ ኡባ ላልስ፤

ሄ ካዎተꬃነ ሀላቃታ ሳአን ዱገ የግድ ካዉሽስ።

ሞርከይ እያ ኦላናዉ ያ ዎደ

ጎዳይ ባ ኡሻቻ ኩሽያ ኤንታ ቦላፈ ድግስ።

ያይቆባ ቦላ ታማ ላጮይ ኤፅስ።

ኡንኤꬅያ እያ ኡሻቻ ኩሸይ ጊግስ።

ፅዮነ ቦላ ባ ሸንያ ታማዳ ቆልስ።

ካዎ ጋꬎታነ ሚፃ ኡባ ላልስ

ይሁዳ አሳስ ዬሆነ ካዮ ጉጅስ።

ላይꬃ ባለትነ ሳምባታት ዶገታናዳ ኦꬅስ፤

ባ ግታ ሀንቁዋን ካዋነ ካህንያ ካዉሽስ።

ካዎ ጋꬎታ ግምብያ ሞርከታ ኩሸን የግስ።

ሞርከት ፆሳ ኬꬃን ዎጫምዶሶና።

ላላናዉ ቃችስ፤ እ ቦላ ዋꬋ ዎዶሮ የግስ።

ግምበይነ ሚፃይ እስፈ ኩንዳናዳ ኦꬅስ።

ኤንታ ጎርደ ምꬃታ መንረꬅድ ꬋይስስ።

ህገ ታማርሰይ ባዋ፤

ናበትካ ህዛፐ ጉየ ቆንጨꬅ በኦኮና።

ባንታ ሁጰን ባና ቆልድ ካዮ ማኦ ማእዶሶና፤

የሩሳላመ ጌላኦት ሳአን ዱገ ሆክዶሶና።

ጉꬃ ናይት ካታማ ኦግያ ቦላ

ዳቡርድ ኩንድዳ ግሾ፥

ታ አይፈይ አፉꬃን ቱልጫትስ፤

ታ ዎዛናይ አዛኖን ዳጋምስ።

“ካꬅ እማ! ሃ እማ”

ካታማ ኦግያን ማዱንፅድ ላባንያ አሳዳ፥

ኤንቲ ዳቡርን ኤንታ ሸምፖይ ኤንታ አየታ ክኦን ከዬስ።

ነ ቆሁዋ ታ አይብራ ግናዮ?

ነ ማዱንꬃይ አባ መላ ጪሞ፤

ነና ኦን ፓꬃናዉ ዳንዳኢ?

ነ ድኤቶና መላ ነ ናጋራ ቆንጭስድ ኦድቦኮና፤

ኤንቲ ባለꬅያ ዎርዶ ቆንጨꬅ ነዉ በእዶሶና።

“ቢታን ኡባፈ አꬋዳ ሎእያ ካታምያ ሀኖ?

ያግድ ነና ቀልቅስሸ ባንታ ሁጵያ ቃꬅዶሶና።

ነ ቦላ ዶይዶሶና፤

ነ ቦላ ቀልቅስዶሶና።

ኑ ኤንታ ꬋይስዳ፥ ኑ አሞትዳይ ሄሳ

ዉርሰꬃን በእዳ።

ካሰ ኦድዳ ባ ቃላ ፖልስ።

ሞርከታ ዎልቃ ምንꬅስ።

ነ አፉꬃይ ቃማነ ጋላስ ሻፋዳ ጎጎ!

ነ አይፍያስ ሸምፖ እሞፋ!

ጎዳ ስንꬃን ነ ዎዛና ሃꬃዳ ጉሳ።

ነ ኩሽያ እያኮ ፑደ ደንꬃዳ ዎሳ!

ካሰ ሀይሳዳ ኔኒ ኦደ ቦላ ኦꬃዲ?

ድችዳ ባንታ ናይታ ሞ ጋይ?

ካህነትነ ናበት ፆሳ ኬꬃን ሀይቆ ጋይ?

ጌላኦትነ ፓንꬃት ማሻን ዉርዶሶና።

ኤንታዉ ቃቶና ኤንታ ቡꬃዳሳ።

ዳጋንꬅያ ታ ሞርከታ ኡባ በሳፈ ፄጋዳሳ።

ኦንካ ከስ ኤክቤና ዎይኮ አትቤና።

ናይታ ኡባ ሞርከይ ዎꬍድ ꬋይስስ።