3
ኩሸይ ስልዳ ኡራ
(ማቶ 12:9-14፤ ሉቃ 6:6-11)
1 የሱሲ አይሁደ ዎሳ ኬꬅ ስም ገልስ። ያን ኩሸይ ጉንድዳ እስ ኡራይ ደኤስ። 2 እስ እስ አሳይ የሱሳ ሞታናዉ ኮይድ፥ ኩሸይ ጉንድዳ ኡራ ሳምባታ ጋላስ እ ፓꬅኮነ አግኮ በአናዉ ኮይድ ምንꬅድ ናጎሶና። 3 የሱሲ ኩሸይ ጉንድዳ ኡራ፥ “ደንዳ ኤቃዳ ሃ ስን ያ” ያግስ። 4 ሄሳፈ ጉየ፥ አሳኮ፥ “ሳምባታ ጋላስ ሎኦባ ኦይስ ዎገየ ኢታባ ኦይስ ዎጌ? አሳ ሸምፖ አሾየ ዎይኮ ዎꬎ?” ያግድ ኦይችስ።
ሽን አሳይ ስእ ግስ። 5 የሱሲ ሀንቀትድ፥ ኤንታ ዩሽ አꬅ ፄልድ፥ ኤንቲ ኦድን ስኦናይሳታ ግድያ ግሾ፥ ኤንታ ቦላ ዳሮ አዛንስ። ሄ አድያኮ፥ “ነ ኩሽያ ፕድ ኦꬃ” ያግስ። ኡራይ ፕድ ኦꬅን እያ ኩሸይ ፓፅስ። 6 ኤለስድ ፋርሳወት አይሁደ ዎሳ ኬꬃፈ ካረ ከይድ፥ የሱሳ ዋት ዎꬋነኮ ማቀታናዉ ሄሮዲሳ ባጋታራ እስ ሶ ሺቅዶሶና።
ዳሮ አስ የሱሳ ካሌስ
7 የሱሲ ባ ታማረታራ ጋልላ አባኮ ብስ። ጋልላፐነ ይሁዳፐ ይዳ ዳሮ አሳይ እያ ካልዶሶና። 8 ቃስካ የሩሳላመፐ፥ ኤዶምያሳፐ፥ ዮርዳኖሰ ሻፋ ፕንꬃፈ፥ ፅሮሳ ካታማፐነ ስዶና ካታማፐ የሱሲ ኦꬅዳባ ስእድ፥ ዳሮ አሳይ እያኮ ይዶሶና። 9 አሳ ዳሮተꬃፈ ደንዶይሳን እያ ኡንኤꬆና መላ እያ ታማረት ዎጎሎ እያዉ ጊግሳና መላ ኪትስ። ማር 4:1፤ ሉቃ 5:1-3. 10 ዳሮ አሳ እ ፓꬅዳ ግሾ፥ ሀርግያ አሳ ኡባይ እያ ቦቻናዉ ሱገቶሶና። 11 ቱና አያናይ ኦይክዳ አሳት እያ በእዳ ዎደ እያ ስንꬃን ኩንድድ፥ ባንታ ቃላ ꬎቁ ኦꬅድ፥ “ኔኒ ፆሳ ናኣ ግድኪ?” ያጎሶና።
12 ሄ ቱና አያናት እያ ኦናተꬃ ኦደስካ ቆንጭሶና መላ ኤንታዉ ምንꬅድ ኦድስ።
ታማነ ናምኡ ሀዋረታ
(ማቶ 10:1-4፤ ሉቃ 6:12-16)
13 የሱሲ ደርያ ቦላ ከይድ፥ ባ ኮይዳ አሳታ ባኮ ፄግስ፤ ኤንትካ እያኮ ብዶሶና። 14 ኤንቲ ባራ ዳና መላነ ቃላ ታማርሳና መላ ታማነ ናምአታ ዶርድ፥ ኤንታ፥ “ሀዋረታ”*ሀዋረ፦ ሀዋረ ጉሳይ ኪተትዳይሳ ጉሱ። ግድ ሱንꬅስ። 15 ቱና አያናታካ ከሳና መላ ኤንታዉ ማታ እሚስ።
16 እ ዶርዳ ታማነ ናምአት ሀይሳታ፦ ጰፅሮሳ ያግድ ሱንꬅዳ ስሞና፥ 17 ቦአነርገስ (ዳዳ ናይታ) ያግድ ሱንꬅዳይሳታ፥ ዛብድዮሳ ናይታ ያይቆባነ ያይቆባ እሻ ዮሃንሳ፥ 18 እንድርያሳ፥ ፍልጶሳ፥ ባርተለሞሳ፥ ማቶሳ፥ ቶማሳ፥ እልፍዮሳ ናአ ያይቆባ፥ ታድዮሳ፥ ባ ቢታስ ምሸትያ ስሞናነ፥ 19 የሱሳ አꬅድ እምዳ አስቆሮታ ይሁዳ።
የሱሳነ ብኤል-ዘቡላ
(ማቶ 12:22-32፤ ሉቃ 11:14-23፤ 12:10)
20 ሄሳፈ ጉየ፥ የሱሲ ሶ ብስ። ቃስ ዳሮ አሳይ ሺቅን፥ እነ እያ ታማረት ሀር አቶሽን ካꬅ ማናዉካ ዳንዳእቦኮና። 21 አሳይ እያ፥ “ጎዬስ” ግያ ግሾ፥ እያ ዳቦት ሄሳ ስእድ እያ ኤካናዉ ብዶሶና።
22 ህገ አስታማረታፐ እሶት እሶት የሩሳላመፐ ይድ፥ “እያ ቦላ ብኤል-ዘቡል ደኤስ”፥ እ፥ “ፃላሄይ ዎልቃን ቱና አያናታ ከሴስ” ያግድ ኦደትዶሶና። ማቶ 9:34፤ 10:25.
23 የሱሲ አሳ ባኮ ፄግድ ሌምሶ ኦድስ። “ፃላሄይ ፃላሄ ዋት ከሳናዉ ዳንዳኢ? 24 እስ ካዎተꬃይ ባ ግዶን ሻከትኮ ሄ ካዎተꬃይ ኤቃናዉ ዳንዳኤና። 25 ሄሳዳካ፥ እስ ኬꬃ አሳይ ባንታ ግዶን ሻከትኮ ꬋያናፐ አትሽን፥ ዳናዉ ዳንዳኦኮና። 26 ህዛ፥ ፃላሄይ ባራ ካጨትድ ሻከትኮ ꬋዮፐ አትሽን፥ ዳናዉ ዳንዳኤና።
27 “ሽን ኮይሮትድ ዎልቃማ ኡራ ቃቾና ደእሸ እያ ኬꬃ ገልድ፥ እያ ሚሽያ ቦንቃናዉ ዳንዳእያ አስ ባዋ። ቃች ስሚድ እያ ኬꬃ ቦንቃናዉ ዳንዳኤስ።
28 “ታኒ ህንተዉ ቱማ ኦዳይስ፤ ፆሳይ አሳ ናይታስ ናጋራ ኡባነ ኤንቲ ጫይያ ጫሸ ኡባ አቶ ጋና። 29 ሽን ጌሻ አያና ቦላ ኢታባ ኦደትያ ኦደስካ መርና ናጋራ ግዳናፐ አትሽን፥ ፆሳይ ኡባራካ እያ ማረና” ያግስ። ሉቃ 12:10. 30 የሱሲ ሄሳ ግዳይ፥ እስ እስ አሳት፥ “እያ ቦላ ቱና አያናይ ደኤስ” ያግዳ ግሾሳ።
የሱሳ አይዉነ እያ እሻታ
(ማቶ 12:46-50፤ ሉቃ 8:19-21)
31 እያ አያነ እያ እሻት ይድ ካረን ኤቅድ፥ እያኮ አሰ ኪትድ እያ ፄግዶሶና። 32 እያ ማታን ኡትዳ ዳሮ አሳት፥ “ሄኮ፥ ነ አየራነ ነ እሻታራ ካረን ኤቅድ ነና ኮዮሶና” ያግዶሶና።
33 የሱሲ ዛሪድ፥ “ታ አይያ ኦኔ? ቃስ ታ እሻት ኦናንቴ?” ያግስ። 34 ባ ማታን ኡትዳ አሳ ዩሽ አꬅ ፄልድ፥ “ሄኮ፥ ታ አያነ ታ እሻት ሀይሳታ። 35 ፆሳይ ሸንያ ኦꬅያ ኡባይ ታ እሻ፥ ታ ምቾነ ታ አዮ” ያግስ።