13
ፆሳ ኬꬃይ ላለቶና አተና
(ማቶ 24:1-2፤ ሉቃ 21:5-6)
1 የሱሲ ፆሳ ኬꬃፈ ከይሽን፥ እያ ታማረታፐ እሶይ፥ “አስታማርያዉ፥ ሀ ሎኦ ሹቻነ ሀ ሎኦ ሹቻ ኬꬃ በአይ!” ያግስ።
2 የሱሲ ዛሪድ፥ “ሀ ግታ ሹቻ ኬꬃ በአይ? ሀ ኬꬃይ ሹች ሹቻ ቦላ ግምበትዳ መላ ላለቶና አተና፤ እስ ሹችካ አቶና ኡባይ ላለታና” ያግስ።
ዎደ ዉርሰꬃ ማላታታ
(ማቶ 24:3-14፤ ሉቃ 21:7-19)
3 የሱሲ ፆሳ ኬꬃፈ ህን ባጋራ ሻማሆ ዙማ ቦላ ኡትዳሽን፥ ጰፅሮስ፥ ያይቆብ፥ ዮሃንስነ እንድርያስ ባንታርካ እያኮ ይድ፥ 4 “ሀይስ አዉደ ሀናኔኮ፥ ኑስ ኦዳ፤ ሀ ኡባይ ፖለታና ዎድያ ኤርስያ ማላታይ አይቤ?” ያግድ ኦይችዶሶና።
5 የሱሲ ቃስ ኤንታኮ ሀይሳዳ ያግድ ኦድስ። “ህንተና ኦንካ ባለꬆና መላ ናገትተ። 6 ዳሮ አሳት ታ ሱንꬃን፥ ‘ታኒ ክርስቶሳ’ ያግድ ታማርስሸ ይድ፥ ዳሮ አሳ ባለꬃና። 7 ማታን ደእያ ኦላነ ሃሆን ደእያ ኦላ ዎረ ህንተ ስእያ ዎደ ህርጎፍተ። ሄሳ መላባይ ሀናናዉ በሴስ፥ ሽን ዉርሰꬃይ ቡሮና። 8 እስ ቢታ አሳይ ሀራ ቢታ አሳራ ኦለታና፤ ቃስ እስ ካዎተꬃይ ሀራ ካዎተꬃታራ ኦለታና፤ ቢታ ቃፆይ ኡባ በሳን ሀናና፤ ኮሻይ ዳና፥ ሽን ሄስ ኡባይ የሎ እቀꬃስ ዞከ መላ።
9 “ሽን ህንተ፥ ህንተ ሁጰን ናገትተ። አይስ ጊኮ፥ አስ ህንተና ኦይክድ፥ ፕርዳ ኬꬃስ አꬅድ እማና፤ ቃስ አይሁደ ዎሳ ኬꬃታንካ ህንተና ልሶን ጋራፋና፤ ደርያ ሃረይሳታ ስንꬃንነ ካዎታ ስንꬃን ታ ግሾ ህንተ ማርካታናዉ ኤቃና። ማቶ 10:17-20፤ ሉቃ 12:11-12. 10 ዉርሰꬃይ ጋካናፐ ስን ዎንገላይ ኮይሮ ደረ ኡባስ ኦደታናዉ በሴስ። 11 ኤንቲ ህንተና ፕርዳ ኬꬅ ኤህያ ዎደነ አꬅድ እምያ ዎደ፥ ዎይግድ ኦዳነኮ ኮይሮ ህርጎፍተ፤ ሄ ሳትያን ፆሳይ ህንተዉ እምያባ ኦድተ። ህንተናን ጌሻ አያናይ ኦደቴስፐ አትሽን፥ ህንተና ግደከታ።
12 “እሻይ ባ እሻ፥ አዋይ ባ ናኣ ዎꬍሳና። ናይት ባንታና የልዳይሳታ ቦላ ደንድድ፥ ኤንታ ዎꬍሳና። 13 አሳ ኡባይ ህንተና ታ ሱንꬃ ግሾ እፃና፥ ሽን ዉርሰꬅ ጋካናዉ ምንዳይ አታና። ማቶ 10:22.
ያና ኢታ መቱዋ
(ማቶ 24:15-28፤ ሉቃ 21:20-24)
14 “ሽን ꬋዮ ቱናተꬃይ ኤቃናዉ በሶና በሳን ኤቅዳሽን ህንተ በአና።” (አኬክሶ፦ ሄስ ዎይ ጉሰኮ ናባበይስ አኬኮ!) “ይሁዳ ቢታን ሄ ዎደ ደኤይሳት ደርያኮ ባቃቶ። ዛረ 9:27፤ 11:31፤ 12:11. 15 ኬꬃ ሁጰን ደእያ ኡራይካ እስባ ኤካናዉ ዱገ ዎꬍድ፥ ባ ሶ ገሎፖ። ሉቃ 17:31. 16 ጋደን ደኤይስ ባ ማኡዋ ኤካናዉ ጉየ ስሞፎ። 17 ሄ ዎደ ቃንꬃትዳ ማጫሳታስነ ꬋንꬅያ ማጫሳታስ ዳሮ ኡንአ ግዳና። 18 ሽን ሀይስ ኡባይ ሀንያ ዎደይ ባልጎ ግዶና መላ፥ ፆሳ ዎስተ። 19 አይስ ጊኮ፥ ፆሳይ አላምያ መꬍዳ ዎድያፐ ዶምድ፥ ሀእ ጋካናዉ ሀንቦና መቶይነ ስንꬃፈካ ሀኖና መቶይ አሳ ቦላ ሄ ዎደ ሀናና። ዛረ 12:1፤ ቆን 7:14. 20 ጎዳይ ሄ ጋላሳታ ታይቡዋ ጉꬆናኮ፥ አሰ ግድዳይ ኦንካ አተና። ሽን እ ባ ዶርዳ አሳ ግሾ፥ ሄ ጋላሳታ ታይቡዋ ጉꬄስ።
21 “ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን ደኤስ ዎይኮ ክርስቶስ ህንን ደኤስ’ ያግኮ፥ ሄሳ አማኖፕተ። 22 ዎርዳንቾ ክርስቶሳትነ ዎርዶ ናበት ደንድድ ባንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለꬃናዉ ማላታታነ ማላልስያባታ በሳና። 23 ሽን ህንተ ናገትተ፤ ታኒ ህንተዉ ኡባባ ካሰታዳ ኦዳስ።
አሳ ናአ ናምአንꬆ ዩሳ
(ማቶ 24:29-31፤ ሉቃ 21:25-28)
24 “ሽን ሄ ዎደ ሄ ዋያፐ ጉየ፥
አዋይ ꬉማና፤
አጌናይ ፖኡዋ አጋና። እሳ 13:10፤ ኤርም 2:10.
25 ፆልንቶት ሳሎፐ ኩንዳና፤
ቃስ ሳሎን ደእያ ዎልቃትካ ቃፃና። እሳ 34:4፤ ቆን 6:13፤ ኤርም 2:10.
26 ሄ ዎደ አሳ ናአይ፥ ግታ ዎልቃራነ ቦንቹዋራ ሻራ ግዶራ ይሽን ኤንቲ በአና። ዛረ 7:13፤ ቆን 1:7. 27 ሄ ዎደ ታኒ ኪታንቾታ ሳአ ኦይዱ ባጋ ኪታና፤ ሳአ ጋፃፐ ሳሎ ጋፃ ጋካናዉ፥ ፆሳይ ዶርዳ አሳ ሺሻና።
ባላሰ ምꬃፈ ታማርተ
(ማቶ 24:32-35፤ ሉቃ 21:29-33)
28 “ሌምሱዋ ባላሰ ምꬃፈ አኬክተ፤ ባላስያ አጭያ ዎደነ እ ሀይꬃይ ጭልእያ ዎደ፥ ቶርቸይ ማታትዳይሳ ህንተ ኤሬታ። 29 ሄሳዳካ፥ ህንተ ሄ ኡባባይ ሀነይሳ በእያ ዎደ፥ እ ማትድ ፐንገ ጋክዳይሳ ኤርተ። 30 ታኒ ህንተዉ ቱማ ኦዳይስ፤ ሀ ኡባባይ ሀናና ጋካናዉ ሀይሳን ደእያ አሳ ኡባይ ሀይቀና። 31 ሳሎይነ ሳእ አꬋና፥ ሽን ታ ቃላይ አና።
የሱሲ ያና ጋላሳይ ኤረተና
(ማቶ 24:36-44)
32 “ሽን ሄ ጋላሳነ ሄ ሳትያ አዋ ፃላላፐ አትሽን፥ ሀር አቶሽን ሳሎን ደእያ ኪታንቾታ ግድን ዎይኮ ናኣ ግድን ኦንካ ኤረይ ባዋ። ማቶ 24:36. 33 ሄ ዎደይ አዉደ ግዳኔኮ፥ ህንተ ኤሮና ግሾ፥ ናገትተነ ምንተ። 34 ታ ዩሳይ፥ ባ ኬꬃ አግድ፥ ኦገ ብያ አሳ መላ። ኡራይ ባ አይለታስ ሁጰን ሁጰን ኦሶ እምድ ኤንታ ባ ኦሱዋ ቦላ አዋ ኦꬅስ፤ ቃስ ናገይስ ምንꬅድ ናጋና መላ ኪትስ። ሉቃ 12:36.
35 “ሄሳ ግሾ፥ ምንተ። አይስ ጊኮ፥ ጎዳይ ኦማርስ ግድን ዎይኮ ግድ ብላሄ ግድን ዎይኮ ኩቶ ዋሶ ግድን ዎይኮ ዎንት ማ ግድን አዉደ ያነኮ፥ ህንተ ኤረከታ። 36 ህንተ አኬኮና እ ይድ ህንተ ꬍስክድ ደእሽን ደሞና መላ ምንተ። 37 ታኒ ህንተዉ ኦደይሳ አሳ ኡባስ ኦዳይስ፤ ምንተ” ያግስ።