1 ጎዳይ ሙሰነ አሮና ሀይሳዳ ያግስ፤ 2 “ሌወ ኮቻታፐ ቃሃታ ኮቻታነ ኤንታ ሶ አሳ አሳ ሻካዳ ታይባ። 3 ላይꬅ 30-50 ጋክዳ አደ ኡባ ጌሻ ዱንካንያን ኦꬃናዉ ዳንዳኤይሳታ ታይባ። 4 ቃሃታ ኮቻት ጌሻ ዱንካንያን ኦꬃና ኦሶይ ዱንካንያን ጎኤትያ ጌሻ ሚሸታ አዋተꬃን ናጎ።

5 “አሳይ ጉታፐ ባናዉ ደንድያ ዎደ አሮንነ እያ አደ ናይት ጌሻ ዱንካንያ ግዶ ገልድ፥ ጫቆ ታቦትያ ስንꬃን ደእያ ማጋራጁዋ ዎꬍስድ ሄ ጫቆ ታቦትያ እያራ ፃፆ። 6 ሄ ካማ ቦላ ሊቆ ጋልባ ካሞ፤ እያ ቦላ ጉጅድ ካሎሰ ጫርቀ ካሞ፤ ቶክያ ካሶታ ሳጋዮታን አꬆ።

7 “ጎዳስ ሺቅያ ኡይꬃ ዎꬅያ ፃርጴዛ ቦላ ካሎሰ ጫርቀ ካሞ። ፃርጴዛ ቦላ ሳነታ፥ ጭልፓታ፥ ፁአታነ ዎይነ ኡሻ ያርሹዋ ዱቅያ ኦቶታ ዎꬆና። ኡይꬃይ ኡባ ዎደ ፃርጴዛ ቦላ ደኦ። 8 ሄ ኡባ ቦላ ዞኦ ጫርቀ ካምድ እያ ቦላ ቃስ ሊቆ ጋልባ ካሞ፤ ሄሳፈ ካልድ ቶክያ ካሶታ ሳጋዮታን አꬆ።

9 “ካሎሰ ጫርቀ ኤክድ ፆምፐ ዎꬅያ ኮጫ፥ እያ ፆምፐታራ፥ እያ ቃጰታራ፥ ብዶ ከስያ ከረታራነ ዛይተ ትግያ ፃሮታራ ኡባ ካሞ። 10 ያትድ እያ ሚሸታ ኡባ ሊቆ ጋልባን ካምድ ቶክያ አርሳ ቦላ ዎꬆና።

11 “ካልድ ዎርቃ ያርሾ ሳፅንያ ካሎሰ ጫርቀን ካሞ፤ ቃስ እያ ቦላራ ሊቆ ጋልባ የጎ። ያትድ ቶክያ ካሶታ ሳጋዮታን አꬆ። 12 ሄሳዳካ፥ ጌሻ ዱንካንያ ግዶን ጎኤትያ ሚሸታ ኡባ ካሎሰ ጫርቀን ፃፆ፤ እያ ቦላ ሊቆ ጋልባ የግድ፥ ቶክያ አልጋ ቦላ ዎꬆ።

13 “ናሰ ያርሾ በሳፈ ብዱዋ ፕትድ እያ ቦላ ኦቻ ቴራ ዳንያ ጫርቀ ካሞ። 14 ያርሾ በሳን ጎኤትያ ሚሸታ ኡባ፤ ታማ ጮጨታ፥ አሾ ቃጰታ፥ አካፋታነ ሃꬃ ከረታ እያ ቦላ ዎꬅድ፥ ሊቆ ጋልባ ካሞ። ያትድ ቶክያ ካሶታ ሳጋዮታን አꬆ። 15 አሮንነ እያ አደ ናይት፥ ጌሻባታነ እያን ጎኤትያ ጌሻ ሚሸታ ኡባ ካምዳፐ ጉየ እስራኤለ አሳይ ጉታፐ ደንድያ ዎደ ቃሃታ ኮቻይ ይድ ቶኮ። ሽን ኤንቲ ሀይቆና መላ ጌሻ ሚሸታ ቦቾፎ። ጌሻ ዱንካነይ በሳፈ ደንድያ ዎደ ቃሃታ ኮቻስ ደእያ አዋተꬃይ ሀይሳ።

16 “ካህንያ አሮና ናአይ አላዛር ፆምፐ ዛይትያ፥ ሳውያ እፃንያ፥ ያርሾ ካꬃነ ትዮ ዛይትያ፥ ሄሳዳካ ጌሻ ዱንካንያን ደእያ ዱማ ዱማ ጌሻ ሚሸታ ኡባ ቦላ አዋተꬅ ደኤስ” ያግስ።

17 ጎዳይ ሙሰኮነ አሮናኮ፥ 18 “ቃሃታ ኮቻይ ሌወ ኮቻ ግዶፈ ሀይቅድ ꬋያና መላ ኦꬆፍተ። 19 ኡባፈ ጌሻ ሚሽያኮ ሺቅድ ሀይቆና መላ አሮንነ እያ አደ ናይት ጌሻ ዱንካንያ ግዶ ገልድ፥ ቆሃታ ኮቻይ ሁጰን ሁጰን ኦꬃና ኦሱዋነ ቶካና ቶሁዋ ሻክድ በሶ። 20 ቃሃታ ኮቻይ ሀይቆናዳ ጌሻ ሚሸታ በአናዉ ጉꬃ ዎደስካ ዱንካንያ ግዶ ገሎፖ” ያግስ።

21 ጎዳይ ሙሰኮ፥ 22 “ሌወ ኮቻፈ ገድሶና ኮቻነ ኤንታ ሶ አሳ አሳ ሻካዳ ታይባ። 23 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይባ። 24 ገድሶና ኮቻት ኦꬃና ኦሶይ ሀይሳፈ ካልድ ደኤይሳ፤ 25 ኤንቲ ጌሻ ዱንካንያ ጋꬃ ካማ፥ ካረ ካማ፥ ቦላራ የገትያ ሊቆ ዶአ ጋልባ፥ ገልያ ዉላ ቦላ ካቀትያ ማጋራጁዋ ቶኮ። 26 ሄሳዳካ ጌሻ ዱንካንያነ ያርሾ በሳ ዩሹዋን ደእያ ዳባባ ማጋራጆታ፥ ዳባባ ገልያ ዉላ ቦላ ደእያ ገሸታ፥ ዎዶሮታነ እያዉ ጎኤትያ ሚሸታ ኡባ ቶኮ። ገድሶና ኮቻይ ሚሸታን ኦꬃናዉ በሲያ ኦሶ ኡባ ኦꬆ። 27 ቶሆ ግድን፥ ሀራ ኦሶ ግድን፥ ኤንቲ ኦꬅያ ኦሶ ኡባ አሮንነ እያ አደ ናይት ኤንታ ካል ኦስሶ። ኤንቲ ቶካናዉ በሲያባታ ኡባ ነ አዋተꬃን ኤንታዉ ግሻ። 28 ጌሻ ዱንካንያ ግዶን ገድሶና ኮቻይ ኦꬃና ኦሶይ ሀይሳ። ኤንታ ኦሱዋ ካህንያ አሮና ናአይ እታማር ካልድ ኦስሶ።

29 “ሌወ ኮቻፈ መራራ ኮቻነ ኤንታ ሶ አሳ አሳ ሻካዳ ታይባ። 30 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይባ።

31 “ኤንቲ ዱንካንያ ቱቀታ፥ ልዮታ፥ ቱሳታ፥ ዱንካንያ ገዳታ፥ 32 ዱንካንያ ዩሾን ዳባባን ኤቅያ ቱሳታ፥ ሄ ቱሳታ ገዳታ፥ ꬍሸታ፥ ዎዶሮታነ እያን ኮሽያ ሚሸታ ኡባ ቶኮ። እሶይ እሶይ ቶካናዉ በሲያ ሚሽያ እያ ሱንꬃን ሻካዳ ግሻ። 33 ጌሻ ዱንካንያ ግዶን መራራ ኮቻይ ኦꬃና ኦሶይ ሀይሳ። ኤንቲ ኦꬃና ኦሶ ኡባ ካህንያ አሮና ናኣ እታማር አዋተꬃን ካልድ ኦስሶ” ያግስ።

34 ሙሰይ፥ አሮንነ እስራኤለ ሀላቃት ቃሃታ ኮቻ ኤንታ ሶ አሳን አሳን ሻክድ ታይብዶሶና። 35 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይብዶሶና። 36 ኤንታ ታይቦይ 2,750. 37 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ ቃሃታ ኮቻት ሀይሳታ።

38 ገድሶና ኮቻት ባንታ ሶ አሳን አሳን ሻከትድ ታይበትዶሶና። 39 ላይꬅ 30-50 ጋክዳ አደት ኡባ ጌሻ ዱንካንያ ግዶን ኦꬃናዉ ዳንዳኤይሳታ 40 ታይቦይ 2,630. 41 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ ገድሶና ኮቻት ሀይሳታ።

42 መራራ ኮቻት ባንታ ሶ አሳን አሳን ሻከትድ ታይበትዶሶና። 43 ላይꬅ 30-50 ጋክዳ አደት ኡባይ፥ ጌሻ ዱንካንያ ግዶን ኦꬃናዉ ዳንዳኤይሳታ 44 ታይቦይ 3,200. 45 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ መራራ ኮቻት ሀይሳታ።

46 ሙሰይ፥ አሮንነ እስራኤለ ሀላቃት ሌወታ ኡባ ኤንታ ኮቻንነ ኤንታ ሶ አሳን አሳን ሻክድ ታይባ። 47 ላይꬅ 30-50 ጋክዳ አደት ኡባይ፥ ጌሻ ዱንካንያ ግዶን ኦꬃናዉኑነ ሚሸታ ቶካናዉ ዳንዳእያ፥ 48 ሌወታ ታይቦይ 8,580. 49 ጎዳይ ሙሰ ኪትዳይሳዳ፥ ኤንቲ ሁጰን ሁጰን ታይበትዶሶና። ሄሳዳካ ጎዳይ ሙሰ ኪትዳይሳዳ ኤንቲ ኦꬃና ኦሶይነ ቶካና ቶሆይ እመትስ።