1 ጎዳይ ሙሰኮ፥ 2 “እስራኤለ አሳ ሀይሳዳ ጋዳ ኪታ፤ አደ ግድን ዎይኮ ማጫ ባና ጎዳስ ዱማይድ ናዝራወ ግዳናዉ ቃንግኮ፥ 3 ዎይነ ዎይኮ ሀራ ማꬆይያ ኡሽ ኡዮፖ። ጫላባነ ማꬆያባ ኡዮፖ፤ ዎይነ ቴራ፥ ትያነ መላ ሞፖ። 4 እ ባና ጎዳስ ዱማይዳ ዎደ ኡባን፥ ዎይነ አይፍያ ግድን ፖቁዋ ግድን ዎይኮ ኮቻ ግድን ሞፖ።

5 “እ ባና ጎዳስ ዱማይዳ ዎደ ኡባን፥ ባ ሁጵያ ሜደቶፎ ዎይኮ ቃንፀቶፎ። እ ባ ሁጰ ብናና አዱስድ ድቾ። እ ባና ጎዳስ ዱማይዳ ዎደይ ፖለታና ጋካናዉ ጌሽ ግዳናዉ ኮሼስ። 6 እ ባና ጎዳስ ዱማይዳ ዎደን ኡባን አሀኮ ሺቆፖ። 7 እ ባና ዱማይዳይሳ ኤርሰይ እያ ሁጵያ ግድያ ግሾ፥ እያ አዋይ ዎይኮ እያ አይያ ዎይኮ እያ እሻይ ዎይኮ እያ ምችያ ሀይቅኮ ኤንታ አሀ ቦችድ ባና ቱንሶፖ። 8 እ ባና ጎዳስ ዱማይዳ ዎደ ኡባን ጎዳስ ጌሽ።

9 “አስ እያ ማታን ቆፖና ሀይቅኮ፥ ጎዳስ ጌሽ ግድዳ ባ ሁጵያ ቱንስኮ ላፑን ጋላስ ጋምእድ ባ ሁጵያ ሜደቶ። 10 ሆስፑንꬃ ጋላሳን ናምኡ ሆለታ ዎይኮ ናምኡ ኩራቾታ ጌሻ ዱንካንያ ፐንገን ደእያ ካህንያስ ኤሆ። 11 ናዝራወይ አሀ ቦችድ ቱንዳ ግሾ ናጋራፐ እያ ጌሻናዉ ካህነይ ሆለታፐ እሱዋ ናጋራ ያርሾ፥ ሀንኩዋ ቃስ ፁሳ ያርሾ ኦꬅድ ያርሾ። ሄ ጋላስ እ ባ ሁጵያ ዎጋዳ ዛሪድ ጎዳስ ጌሾ፤ 12 እ ባና ዛሪድ ጎዳስ ዱማዮ። ያትድ እስ ላይꬃ ማራዘ ናቆ ያርሾ ኦꬅድ ያርሾ። እ ጎዳስ ዱማይዳ ሁጰይ ቱንዳ ግሾ፥ ካሰ እ ባና ጎዳስ ዱማይድ ደእዳ ዎደይ ታይበተና።

13 “እስ ናዝራወይ ባ ቃንገꬃ ዎድያ ኦንግዳ ዎደ ፖላና ዎጋይ ሀይሳ፤ ጌሻ ዱንካንያ ፐንገ ብድ፤ 14 ቦረይ ባይና እስ ላይꬃ ዶርሳ ኡርገ ፁሳ ያርሾስ፥ እስ ላይꬃ ኡዞ ዶርስ ናጋራ ያርሾስ፥ እስ ማራዘ እስፈተꬃ ያርሾስ ሄ በሳ ኤሆ። 15 ቃስ ካꬃ ያርሾነ ኡሻ ያርሾ ኤንታራ እስፈ ያርሻናዉ ኤሆ። ሄ ካꬃ ያርሾይ እርሾይ ገልቦና ሎኦ ꬊለ ሻማሆ ዛይተራ ኡከትዳ ኦርደ ኡይꬅነ ሻማሆ ዛይተን ትየትዳ ሌኦ ጋይታን ኤሆ።

16 “ካህነይ ሄ ኡባ ናጋራ ያርሾነ ፁሳ ያርሾ ኦꬅድ ጎዳስ ያርሾ። 17 ካህነይ ማራዝያ ጋይታን ደእያ ኡይꬃራ ጎዳስ እስፈተꬃ ያርሾ ኦꬅድ ያርሾ፤ ካልድ ካꬃ ያርሹዋነ ኡሻ ያርሹዋ ያርሾ። 18 ናዝራወይ ጎዳስ ዱማይዳ ባ ሁጵያ ጌሻ ዱንካንያ ፐንገን ሜደትድ፥ ብናና እስፈተꬃ ያርሾይ ኤፅያ ታማን የጎ።

19 “ናዝራወይ ባ ሁጵያ ሜደትዳፐ ጉየ፥ ካህነይ ዶይሰትዳ ማራዝያ ገዳ አሹዋ ጋይታን ደእያ ኦርደ ኡይꬃፈነ ሌኦ ኡይꬃፈ ኤክድ፥ ናዝራውያ ኩሸን ዎꬆ። 20 ያትድ ካህነይ ሄ ኡባ ዩሾ ያርሾ ኦꬅድ፥ ጎዳስ ያርሾ። ሄ ኡባይ ካህንያ ግሾ ግድያ አንጋሱዋራነ ገዳራ ካህንያስ ጌሻ ያርሾ ግዴስ። ሄሳፈ ጎዳስ ናዝራወይ ዎይነ ኡሻ ኡዮ። 21 ህዛ ጎዳስ ባና ዱማይዳ ናዝራወይ ኦꬃና መላ እመትዳ ዎጋይ ሀይሳ። ሽን ናዝራወይ ያርሻናዉ ኮሽያ ያርሾታፐ አꬅድ እማናዉ ቃንግዳባ ግድኮ፥ ባ ቃንገꬃ ጋꬃናዉ ኮሼስ” ያግስ።

22 ጎዳይ ሙሰኮ፥ 23 “አሮንነ እያ አደ ናይት እስራኤለ አሳ አንጅያ ዎደ ሀይሳዳ ያግድ አንጅተ ያጋ፤

27 “ኤንቲ እስራኤለ አሳ ታ ሱንꬃን አንጅያ ዎደ ታ ኤንታ አንጃና” ያግስ።