1 ጎዳይ ሙሰኮ፥ 2 “ታኒ እስራኤለታስ እማና ካናነ ቢታ ዎቻና መላ ታማነ ናምኡ እስራኤለ ኮቻፈ እስ እስ አስ ሀላቃ ኦꬃዳ ኪታ” ያግስ።

3 ያትን ሙሰይ ጎዳይ ኪትዳይሳዳ ፓራና መላ ቢታፈ እስራኤለ ኮቻፈ ታማነ ናምኡ ሀላቃታ ኪትስ። 4 ኤንታ ሱንꬃይ ሀይሳፈ ካልድ ፃፈትዳይሳታ።

17 ሙሰይ ኤንታ፥ “ነገበ መላ ቢታ ካንꬅድ ፑደ ደረይ ዳርያ ቢታ ከይተ። 18 ቢታይ አይ መላ ቢታኮ፥ አሳይ አይ መላ ምኖኮነ ታይቦን ጉኮ ዳሮኮ በእተ። 19 ኤንቲ ደእያ ቢታይ ሎኦኮ ኢተኮ፥ ኤንታ ካታማት ድረትዳኮነ መላ ደእያኮ፥ 20 ቢታይ አራደኮ ላደኮ፥ ቢታይ ዎራን ካመትዳኮነ ቁኤኮ በእተ። ምንተ፤ ሄ ቢታን ደእያ ካꬃ አይፍያፐ ኤኮና ዮፕተ” ያግስ። ሄ ዎደይ ዎይነይ ቴርድ ማፀትያ ዎደ።

21 ኤንቲ ከይድ ሲና መላ ቢታፈ ዶምድ፥ ለቦ-ሀማታ ማታን ደእያ ረሆባ ጋካናዉ ደእያ ቢታ ዎችዶሶና። 22 ነገበ መላ ቢታ ካንꬅድ፥ ከብሮና ጋክዶሶና። ሄ በሳን አክማና፥ ሰሳያነ ታልማያ ጌተትያ ኤናቃ ኮቻት ደኦሶና። ከብሮን ግብፀን ደእያ ፆኣነ ካታማፐ ላፑን ላይꬅ ኮይሮትድ ኬፀትስ።

23 ያራ ካንꬅድ፥ ኤሽኮላ ዛንጋራ ብድ ጋክያ ዎደ ቴራ ዎይነ ታሽያራ ቃንፅዶሶና። ሄ ታሸይ ዴፆ ግድያ ግሾ ናምኡ አስ ካሶ አꬅድ ቶክዶሶና። እያ ቦላ ጉጅድ ኦሮማነነ ባላሰ ምꬃ አይፈ ኤክድ ይዶሶና። 24 እስራኤለ አሳይ ሄ በሳፈ ዎይነ ታሽያ ቃንፅዳ ግሾ ሄ በሳ ኤሽኮላ ዛንጋራ ግድ ፄግዶሶና።

25 ኤንቲ ሄ ቢታ ኦይታሙ ጋላስ ዎችድ ጉየ ስምዶሶና። 26 ፓራና መላ ቢታን ቃደሳን ደእያ ሙሰኮ፥ አሮናኮነ እስራኤለ ማባራ ኡባኮ ይዶሶና። ኤንቲ በእዳባ አሳ ኡባስ ኦድዶሶና፤ ሄ ቢታፈ ኤክድ ይዳ አይፍያካ ኤንታ በስዶሶና።

27 ኤንቲ ሙሰኮ፥ “ኔኒ ኑና የድዳ ቢታ ብዳ፤ ሄ ቢታን ማꬅነ ኤስ ጎጌስ፤ ሄ ቢታ አይፍያካ ሀይሳ በአ። 28 ሽን ሄ ቢታን ደእያ አሳይ ዎልቃማ፤ ኤንታ ካታማትካ ግምበ ድርሳን ድረትዳይሳታነ ግታ። ኑኒ ኡባፈ አꬅድ ኤናቃ ኮቻታ ያን በእዳ። 29 አማለቃት ነገበ መላ ቢታን፤ ህተትነ፥ ያቡሰት ደረይ ዳርያ አሞረታ ቢታን፤ ቃስ ካናነት መደትራነ አባ ዶናንነ ዮርዳኖሰ ሻፋ ጋፃን ደኦሶና” ያግዶሶና።

30 ያትን ካለብ አሳ ሙሰ ስንꬃን ስእ ኦꬅድ፥ “ኑኒ ፆናናዉ ዳንዳእያ ግሾ፥ ሀእ ከይድ ሄ ቢታ የግስድ አነ ኦይኮስ” ያግስ።

31 ሽን ካለባራ ብዳ አሳት፥ “ሄ ቢታ አሳይ ኑፐ አꬍድ ምንያ ግሾ፥ ኑኒ ኤንታ ፆናናዉ ዳንዳኦኮ” ያግዶሶና። 32 ኤንቲ ዩይድ ዎችዳ ቢታባ እስራኤለ አሳስ ሀይሳዳ ያግድ ኢታ ኦዳ ኦድዶሶና። “ኑኒ ዎችዳ ቢታይ ያን ደእያ አሳካ ምያ ቢታ፤ ያን ደእያ አሳይካ ዳሮ አዱሰ። 33 ኑኒ ያን ኤናቃ ኮቸ ግድዳ ንፍልመ አሳታ በእዳ። ኤንታ በእዳ አይፈን ኑና ፄልያ ዎደ ኑኒ ፃቆ መላ፤ ኤንትካ ኑና ሄሳዳ በኦሶና” ያግዶሶና።