1 ቦሻፐ ጉየ፥ ጎዳይ ሙሰኮነ ካህንያ አሮና ናኣ አላዛራኮ፥ 2 “ላይꬅ ላታማነ እያፐ ቦላ ግድዳ እስራኤለታ፥ ኦላናዉ ዳንዳኤይሳታ ኡባ፥ ኤንታ ኬꬃን ኬꬃን ታይብተ” ያግስ።

3 ያትን፥ ሙሰይነ ካህነይ አላዛር ዮርዳኖሰ ሻፋፐ ሄፍንꬃን፥ እያርኮ ማታን፥ ሞአበ ደንባን አሳ ሺሽድ፥ 4 “ጎዳይ ሙሰ ኪትዳይሳዳ፥ ላይꬅ ላታማነ እያፐ ቦላ አሳ ታይብዶሶና።”

ግብፀፈ ከይዳ እስራኤለ አሳይ ሀይሳታ።

5 እስራኤለ ባይራ ናኣ ሮቤላ ኮቻት ባንታ ኮቻን ኮቻን፥ ሀኖካ ኮቻ፥ ፋሉ ኮቻ፥ 6 ሄስሮና ኮቻነ ካርማ ኮቻ፤ 7 ሀይሳቲ ሮቤላ ኮቻታ፤ ኤንታ ኩመꬃ ታይቦይ 43,730. 8 ፋሉ ናአይ ኤልኣባ፤ 9 ኤልኣባ አደ ናይት ነሙኤላ፥ ዳታነነ አቤሮ። ዳታንነ አቤሮይ ማባራይ ዶርዳይሳታ፥ ሽን ኤንቲ ቆረነ እያ ካለይሳታራ ቶቢድ ጎዳ ቦላ ማካልድ ሙሰ ቦላነ አሮና ቦላ ደንድዶሶና። 10 ቢታይ ዶየትድ ኤንታ ቆረራ እስፈ ምትስ፤ ኤንታ ካልያ 250 አሳ ታም ምን ሀይቅዶሶና። ያትን፥ ሀራት ኤንታ በእድ ናገታና መላ ማላ ግድዶሶና። 11 ሽን ቆረ አደ ናይት ኡባይ ሀይቅድ ꬋይቦኮና።

12 ስሞና ዘረꬃይ ባንታ ኮቻን ኮቻን፥ ነሙኤላ ኮቻ፥ ያምና ኮቻ፥ ያክና ኮቻ፥ 13 ዛራ ኮቻነ ሳኡላ ኮቻ። 14 ሀይሳቲ ስሞና ኮቻታ፤ ኤንታ ኩመꬃ ታይቦይ 22,200.

15 ጋደ ዘረꬃይ ባንታ ኮቻ ኮቻን፥ ፅፎና ኮቻ፥ ሀግ ኮቻ፥ ሹና ኮቻ፥ 16 ኤስና ኮቻ፥ ኤራ ኮቻ፥ 17 አሮዳ ኮቻነ አርኤላ ኮቻ። 18 ሀይሳቲ ጋደ ኮቻታ፤ ኤንታ ኩመꬃ ታይቦይ 40,500.

19 ይሁዳ አደ ናይት ኤርነ ኦናን ካናነ ቢታን ሀይቅዶሶና። 20 ይሁዳ ኮቻት ባንታ ኮቻን ኮቻን፥ ሴላ ኮቻ፥ ፋረሳ ኮቻነ ዛራ ኮቻ። 21 ፋረሳ ኮቻይ ሄስሮናነ ሀሙላ። 22 ሀይሳቲ ይሁዳ ኮቻታ፤ ኤንታ ኩመꬃ ታይቦይ 76,500.

23 ይሳኮራ ዘረꬃይ ባንታ ኮቻን ኮቻን፥ ቶላ ኮቻ፥ ፑአ ኮቻ፥ 24 ያሱባ ኮቻነ ሽምሮና ኮቻ። 25 ሀይሳቲ ይሳኮራ ኮቻታ፤ ኤንታ ኩመꬃ ታይቦይ 64,300.

26 ዛብሎና ዘረꬃይ ባንታ ኮቻን ኮቻን፥ ሳረዳ ኮቻ፥ ኤሎና ኮቻነ ያህላላ ኮቻ። 27 ሀይሳቲ ዛብሎና ኮቻታ፤ ኤንታ ኩመꬃ ታይቦይ 60,500.

28 ዮሰፋ ናይታ ምናሰነ ኤፍሬማ ኮቻት ባንታ ኮቻን ኮቻን፥ 29 ምናሰይ ማክራ የልስ፥ ማክር ጋላዳ የልስ። 30 ጋላዳ ኮቻት፥ እዘራ ኮቸ፥ ከለጋ ኮቸ፥ 31 አስርኤላ ኮቸ፥ ሴከማ ኮቻ፥ 32 ሻምዳ ኮቸነ ሄፌራ ኮቸ። 33 ሄፌራ ናአይ ሰሎጳድ ማጫ ናአ ፃላላ የልስ፤ እያዉ አደ ናእ ባዋ። ሰሎጳዳ ማጫ ናይታ ሱንꬃይ ማህሎ፥ ኖኦ፥ ሆግሎ፥ ምልኮነ ትርፆ። 34 ሀይሳቲ ምናሰ ኮቻታ፤ ኤንታ ኩመꬃ ታይቦይ 52,700.

35 ኤፍሬማ ዘረꬃይ ባንታ ኮቻን ኮቻን፥ ሹቱላ ኮቻ፥ በከራ ኮቻ፥ ታሀና ኮቻታነ 36 ሹቱላ ናኣ ኤራና ኮቻታ። 37 ሀይሳቲ ኤፍሬማ ኮቻታ፤ ኤንታ ኩመꬃ ታይቦይ 32,500. ዮሰፋ ኮቻት ባንታ ኮቻን ኮቻን ሀይሳታ።

38 ብንያመ ዘረꬃይ ባንታ ኮቻን ኮቻን፥ ቤላ ኮቻ፥ አስቤላ ኮቻ፥ አክራ ኮቻ፥ 39 ሹፋማ ኮቻ፥ ሁፋማ ኮቻ፥ 40 ቤላ ናኣ አራዳ ኮቻነ ቤላ ናኣ ናማነ ኮቻ። 41 ሀይሳቲ ብንያመ ኮቻታ፤ ኤንታ ኩመꬃ ታይቦይ 45,600.

42 ዳነ ዘረꬃይ ሳማ ኮቻ። 43 ሹሃማ ኮቻ ኩመꬃ ታይቦይ 64,400.

44 አሴራ ዘረꬃይ ባንታ ኮቻን ኮቻን፥ ይምና ኮቻ፥ ይስዋ ኮቻ፥ በርአ ኮቻ፥ 45 በርአ ናአ ሄቤራ ኮቻነ በርአ ናኣ ማልክኤላ ኮቻ። 46 አሴራስ ሳራሆ ጌተትያ ማጫ ናእ ደአዉሱ። 47 ሀይሳቲ አሴራ ኮቻታ፤ ኤንታ ኩመꬃ ታይቦይ 53,400.

48 ንፍታለመ ዘረꬃይ ባንታ ኮቻን ኮቻን፥ ያህፄላ ኮቻ፥ ጉና ኮቻ፥ 49 የፀራ ኮቻነ ሽለመ ኮቻ። 50 ሀይሳቲ ንፍታለመ ኮቻታ፤ ኤንታ ኩመꬃ ታይቦይ 45,400.

51 ታይበትዳ እስራኤለ አደ አሳ ታይቦይ ኩመꬅ 601,730.

52 ጎዳይ ሙሰኮ፥ 53 “ሀ ኮቻታስ ኤንታ ሱንꬃ ሱንꬃ ታይቡዋን ቢታ ሻካዳ ላታ ኦꬃዳ ኤንታዉ እማ። 54 ታይቦን ዳረይሳታስ ዳርሳዳ ቃስ ታይቦን ጉፀይሳታስ ጉꬃዳ እማ። ኡባይካ ፃፈትዳ ባንታ ታይቡዋ ኬና ኤኮ። 55 ሽን ቢታይ ሳማን ሻከቶ፤ እስ እስ ኮቻይ ላታ ኤከይ ባ ኮቻ ሱንꬃን ግዶ። 56 እስ እስ ላታይ ታይቦን ዳሮታ ግዶንነ ታይቦን ጉꬃታ ግዶን ሳማን ሻከቴስ” ያግስ።

57 ባንታ ዘረꬃን ዘረꬃን ታይበትዳ ሌወ ኮቻት ሀይሳታ፤ ገድሶና ኮቻ፥ ቃሃታ ኮቻነ መራራ ኮቻ። 58 ሀይሳቲካ ቃስ ሌወ ኮቻታ፤ ልብና ኮቻ፥ ከብሮና ኮቻ፥ ሞሆላ ኮቻ፥ ሙሰ ኮቻነ ቆረ ኮቻ። ቃሃት አምራማ የልስ። 59 አምራማ ማቸ ሱንꬃይ ዮከቤዶ፤ እያ ግብፀን ሌወፐ የለትዳ ሌወ ናአ። እያ አሮና፥ ሙሰነ ኤንታ ምችዉ ማይራሞ የላሱ። 60 አሮናስ ናዳበ፥ አብዮዳ፥ አላዛራነ እታማራ ጌተትያ ኦይዱ ናይት ደኦሶና። 61 ሽን ናዳበይነ አብዮድ ጎዳ ስንꬃን ጌሽ ግዶና ታማን ያርሾ ያርሽዳ ግሾ ቦሻን ሀይቅዶሶና። 62 ላይꬅ እስ አጌናነ እያፐ ቦላ ግድዳ ሌወ አደ ናይታ ታይቦይ ላታማነ ሄꬑ ሙኩላ። እስራኤለ አሳ ግዶን ኤንታዉ ላታ ቢት እመትቦና ግሾ ኤንቲ እስራኤለታራ ታይበትቦኮና።

63 ዮርዳኖሰ ሻፋፐ ሄፍንꬃን፥ እያርኮ ማታን፥ ሞአበ ደንባን ሙሰይነ ካህነይ አላዛር እስራኤለ አሳ ታይብዳ ዎደ ታይበትዳ አሳይ ሀይሳ። 64 ሙሰይነ ካህነይ አሮን ኮይሮ ሲና መላ ቢታን እስራኤለ ታይብዳ ዎደ ታይበትዳ አሳፐ መፅ እስ አስካ አትቤና። 65 ጎዳይ ሀ እስራኤለታባ፥ “ኤንቲ ኡባይ መላ ቢታን ሀይቃና” ያግድ ኦድዳ ግሾ፥ ዮፎና ናኣ ካለባፐነ ናወ ናኣ እያሱፐ አትሽን፥ ሀር እስ አስካ አትቤና።