1 ዮሰፋ ኮቻፈ፥ ምናሰ ናኣ ማክራ ናኣ ጋላዳ ኮቻ ሀላቃት ሙሰኮነ እስራኤለ ሀላቃታኮ ይድ 2 “ኑ ጎዳዉ፥ እስራኤለ አሳስ ላታ ቢታ ሳማን ሻካዳ እማና መላ ጎዳይ ነና ኪትስ፤ ቃስ ኑ እሻ ሰሎጳዳ ላታ እያ ማጫ ናይታስ እማና መላ ነና ኪትስ። 3 ኤንቲ ሀራ ኮቸ ግድዳ እስራኤለ አስ ገልኮ ኤንታ ላታይ ኑ አዋታ ላታፐ ኤከትድ ኤንታ ኤክያ ዘረꬃስ ጉዠቴስ። ሄሳ ግሾ፥ ኑስ ሳማን እመትዳ ላታይ ጉፄስ። 4 እስራኤለ አሳስ እሻታማንꬆ ላይꬃ ቦንችያ ባለይ ጋክያ ዎደ ኤንታ ላታይ ኤንታ ኤክዳ አሳ ኮቻስ ጉዠቴስ፤ ሄሳ ግድኮ ኤንታ ላታይ ኑ አዋታ ኮቻ ላታፐ ኤከታና” ያግዶሶና።

5 ሄሳ ግሾ፥ ሙሰይ ጎዳፐ ኤክዳ ኪታ እስራኤለ አሳስ ሀይሳዳ ያግድ ኦድስ፤ “ዮሰፋ ኮቻይ ግዳይስ ልከ። 6 ጎዳይ ሰሎጳዳ ማጫ ናይታባ ኪትዳይስ ሀይሳ፤ ኤንቲ ባንታዉ ዶስዳ አዝና ገላናዉ ዳንዳኦሶና፥ ሽን ኤንታ ኮቻፈ ግዳናዉ ኮሼስ። 7 እስራኤለ አሳ ላታይ እስ ኮቻፈ ሀራ ኮቻስ አꬎፎ፤ እስራኤለ አሳይ ባንታ ኮቻ ላታ ቢታ ምንꬅድ ናጎ። 8 እስራኤለ አሳ ግዶን ላታ ቢታ ኤክዳ ማጫስ ኦንካ ባ አዋ ኮቸ ግድዳ አዝና ገላናዉ ኮሼስ። ሄሳዳ ኦꬅኮ ኤንታ ኮቻ ላታይ ኤንታ ኩሸን ጋምኤስ። 9 ያትኮ፥ ላታይ እስ ኮቻፈ ሀራ ኮቻኮ አና። እስ እስ ኮቻይ ባ ላታ ቢታ ኦይክዳ መላ ዳና” ያግስ።

10 ያትን፥ ሰሎጳዳ ማጫ ናይት ጎዳይ ሙሰ ኪትዳይሳዳ ኦꬅዶሶና። 11 ሰሎጳዳ ማጫ ናይት፥ ማህሎ፥ ትርፆ፥ ሆግሎ፥ ምልኮነ ኖኦ ጌተተይሳት ባንታ አዋ እሻታ ናይታ ገልዶሶና። 12 ኤንቲ ዮሰፋ ናኣ ምናሰ ናይታ ኮቻፈ አዝና ገልዶሶና፤ ኤንታ ላታይ ኤንታ አዋ ኮቻስ ግድስ። 13 እያርኮፈ ሄፍንꬃን፥ ዮርዳኖሰ ሻፋ ማታን፥ ደእያ ሞአበ ደንባን ሙሰ ባጋራ፥ ጎዳይ እስራኤለ አሳስ ኪትዳ ህገትነ ዎጋት ሀይሳታ።