1 አብድዩይ በእዳ ቆንጨꬃ። ጎዳ ፆሳይ ኤዶመባ ሀይሳዳ ያጌስ:

ኤዶመባ ጎዳይ፥ ባ ኪትያ አድያ ቦላ ካዎተꬃታስ ኪትዳይሳ ኑኒ ስእዳ፤ “ደንድተ! ኤዶመ ኦላናዉ ቦስ” ያግስ። 2 “ሄኮ፥ ታ ነና ካዎተꬃታ ግዶን ላፋ ከሳና፤ ኔኒ ዳሮ ካትዳይሳ ግዳና። 3 ነኖ፥ ዛላ ቆጶ ግዶን ደኤይሶ፥ ነ ኬꬃ ꬎቃ ደረታ ቦላ ኬፅዳይሶ፥ ነ ዎዛናን፥ ‘ታና ሀይሳፈ ሳአን ዎꬍሳናይ ኦኔ?’ ያገይሶ፥ ነና ነ ዎዛና ኦቶሮይ ጭምስ። 4 ነ አርጋንꬃዳ ፑደ ሃካዳ ፕራꬍኮካ፥ ነ ኬꬃ ፆልንቶታ ግዶን ኬፅኮካ፥ ታ ነና ያፐ ዱገ ዎꬍሳና” ያጌስ ፆሳይ።

5 “ካይሶይ ዎይኮ ባንቅያ አስ ቃማ ዪኮ፥ ባንታዉ ግደይሳ መላ ፃላላ ካይሶቶኮናዬ? ዎይነ ማፀይሳት ማፅሸ፥ ፖሽለ አሾኮናዬ? ሽን ነ ሞርከት ነና ፖሎ ꬋይሳና። 6 አቤት ኤሳዌይ ዋንድ ቦንቀታንዴ? ቆሳን ደእያ እያ ሻሎይ ዋንድ ኤከታንዴ? 7 ኔራ ጫቅዳይሳት ኡባይ ነና ነ ቢታፈ ጎዳና፤ ቃስ ነ አማነትዳ ላገት ጭምድ ነና ፆናና። ነ ካꬃ ምዳይሳት ነ ኦገን ግተ የጋና፥ ሽን ኔኒ ሄሳ አኬካካ” ያጌስ።

8 “ሄ ጋላስ ታኒ ኤዶመፐ ጭንጫታነ ኤሳዌ ዙማፐ አኬካ ꬋይሳና። 9 ህንተኖ፥ ተማና አሳቶ፥ ህንተ ኦላንቾት ዳጋማና፤ ኤሳዌ ዙማ ቦላ ደእያ አሳ ኡባይ ጎይረታና” ያጌስ ጎዳይ።

10 ነ እሻ ያይቆባ ቦላ ነ ኦꬅዳ ኢታባ ግሾ፥ ነ ዬላ ማአና፤ ነ መርናዉ ꬋያና። 11 እማꬃትነ አላጋት እያ ሻሉዋ ቦንቅያ ጋላስ ኔኒ ጋፃ ከያዳ ኤቃ ፄላዳሳ። ቃስ እያ ፐንገራ ገልድ፥ የሩሳላመ ካታማ ቦላ ሳማ የግያ ዎደ ኔኒ ኤንታፈ እሱዋ መላ ግዳዳሳ። 12 ኔኒ ነ እሻይ መቶትያ ጋላስ እያ መቱዋን ኡፋይታናዉ በሰናሽን፤ ይሁዳ አሳ ቦላ ዋየይ ጋክያ ጋላስ ሀሹ ጋናዉ በሰናሽን። ኤንታ ኡንአ ጋላሳን ኦቶሮን ኦደታናዉ በሰናሽን! 13 ኔኒ ኤንታ መቱዋ ጋላስ ታ አሳይ ደእያ ካታማ ገላናዉ፥ ኤንታ ዋያን ኔኒ ኡፋይታናዉነ ኤንታ መቱዋ ጋላስ ኤንታ ሻሉዋ ቦንቃናዉ በሰናሽን! 14 ባቃተይሳታ ዎꬋናዉ ኔኒ ዳጋላ ኦገን ናጋናዉነ አትዳይሳታ ኤንታ ኡንኣ ጋላስ ሞርከታስ አꬃዳ እማናዉ በሰናሽን!

15 ጎዳ ፕርዳ ጋላሳይ ካዎተꬃታ ኡባ ቦላ ማትስ። ነኖ ኤዶመ፥ ኔኒ ሀራታ ቦላ ኦꬅዳባይ ነ ቦላ ኦሰታና፤ ነ ኦሶይ ነ ቦላ ስማና። 16 ታ ጌሻ ዙማ ቦላ ነ ኡይዳይሳ መላ ካዎተꬃ ኡባይ ቃንፆና ኡያና፤ ጉጅድካ ኡያና፤ ኤንቲ ካሰ ሀን ኤሮናባ ሀናና።

17 “ሽን ፅዮነ ዙማን ከስ ኤክዳይሳት ዳና፤ ፅዮነይ ጌሽ ግዳና፤ ያይቆባ ኮቻይ ባንታ ቢታ ዛር ላታና። 18 ያይቆባ ኮቻይ ታማ ግዳና፤ ዮሰፋ ኮቻይ ላጮ ግዳና፤ ኤሳዌ ኮቻይ ቡረ ግዳና። ታም ቡረ መይሳዳ፥ ያይቆባ ዘረꬃይነ ዮሰፋ ኮቻይ ኤሳዌ ኮቻ ምድ ፖሎ ꬋይሳና” ያጌስ ጎዳይ።

19 ነገበ መላ ቢታን ደእያ አሳይ ኤሳዌ ዙማ ላታና፤ ጋꬋ ቢታን ደእያ አሳይ ፍልስፄመ ቢታ፥ ኤፍሬማ ቢታነ ሳማረ ቢታ ላታና። ቃስ ብንያመ ኮቻይ ጋላዳ ቢታ ላታና። 20 ድኤተꬃፈ ስምዳ እስራኤለ አሳይ፥ ካናነፐ ብድ ስራፍታ ጋካናዉ ደእያ ቢታ ላታና። የሩሳላመፐ ደኤትድ፥ ሳፋራዳ ጌተትያ በሳን ደእያ አሳት ነገበ ካታማታ ላታና። 21 አሸይሳት ኤሳዌ አሳ ሃራናዉ ፅዮነ ዙማ ቦላ ከያና፤ ካዎተꬃይ ጎዳባ ግዳና።