ሌምሶ ማፃፋ
ጋꬃ ቆፋ
ሌምሶ ማፃፋይ ሀይሰነ ሌምሶ ኦዳን ጊግዳ፥ ዱሳ ዎጋነ አማኖ ትምርተ። ሀ ማፃፋፐ ዳሮ ባጋይ ጋላስ ጋላስ አሰ ጋክያ ሀኖታታ ኦዴስ። ማፃፋይ ኮይሮ ዶምሸ፥ “ፆሳስ ያሻተꬅ ጭንጫተꬃስ ኮይሮ” (1:7) ያግስ። ሀ ማፃፋይ ታማርሰይ፥ አማኖ ዎጋን አስ ኦꬃናባ ፃላላ ግዶናሽን፥ አስ ባ ጋላሳ ዱሳን ሀናናዉ በሲያ ሎኦ ካንዱዋነ ኦꬃናዉ በሲያ ሎኦ ኦሶ ጉጅድ ታማርሴስ።
ሌምሶ ማፃፋታፐ ባጋይ አሳ ቡዞ ደኦባ ኦዴስ፤ ባጋይ እስ ሶ አሳ ዱሳባ ኦዴስ፤ ባጋይ ኦሶባነ ዛልኤባ ኦዴስ። ሌምሶ ማፃፋይ ፆሰ ቦንችያ አስ “ጭንጫ” ግድ፥ ፆሰ ኤሮና አስ “ኤያ” ጌስ። ሌምሶ ማፃፋይ አሽከተꬃባ፥ ጭንጫተꬃባ፥ ዳንዳአባ ቃባነ አማነተꬃባ ዳሮ ትምርተ ታማርሴስ።
ማፃፋ አይፈ ቆፋታ
ሌምሶታ ጎአ (1:1—9:18)
ሶሎሞነ ሌምሶታ (10:1—24:34)
ዱማ ዱማ ሌምሶታ (25:1—29:27)
አጉራ ሌምሶታ (30:1-33)
ልሙኤላ አየ ትምርተ (31:1-31)
1
ሌምሶ ጎአ
1 ሀይሳቲ እስራኤለ ካዋ ዳዊታ ናኣ ሶሎሞነ ሌምሶታ። 2 ሌምሶት አሳይ ጭንጫተꬅ፥ ሴራነ ኤራ ሃሳያ አኬካናዉ ማዶሶና። 3 ኤንቲ ጭንጫተꬅ፥ ፅሎተꬅ፥ ሱረ ፕርድነ ሱረ ዎዛን ዳና መላ ታማርሶሶና። 4 ኤያታስ አኬካ እሜስ፤ ናአተꬃታስ ኤራተꬅነ ካሃማተꬅ እሜስ። 5 ጭንጫት ሀ ሌምሶታ ስእድ፥ ኤራ ጉጆሶና፤ አኬካንቾት ሎኦ ዞረ ኤኮሶና። 6 ሄሳን ሌምሶታነ ኤንታ ብርሸꬃ፥ ጭንጫተꬃ ኦዳነ ኤንታ ቃንእሸታ አኬካናዉ ዳንዳኤቴስ።
7 ጎዳስ ያሽ ጭንጫተꬃስ ዶመꬅ፤ ሽን ኤያት ጭንጫተꬅነ ሴራ ካꬎኦሶና።
ጭንጫተꬅ ነዉ ሚሸ ኦꬃ
8 ታ ናአዉ፥ ነ አዋ ዞርያ ስአ፤
ነ አየ ትምርትያ ካꬎፓ።
9 ሄስ ነ ሁጵያስ ቦንቾ ካላቻ፤
ነ ቆꬍያስ ጎዝዳ ግዳና።
10 ታ ናአዉ፥ ነና ናጋራንቾት
ጭምኮ ኤሮ ጎፓ።
11 ኤንቲ፥ “ኑራ የꬋ፤
አሰ ዎꬋናዉ ሆክድ ናጎስ፤
ፅሎታ ዎꬋናዉ ቆሰቶስ።
12 ስኦለይ ምተይሳዳ ኑካ ኤንታ ፓፃ ምቶስ፤
ኑ ኤንታ ኦላን የገትያ አሳዳ ኦꬃና።
13 ኑኒ አልኦ ሚሸ ኡባ ደማና፤
ኑ ኬꬃ ቦንቀ ሚሸን ኩንꬃና።
14 ኑራ ላገታ፤
ኑ ደምዳባ እስፈ ሻከታና” ያጋና።
15 ታ ናአዉ፥ ኤንታራ ሄመቶፋ፤
ኤንታ ኦግያራ ባናዉ ነ ቶሁዋ ደንꬆፋ።
16 ኤንቲ ኢታባ ኦꬃናዉ ዎፆሶና፤
አሳ ሱꬅ ጉሳናዉ ያ ሃ ጎሶና።
17 ካፎይ ፄልሽን፥
እያ ኦይካናዉ ግተ የገꬅ ማደና።
18 ሽን ኤንቲ ባንታ ሱꬅ ጉሳናዉ ሆኮሶና፤
ባንታ ሸምፑዋ ዎꬋናዉ ቆሰቶሶና።
19 ገነን ጎአ ደምያ አሳ ዉርሰꬅ ሄሳ መላ፤
ኤንቲ ሺሽዳ ሻሎይ ኤንታ ሸምፑዋ ኤኬስ።
ጭንጫተꬅ ፄጌስ
20 ጭንጫተꬅ ዳጋላ ቦላ ኤቃዳ ፄጋዉሱ፤
ዳባባን ባ ቃላ ꬎቁ ኦꬃዳ ስሳዉሱ። 21 ጭንጫተꬅ አስ ሺቅያ በሳን ኤቃዳ ፄጋዉሱ፤
ካታማ ገልያ ፐንገን ኤቃዳ ሀይሳዳ ያጋዉሱ።
22 “ህንተኖ፥ አኬክ ፓጭዳይሳቶ፥
ህንተ አዉደ ጋካናዉ ኤያ ግድድ ዳኔ?
ቀልቅሰይሳቶ፥ አዉደ ጋካናዉ ኡፋይታኔ?
ኤያቶ፥ አዉደ ጋካናዉ ኤራተꬅ እፃኔ?
23 ታ ሴራ ህንተ ስእዳባ ግድያኮ፥
ታኒ ታ ኤራ ህንተ ቦላ ጉሳና፤
ታ ቃላካ ህንተና ታማርሳና።
24 ሽን ታ ፄግዳ ዎደ ህንተ ኮዮና እፅዳ ግሾ፤
ታኒ ኩሸ ምጭን ኦንካ አኬክቦና ግሾ፤
25 ታ ዞርያ ህንተ ካꬍዳ ግሾ፤
ታ ሴራካ ኤክቦና ግሾ፤
26 ህንተና መቶይ ጋክያ ዎደ ታ ሚጫና፤
ህንተ ዳጋማን ኮኮርያ ዎደ ታ ቀልቅሳና። 27 ጋዶይ ኡሾዳ ህንተ ቦላ ያ ዎደ፥
መቶይ ጎተዳ ህንተ ቦላ ኤቅያ ዎደ፥
ኡንእነ ዋየይ ህንተ ቦላ ጋክያ ዎደ፥
ታኒ ህንተና ቀልቅሳና።
28 “ሄ ዎደ ኤንቲ ታና ፄጋና፤ ሽን ታ ኮይከ፤
ኤንቲ ታና ምንꬅድ ኮያና፤ ሽን ደሞኮና። 29 ኤንቲ ኤራተꬅ እፅዳ ግሾ፤
ጎዳ ያሽ ዶርቦና ግሾ፥ 30 ታ ዞርያ ኤክቦና ግሾ፤
ታ ሴራ ካꬍዳ ግሾ፤ 31 ኤንቲ ባንታ ኦሱዋ አይፍያ ማና፤
ባንታ ቆፋ አይፍያ ካላና። 32 አኬክ ፓጭዳይሳታ ጭንጫተꬃፈ ሃከይስ ዎꬌስ፤
ኤያታ ቀል ጉስ ꬋይሴስ። 33 ሽን ታ ኦድያባ ስእያ ኡባይ ሳሮ ዳና፤
መቶ ህርጋፈካ ሸምፓና።”