23
6
1 ሀላቃራ ካꬅ ማናዉ ኡትያ ዎደ፥
ኔራ ደኤይሳ አኬካ።
2 ኔኒ ዳሮ ያራምባ አስ ግድኮ ናገታ።
3 እ ነና ፓጫናዉ ዳንዳእያ ግሾ፥
ማልኦ ካꬃስ ያረቶፓ።
7
4 ዱረታና ጋዳ ዳቡሮፓ፤
ነ ቆፋ ሃራናዉ ጭንጫ ግዳ።
5 ሄሳ መላ ዱረተꬅ ነ ፄልሽን ꬋያና፤
ቀፈ ከስድ አርጋንꬃዳ ሳሎ ፓላና።
8
6 ኡዘ አሳ ካꬅ ሞፓ፤
እያ ማልኦ ካꬃይ ነና አሞዮፖ።
7 ቆፐ ቆሞን “ማ፤ ኡያ” ጌስ፤
ሽን እያ ዎዛናይ ኔራ ግደና።
8 ነ ምዳ ጉꬃ ካꬃካ ጮያና፤
ነ ጋላታይ መላ ግዳና።
9
9 ነ ጭንጫተꬃ ሃሳያ ካꬍያ ግሾ፥
ኤያ አሳስ ፓፃባ ሃሳዮፓ።
10
10 በን ዛዋ ሾዶፋ፤
ይኦ ናይታ ዛዋ ሱጎፓ።
11 ኤንታ አሽያ ጎዳይ ምኖ ግድያ ግሾ፤
እ፥ ኤንታ ግሾ ኔራ ሞተታና።
11
12 ነ ዎዛና ዞረ ቃላኮ፥
ነ ሀይꬃ ትምርተኮ ዛራ።
12
13 ናአ ሴሮና አጎፋ፤
ነ እያ ፕርጮን ሾጭኮ እ ሀይቀና።
14 ነ እያ ፕርጮን ሾጭኮ፥
እያ ሸምፑዋ ሀይቆፐ አሻሳ።
13
15 ታ ናአዉ፥ ነ ዎዛናይ ጭንጫ ግድኮ፥
ታ ዎዛናይ ኡፋይታና።
16 ነ እንፃርሳይ ሱረባ ሃሳያ ዎደ፥
ታ ጋꬃ አሳተꬃይ ኡፋይቴስ።
14
17 ናጋራንቾታ ቃናቶፓ፤
ሽን ኡባ ዎደ ጎዳ ያያ።
18 ያትኮ ነዉ ስንꬃ ደኦይ ሱራና፤
ነ ኡፋይሳይ ꬋየና።
15
19 ታ ናአዉ፥ ስአ፤ ጭንጫ ግዳ፤
ነ ዎዛና ሱረ ኦግያን ናጋ።
20 ዳሮ ዎይነ ኡሹ ኡየይሳታራነ
አሾ ማናዉ ያረተይሳታራ ሄመቶፋ።
21 ማꬆተይሳትነ ያራምባት ማንቃና፤
ꬍስኮ ዳሮይ ጩርቃ ማይዜስ።
16
22 ነና የልዳ ነ አዋይ ኦድያባ ስአ፤
ነ አይያ ጭምዳ ዎደ ካꬎፓ።
23 ቱማ፥ ጭንጫ፥ ሴራነ
አኬካ ሻማፈ አትሽን፥ ባይዞፓ።
24 ፅሎ ናአ አው ዳሮ ኡፋይቴስ፤
ዎዛናማ ናአ የልዳ አስ እያን ጬቀቴስ።
25 ነ አዋይነ ነ አይያ ነናን ኡፋይቶ፤
ነና የልዳራ ሀሹ ጎ።
17
26 ታ ናአዉ፥ ነ ዎዛና ታዉ እማ፤
ነ አይፈት ታ ኦግያ ካሎ።
27 ላይማ ማጫስ ጪሞ ሃꬃ መላ፤
ላገꬆ ማጫስ ፁንꬃ ኦላ መላ።
28 እያ ፓኖዳ ዙጋዳ ናጋዉሱ፤
አማነቶና አደታ ዳርሳዉሱ።
18
29 ዋሶይ ኦሴ? አዛኖይ ኦሴ?
ኦሽ ኦሴ? ዙዙንꬅ ኦሴ?
ጋሶይ ባይና ማዱንፀꬅ ኦሴ?
አይፈ ዞኦይ ኦሴ?
30 ዎይነ ኡሹ ኡይሸ ዎደ ኦንገይሳታሳ ግደኔ?
ዋላሄትዳ ዎይነ ኡሻ
ጋንፅድ በኤይሳታሳ ግደኔ?
31 ዎይነ ኡሽ ዞእዳ ዎደ፥
እያ ማላይ ብርለ ግዶን ጶልያ ዎደ፥
ኡይን ማልእሸ ገልያ ዎደ እያ ፄሎፋ።
32 ዉርሰꬃን ሾሻዳ እ ዱኬስ፤
ኢታ ሾሻዳ ባ ማርዝያ ፑኬስ።
33 ነ አይፈይ በእ ኤሮናባ በአና፤
ነ ዎዛናይ ሱረ ቆፓናዉ ዳንዳኤና።
34 ኔኒ አባ ግዶን ዝንእዳ፥
ማርካብያ ቱሳ ቦላ ካትዳ አሰ ዳናሳ።
35 ኔኒ፥ “ኤንቲ ታና ደችዶሶና፤
ሽን ታ ቆሄታብከ።
ኤንቲ ታና ዋꬍዶሶና፤
ሽን ታዉ ኤረትቤና።
ሀራ ኡሹ ኡያናዉ
ታኒ አዉደ ደንዳኔ?” ያጋና።