25
ሀራ ሶሎሞነ ሌምሶታ
1 ሀይሳቲ ይሁዳ ካዋ ህዝቅያሳ አሳት ዱቅድ ፃፍዳ ሶሎሞነ ሌምሶታ።
2 ፁራ ገንꬆይ ፆሳስ ቦንቾ፤
ፁራ ፕልግድ ከሶይ ካዎታስ ቦንቾ።
3 ሳሎይ ꬎቁ ግዳይሳዳነ
ሳእ ዝቃ ግድዳይሳዳ
ካዎታ ቆፋ አስ ኤራናዉ ዳንዳኤና።
4 ብራፐ ቅታ ድጋ፤
ሄሳፈ ጉየ፥ ሂላንቾይ ሎይꬃና።
5 ካዎ ስንꬃፈ ኢታ አሳታ ድጋ፤
እያ አራታይ ፅሎተꬃን ምንድ ኤቃና።
6 ካዎ ስንꬃን ኤቅያ ዎደ ጬቀቶፋ፤
ግታ አሳታ ግዶን ነዉ በሰ ኮዮፓ።
7 ኔፐ ግታትያ አሳስ በሰ እማናዉ
ሀላቃይ ነና ደንꬅን፥ ካዉየይሳፈ፥
እ ነና፥ “ሀ ꬎቃ በሳን ኡታ” ገይስ ሎኦ።
8 ነ አይፈን በእዳባ ማርካታናዉ
ዳይና ስን ባናዉ ኤለሶፓ።
ነ ማርካታ ስምን ሀራ አስ
ነ ማርካተꬃይ ባላ ግደይሳ ቆንጭስኮ፥ ነ ዬላታና።
9 ነ ግዶንነ ነ ሾሩዋ ግዶን ፓላም መትኮ፥
እያራ ኦደታዳ ነ ፓላማ ዉርሳ፤
ሀራ አሳ ፁራ ቆንጭሶፓ።
10 ሄስ ሀኖና እፅኮ ነ ኦደይሳ ስእዳ አስ
ነና ካዉሻና፤
ነ ሱንꬃይ ዛሪድ ስሞናዳ ኢታና።
11 በሲያ ዎደ ኦደትዳ ልከ ቃል፥
ብራ ሚሸ ቦላ ትገትዳ ዎርቃ አሌቆ መላ።
12 ኤራ አስ ዞርያ ዞረ ስእያ ሀይꬃስ፥
ሄስ ዎርቃፈ ዎይኮ ጌሻ ዎርቃፈ
ኦሰትዳ አሌቆ መላ።
13 ካꬃ ጫክያ ዎደ እርፃ ሃꬅ ኡይን አለይሳዳ፥
አማንꬅያ ኪታንቾይ ባና ኪቶይሳ ኡፋይሴስ።
14 እሞናባ እማና ግድ ጬቀትያ አስ
እር ባይና ሻራነ ጫርኮ መላ።
15 ዳንዳአ አስ ሀላቃ ኦድድ ማይዜስ፤
ሊቆ ቃል መቀꬅ ካንꬅ ገሌስ።
16 ኤስ ደምኮ ካላና ጋካናዉ ማ፤
ሽን ዳርስኮ ነና ጮሻና።
17 ነና ኡፍሸ እፆናዳ፥
ነ ሾሩዋ ሶ ኡባ ዎደ ቦፓ።
18 ባ ሾሩዋ ቦላ ዎርዶን ማርካትያ አስ፥
ፃምእ፥ ማሽነ ቶር ቆሄይሳዳ ቆሄስ።
19 መቶ ዎደ አማነቶና አሳን ዘምፖይ፥
ቃፅያ አቻን ጮምያነ
ስልዳ ቶሆን ሄመተይሳ መላ።
20 አዛንዳ አሳስ የꬅ የፅያ አስ፥
ሜጎ ዎደ ማኦ ቃርያነ
ማዱንꬃ ቦላ ጫላባ ትግያ አሳ መላ።
21 ነ ሞርከይ ኮሻትኮ ሙዛ፤
ሳሞትኮ ኡሻ።
22 ነ ሄሳ ኦꬅኮ እያ ሁጰን ታማ ቦንቆ
ካሽድ ቆለይሳ መላ፤
ጎዳይ ነና ዎይታና።
23 ዶሎሀ ባጋ ጫርኮይ እራ ኤሄይሳዳ፥
ዝግርስ ሀንቆ ኤሄስ።
24 ዶናትያ ማችራ እስ ኬꬃን ዳናፐ
ካረ ባራንዳን ዱስ ሎኦ።
25 ዳቡርዳ አስ እርፃ ሃꬅ ኡይድ አለይሳዳ፥
ሃሆ ቢታፈ ያ ሎኦ ኦድ ኡፋይሴስ።
26 ኢታ አሳ ስንꬃን ጉልባትያ ፅሎ አስ፥
ቡሎትዳ ፑልቶነ ኢትዳ ኦላ ሃꬃ መላ።
27 ዳሮ ኤስ ሙስ ሎኦ ግደና፤
ሄሳዳካ፥ ባ ቦንቾ ኮሽ ቦንችሰና።
28 ባና ሃሮና አስ
ድርስ ላለትዳ ካታማ መላ።