4
ኡባ ዎደ ዎሳ
ዛማረታ ሀላቃስ ፃፈትዳ ዳዊታ ማዝሙረ
ዲꬃን የፀትያ ማዝሙረ
1 አቤት ታና ፅልስያ ፆሳዉ፥
ታኒ ነና ፄግያ ዎደ ታዉ ኮያ።
ታኒ ኡንኤትዳ ዎደ ነ ታና ላአ ከሳዳሳ፤
ታዉ ቃታ፤ ታ ዎሳ ስአ።
2 ህንተኖ አሳዉ፥ ህንተ አዉደ ጋካናዉ
ታ ቦንቹዋ ካዉሼቲ?
አዉደ ጋካናዉ ፓꬆናባ ዶሴቲ?
አዉደ ጋካናዉ ዎርዶ ካሌቲ?
ሳላህ
3 ጎዳይ አማነትያ አሳታ ባዉ ዱማይድ ዎꬅዳይሳ ኤርተ፤
ታኒ ጎዳ ፄግያ ዎደ እ ታና ስኤስ።
4 ሀንቀትተ፥ ሽን ናጋራ ኦꬆፕተ፤
ህንተ ዝንእያ ዎደ
ህንተ ዎዛና ቆርተ፤ ስእ ጊተ።
ሳላህ
5 ጎዳስ ልከ ያርሾ ያርሽተ፤
እያን አማነትተ።
6 “ኑና ሎኦባ በሳናይ ኦኔ?”
ያግድ ዳሮት ኦይቾሶና፤
አቤት ጎዳዉ፥ ነ ኑና ኬሀ አይፈን ፄላ።
7 ዳሮ ግስተፈነ ዎይነ ኡሻፈ
ነ ታ ዎዛናን ዎꬅዳ ግታ ኡፋይሳይ አꬌስ።
8 አቤት ጎዳዉ፥ ነ ፃላል ታና ሳሮ ዎꬅያ ግሾ፥
ታኒ ዝንአዳ ዎፑ ጋዳ ꬍስካይስ።