14
ፆሰ ኤሮና አሳታ
ዛማረታ ሀላቃስ ፃፈትዳ ዳዊታ ማዝሙረ
1 ኤያት ባንታ ዎዛናን፥ “ፆሲ ባዋ” ያጎሶና፤
ኤንታ ደኦይ ኢትስ።
ኤንቲ እፀትዳባ ኦꬆሶና፤
ሎኦባ ኦꬅያ አስ ባዋ።
2 አኬከይነ ፆሰ ኮየይ ደእያኮ በአናዉ፥
ጎዳይ ሳሎፐ ዱገ አሰ ፄሌስ።
3 ሽን ኡባይ ዞኮ ዛርዶሶና፤
ኡባይ ጎኦናባ ግድዶሶና።
ሎኦባ ኦꬅያ ኦንካ ባዋ፤
ሀር አቶሽን እስ አስካ ባዋ።
4 አስ ካꬅ መይሳዳ፥
ኤንቲ ታ አሳ ቦንቅድ ሞሶና፤
ሀ ኢታ አሳት አይባካ ኤሮኮና፤
ኤንቲ ፆሳ ዎሶኮና።
5 ሽን ፆሳይ ፅሎ አሳራ ደእያ ግሾ፥
ኢታ አሳት ያሻን ኮኮሮሶና።
6 ህንተ ማንቆታ ቆፋ ላሌታ፤
ሽን ጎዳይ ማንቆት ቆሰትድ አትያ በሰ።
7 እስራኤለስ አቶተꬅ ፅዮነፐ ዬረነ!
ጎዳይ ኤንታ ዱሳ ዛርያ ዎደ፥
ያይቆባ ኮቻይ ኡፋይታና፤
እስራኤለ አሳይ ሀሹ ጋና።