22
ፅሎ አሳ መቶነ ኡፋይስ
ዛማረታ ሀላቃስ ፃፈትዳ ዳዊታ ማዝሙረ
“ጉራ ገንኤ” ጌተትያ ዲꬃ ጩꬃን የፀትዳ ማዝሙረ
1 ታ ፆሳዉ፥ ታ ፆሳዉ፥ ታና አይስ አጋዲ?
ታና ማዳ ጋዳ ታ ነና ዎስያ ዎደ፥
አይስ ታፐ ሃካይ?
2 ታ ፆሳዉ፥ ጋላስ ኩመꬅ ታ ኔኮ ዋሳስ፤
ሽን ነ ታና አላካ።
ቃማ ኡባን ኔኮ ዋሳይስ፥
ሽን ዎፓተꬅ ደምከ።
3 ግዶሽን ኔኒ ጌሽ፤
እስራኤለ ጋላታይ ነ አራታ ዩሾን ደኤስ።
4 ኑ አዋት ነናን አማነትዶሶና፤
ነናን አማነትን፥ ነ ኤንታ አሻዳሳ።
5 ኔኮ ዋስድ አትዶሶና፤
ነናን አማነትድ ዬላትቦኮና።
6 ሽን ታ አሰ ግድከ፤ ጉፁነ፤
ታ አሳን ካትዳይሳነ ቦረትዳይሳ።
7 ታና በእያ ኡባይ ቀልቅሶሶና፤
ባንታ ሁጵያ ቃꬅሸ ደሬቆሶና።
8 “እ ጎዳን አማነትስ፤ አነ እያ አሾ፤
ጎዳይ እያ ዶስኮ፥ አነ እያ አሾ” ያጎሶና።
9 ግዶሽን ታኒ ታ አየ ኡሎፐ
ሱረ የለታናዳ ኦꬅዳይ ነና።
ታ አየ ꬋንꬃ ꬋምያ ዎደካ
ታና ናግዳይ ነና።
10 ታ የለቶሶፐ ዶማዳ ነናን ድጫስ፤
ታ አየ ኡሎፐ ዶምን ነ ታ ፆሳ።
11 መቶይ ታኮ ማትያ ግሾነ
ታና ማድያ አስ ባይና ግሾ፥
ሀእ ኔኒ ታፐ ሃኮፋ።
12 ዳሮ ሞርከት ቃይጭያ ቦራዳ ታና ተቅዶሶና፤
ቃይጭያ ባሳነ ኮርማታዳ ታና ኦይክዶሶና።
13 መንረꬅድ ጉድያ ጋሞዳ
ባንታ ዶና ታ ቦላ ዶዮሶና።
14 ታኒ ሃꬃዳ ጎጋስ፤
ታ መቀꬃይ ባ ከሱዋፐ ከይስ፤
ታ ዎዛናይ ኦይሳዳ ታ ጋꬃን ትልእስ።
15 ታ ቆይ ኩንአዳ መልስ፤
ታ እንፃርሳይ ኮቶኑዋራ ኦይከትስ፤
ነ ታና ሀይቅዳ አሳዳ ባናን የጋዳሳ።
16 ካናት ታና ተቅዶሶና፤
ኢታ አሳት ታ ዩሹዋ ኦይክዶሶና፤
ታ ኩሸታነ ታ ቶሆታ ጫዶሶና።
17 ታ መቀꬃት ታይበቶሶና፤
ታ ሞርከት ታና ደሬቆሶና።
18 ታ ማኡዋ ሻክድ ኤኮሶና፤
ታ አዱሳ ማኡዋ ቦላ ሳማ የጎሶና።
19 ታ ጎዳዉ፥ ነ ታ ማታይ ታፐ ሃኮፋ፤
ታ ዎልቃዉ፥ ታና ማዳናዉ ኤለሳዳ ሃያ።
20 ታና ማሻፈ ከሳ ኤካ፤
ታ አልኦ ደኡዋ ካናታፐ አሻ።
21 ጋሞታ ዶናፐ ታና አሻ፤
ቃይጭያ ባዞ ቦራታ ካጨፐ ታና ናጋ።
22 ታኒ ነ ሱንꬃ ታ እሻታስ ኦዳና፤
ኤንታ ሺቁዋን ነና ጋላታና።
23 ህንተኖ፥ ጎዳ ያየሳቶ፥ እያ ጋላትተ፤
ህንተኖ፥ ያይቆባ ዛረቶ፥ እያ ቦንችተ።
ህንተኖ፥ እስራኤለ ኮቻቶ፥
ያሻን እያ ꬎቁ ꬎቁ ኦꬅተ።
24 እ ኡንኤትዳይሳ ካና፤
ኤንታ ቆሁዋ በእሸ ቀል ጌና።
ባ ሶምኡዋ ኤንታፈ ገንና፤
ኤንቲ እያኮ ዋስያ ዎደ፥
ኤንታዉ ዞኮ ዛርቤና።
25 ታ ነ ሎኦ ኦሱዋ ግሾ ግታ ሺቆን ጋላታና፤
ታ ቃንገꬃ ነዉ ያይያ አሳ ስንꬃን ጋꬃና።
26 ማንቆት ምድ ካላና፤
ጎዳ ኮየይሳት እያ ጋላታና፤
ኤንቲ መርናዉ ኡፋይሳን ዳና።
27 ሳአ ጋፃ ጋካናዉ ደእያ አሳ ኡባይ፥
አኬካን ጎዳኮ ስማና፤
አሳ ዛረ ኡባይ እያ ጎይናና።
28 ማት ኡባይ ጎዳሳ፤
እ ካዎተꬃታ ሃሬስ።
29 ሳአን ደእያ ዱረ ኡባይ እያ ጎይናና፤
ባንታና ሀይቆፐ አሻናዉ ዳንዳኦናይሳትነ
ቢታን ስምያ ኡባይ እያዉ ጉልባታና።
30 ያና የለታይ እያዉ ኪተታና፤
ስንꬃ የለታስ ጎዳባ ኦዳና።
31 ቡሮ የለትቦና አሳስካ፥
እያ ጌሻተꬃ ኦዳና።