ናምአንꬆ ማፃፋ
42
(ማዝ 42—72)
ጎደትያ አሳ ዎሳ
ቆረ ናይታ ትምርተ
አኬካን ፃፍዳ ማዝሙረ
1 ጋር ፑልቶ ሃꬅ ላሞተይሳዳ፥
ፆሳዉ፥ ታ ሸምፕያ ነና ላሞታዉሱ።
2 “ታ ሸምፕያ ፆሳ፥
ደኦ ፆሳ በአናዉ ሳሞታዉሱ፤
አዉደ ጋካዳ እያ ሶምኡዋ በኦ” ያጋዉሱ።
3 አሳይ፥ “ነ ፆሳይ አዉን ደኢ?”
ግያ ዎደ፥
ጋላስነ ቃም ታዉ አፉꬅ ካꬅ ግድስ።
4 ታኒ ኤንታ ባኣለ ቦንቻናዉ ሺቅዳ፥ ዳሮ አሳ ካለꬃዳ፥
ጋላታ የꬃንነ እልልሳን ፆሳ ኬꬅ በይሳ ቆፕያ ዎደ፥
ታ ዎዛናይ አዛኖን መቄስ።
5 ታ ሸምፐ፥ አይስ አዛናይ?
አይስ ኡንኤታይ?
ነ ፆሳን ኡፋይስ ዎꬃ፤
ታና አሽያ፥ ታ ፆሳ ታኒ ቡሮ ጋላታና።
6 ታ ዎዛናይ አዛንስ፤
ሄሳ ግሾ ታኒ ዮርዳኖሰ ቢታን፥
አርሞና ꬎቃን፥ ምዛረ ዙማን፥
ኤቃዳ ነና ቆፓና።
7 ነ ሶሱዋ ጉንꬃን ጪሞይ ጪሙዋ ፄጌስ፤
ነ ቤታይነ ነ ዙለይ ታ ቦላራ አꬍስ።
8 ጎዳይ ባ ሲቁዋ ጋላስ ታዉ ኪቴስ፤
ቃማ ጋላታ የꬃይ ታራ ደኤስ፤
ታ ደኦ ፆሳ ዎሳና።
9 ፆሳ፥ ታ ዛላኮ፥
“ታና አይስ ዶጋዲ?
ታ ሞርከት ታና ኡንኤꬅን፥
ዬካሸ አይስ ሄመቶ” ያጋና።
10 ታ ሞርከት፥ “ነ ፆሳይ አዉን ደኢ?”
ያግድ ጫይያ ዎደ ታ መቀꬃይ መቄስ።
11 ታ ሸምፐ አይስ አዛናይ?
አይስ ኡንኤታይ?
ፆሳን ኡፋይስ ዎꬃ፤
ታና አሽያ፥ ታ ፆሳ ታ ቡሮ ጋላታና።