45
ፆሳ አራታይ መርናሳ
ቆረ ናይት “ጪሸ” ጌተትያ ጩꬃን ዛማረታ ሀላቃስ ፃፍዳ ማዝሙረ
አኬካን ፃፍዳ ሲቆ ማዝሙረ
1 ታኒ ታ የꬃ ካዋስ ስሳና፤
ታ ዎዛናይ ሎኦ ቆፋ ፑልቴስ፤
ታ እንፃርሳይ ሎኦ ፃፍያ አሳ ብእረ መላ።
2 አሳ ኡባፈ ኔኒ ማላ ሎኦ፤
ነ መተርሻይ አꬎ ኬሀተꬃ ቃላን ኩምስ፤
ፆሳይ ነና መርናዉ አንጅስ።
3 ዎልቃማ ካዋዉ፥ ነ ማሻ ዳንጫ፤
ቦንቾነ ቴማ ማአ።
4 ነ ቱማተꬃ፥ ነ አዳተꬃነ ነ ፅሎተꬃ ግሾ፥
ነ ቴማ ማአዳ ፆናናዉ ደንዳ፤
ነ ኡሻቻ ኩሸይ ማላልስያባ በሶ።
5 ነ ቶራት ቃራ፤
ኤንቲ ካዋ ሞርከታ ዎዛና ጫዶ፤
ካዎተꬃት ነ ቶሁዋ ጋርሳን ኩንዶ።
6 ፆሳዉ፥ ነ አራታይ መርናዉ ደኤስ፤
ነ ካዎተꬃ ፃምአይ ፅሎተꬃ ፃምኣ።
7 ኔኒ ፅሎተꬅ ዶሳዳ ጌላተꬅ እፃሳ፤
ሄሳ ግሾ፥ ፆሳይ፥ ነ ፆሳይ፥
ነ ላገታፐ አꬅድ፥
ነና ኡፋይሳ ዛይተን ትይስ።
8 ጎዳረ ኡꬃን፥ ካርበንነ
ቡርጉደን ዋላከትዳ ሽቶን፥ ነ ማኦይ ፑከትስ።
ዳንጋርሳ ዛለን አሌቀትዳ፥
ነ ካዎ ጋꬎን ዲፀትያ ዲꬃይ ነና ኡፋይሴስ።
9 ካዎ ኬꬃን ደእያ ማጫሳታ ግዶን፤
ካዎታ ማጫ ናይት ደኦሶና።
ካውያ ኦፍራ ዎርቃን አሌቀታዳ፥
ኔፐ ኡሻቻ ባጋን ኤቃሱ።
10 ታ ናተ፥ ስአ፤ ዎዛናን ዎꬃ፤
ነ ሀይꬃ ሃ ዛራ፤
ነ ደርያነ ነ አዋ ኬꬃ ዶጋ።
11 ካዎይ ነ ማላን ኡፋይትስ፤
ነ ጎዳ ግድያ ግሾ እያ ቦንቻ።
12 ፅሮሳ አሳይ ነዉ ዎይቶ ኤክድ ያና፤
ዱረት ነና አዳሻና።
13 ካዋ ናእያ፥
ካዎ ኬꬃን ዋና ሎአይ!
እ ያጋኖ ማኦይ ዎርቃን አሌቀትስ።
14 ባ አሌቆ ማኡዋ ማአዳ፥
ካዋኮ ሞይዘታሱ።
እ ጌላኦ ላገት እዮ ካልድ፥
እያ ስን ኤክድ ይዶሶና።
15 ኤንቲ ኡፋይትሸ ይድ፥
ካዎ ጋꬎ ገሎሶና።
16 ካዋዉ፥ ነ አዋታ በሳ ነ ናይት ላታና፤
ቢታ ኡባን ነ ኤንታ ሹማና።
17 ታ ነ ሱንꬃ የለታ ኡባን፥
ሀሳየታናዳ ኦꬃና።
ሄሳ ግሾ፥ አሳይ መርናዉ ነና ጋላታና።