55
ነ ቶሁዋ ፆሳ ቦላ የጋ
ዳዊቲ ዛማረታ ሀላቃስ ዲꬃን የፅዳ አኬካ ማዝሙረ
1 አቤት ፆሳዉ፥ ታ ዎሳ ስአ፤
ታ ማጋኑዋ ቀል ጎፓ።
2 ታና ስአ፤ ታ ዎሳስ ዛሮ እማ፤
ታ ቆፋይ ታና ዋይስን፥ ታ ኡንኤታስ።
3 ታ ሞርከታ ግርሳ ስአዳ ዳጋማስ፤
ኢታታ ማንድያ ጋሶን ኮኮራስ።
ኤንቲ ታ ቦላ መቶ ኤሆሶና፤
ይሎን ደንድድ ታና ሞርኮሶና።
4 ታ ዎዛናይ ድርጌስ፤
ሀይቆ ህርጋይ ታና ዎꬌስ።
5 ታና ያሽነ ኮኮርስ ኦይክስ፤
ኢታ ዳጋም ታ ቦላ ዎꬍስ።
6 ሆለዳ ታዉ ቀፈይ ደእያኮ፥
ፓላዳ ሸምፖይ ደእያ በሲ ጋካናሽን።
7 ታኒ ሃካዳ ባናሽን፤
ባዞን አቃናሽን።
ሳላሀ
8 ታኒ ጎተፐነ ጫርኮፈ ባቃታዳ፥
ታ ቆሰትያ በሲ ደማናሽን።
9 አቤት ጎዳዉ፥ ካታማ ግዶን
ኦሽነ ገነ በእዳ ግሾ
ኢታታ ኦዳ ላላ።
10 ኢታት ጋላስነ ቃማ
ካታማ ግምበ ድርሳ ዩዮሶና፤
ዋየይነ መቶይ ካታማ ግዶን ደኤስ።
11 ꬋዮይ እያ ግዶን ደኤስ፤
ናቆይነ ጭሞይ እያ ዳባባፐ ሻከተና።
12 ታና ጫየይ ታ ሞርክያ ግደና፤
እያ ግድያኮ ታ ዳንዳአናሽን።
ታ ቦላ ጬቀተይ ታና እፀይሳ ግደና፤
እያ ግድያኮ ታ እያፐ ቆሰታናሽን።
13 ሽን ሄሳ ኦይ ነና፥
ታ ላግያ፤ ታ ዳቡዋነ ታ ሲቁዋ።
14 ኑ እሶይ እሱዋራ ኡሎ ኦዳ ኦደትዳ፤
ፆሳ ኬꬃን ዳባባን አሳራ እስፈ ስመረትዳ።
15 ኤንታ ዎዛናን ኢታተꬅ ደእያ ግሾ፥
ታ ሞርከት ቆፖና ሀይቆ፤
ኤንቲ ፓፃ ደእሸ ዱፎ ገሎ።
16 ሽን ታኒ ፆሳ ፄጋና፤
ጎዳይ ታና አሻና።
17 ዎንታ፥ ጋላስነ ኦማርስ ዋሳና፤
ታ መቱዋ እያዉ ኦዳና፤ እ ታና ስአና።
18 ዳሮት ታና ሞርክኮካ፥
እ ታና ቶራፐ አሼስ።
19 በንፐ ባ አራታን ኡትዳ ፆሳይ፥
ባንታ ኦግያ ላሞና ግሾነ
እያዉ ያዮና ግሾ ታና ስእድ ኤንታ ካዉሻና።
ሳላሀ
20 ታ ላገይ ባ ዳቦታ ቆህስ፤
ኤንታራ ጫቅዳ ጫቁዋ መንꬅስ።
21 እያ ዶናይ ኦይሳፐ ሊቆ፤
ሽን ባ ዎዛናን ኦላ ደንꬄስ።
እያ እንፃርሳይ ዛይተፐ አꬍዳ ሹጎ፤
ሽን ቃንፃናዉ ጊግዳ ቃራ ማሻ መላ።
22 ነ ቶሁዋ ፆሳ ቦላ የጋ፤
እ ነና ካትሳና።
ፆሳይ ፅሎት፥
ዳጋማና መላ ኦና።
23 ሽን አቤት ፆሳዉ፥
ኢታ አሳታ ዎልቃማ ኦላን ሆላና።
ሱꬁ ጉሰይሳትነ ጭመይሳት፥
ባንታ ላይꬃፈ ባጋካ ደኦኮና፤
ሽን ታኒ ነናን አማነታና።