62
ፆሳ ፃላላን ኡፋይስ ዎꬃ
ዳዊቲ ዛማረታ ሀላቃ ኤዶታመስ ፃፍዳ ማዝሙረ
1 ፆሳ ፃላላን ታ ሸምፖ ደማስ፤
ታ አቶተꬃይ እያፐ ዬስ።
2 እያ ፃላል ታ ዛላነ ታ አቶተꬃ፤
እ ታ ቆሰትያ አትያ በሲ ግድያ ግሾ ዳጋምከ።
3 ዎዳና ሀንያ ጎዳነ ቃፅያ ድርስ ዳንያ ኡራ ዎꬋናዉ፥
ህንተ አዉደ ጋካናዉ ደንደቲ?
4 ኤንቲ እያ ቦንቾ በሳፈ ደንꬃናዉ ኮዮሶና፤
ኤንቲ ዎርዶን ኡፋይቶሶና።
ባንታ ዶናን አንጆሶና፤
ሽን ባንታ ዎዛናን ባዶሶና።
ሳላሀ
5 ታ ሸምፐተ!
ፆሳ ፃላላ ስእ ጋዳ ናጋ፤
ታ ኡፋይሳይ እያፐ ዬስ።
6 እያ ፃላል ታ ዛላነ ታ አቶተꬃ፤
ታኒ ቆሰትያ በሲ ግድያ ግሾ ዳጋምከ።
7 ታ አቶተꬃይነ ታ ቦንቾይ ፆሳና፤
እ ታ ምኖ ዛላነ ታ ሚፃ።
8 አሳዉ፥ ኡባ ዎደ ፆሳን አማነትተ፤
እ ህንተዉ ገሸ ግድያ ግሾ፥
ህንተ ቆፋ እያዉ ኦድተ።
ሳላሀ
9 አስ፥ እስ ቶሆ ሸምፕያ ጫርኮ መላ፤
ጎባ አስ ኡባይ ማዶና ሀዳ።
ምዛነን ዎꬅን ኤንቲ ጫርኮ መላ፤
ኤንቲ እስ ቶሆ ሸምፕያ ጫርኮፈ ካዉዮሶና።
10 ቦንቀን አማነቶፍተ፤
ካይሶት ሺሽድ ዱረተꬃን ኦቶርቶፍተ።
ህንተ ዱረተꬃይ ዳርኮካ፥
ህንተ ዎዛና እያ ቦላ ዎꬆፍተ።
11 ፆሳይ እስ ቶሆ ኦድስ፤
ታኒ ናምኡ ኦዳ ስአስ፤
ዎልቅ ፆሳሳ።
12 መርና ሲቆይ ፆሳባ፤
አቤት ጎዳዉ፥ ነ አሳ ኡባስ
እያ ኦሱዋዳ ኦሱዋዳ እማና።