64
ኢታታፐ ታና አሻ
ዛማረታ ሀላቃስ የፀትዳ ዳዊታ ማዝሙረ
1 አቤት ፆሳዉ፥ ታ ኡንአ ዎሳ ስአ፤
ታ ሞርከታ ማንደꬃፈ፤ ታና አሻ።
2 ናጋራንቾታ ማቆፈነ
ኢታታ ዱላታፐ ታና ገንꬃ።
3 ኤንቲ ባንታ እንፃርሳ ማሻ መላ ሌፍዶሶና፤
ኢታ ቃላታ ዶንገ ቶራዳ ማልድ የዶሶና።
4 ኤንቲ ቆሰትድ ፅሎ አስ ባንታ ዶንግያን ቆሆሶና፤
አኬክ ባይና ዱኮሶና፤ ያዮኮና።
5 ኤንቲ ባንታ ኢታ ማቁዋስ
እሶይ እሱዋ ምንꬆሶና።
ባንታ ፅህያ ዎꬃና በሳ ኮዮሶና፤
ኤንቲ፥ “ኑና ኦን በአኔ?” ያጎሶና።
6 ኤንቲ ኢታባ ማቀትሸ፥
“ኑኒ ሎኦ ማቆ ማቀትዳ” ያጎሶና፤
ሄስ አሳ ዎዛና ቆፍ ጪሞ ግደይሳ በሴስ።
7 ሽን ፆሳይ ኤንታ ባ ዶንግያን ዱካና፤
ኤንቲ አኬኮና ማዱንፃና።
8 ኤንታ ማቁዋ እ ኤንታ ቦላ ዛራና፤
ኤንታ በእያ ኡባይ ሁጰ ቃꬃና።
9 ሄ ዎደ አሳ ኡባይ ፆሳስ ያያና፤
እያ ኦሱዋ ኦዳናነ ዛር ዛር ቆፓና።
10 ፅሎት ጎዳን ኡፋይቶ፤
እያኮ ባቃትድ አቶ፤
ዎዛና ሱረት ኡባይ እያ ጋላቶ።