81
ሻቃራ ባኣለ ዎደ የፅያ ሳባ
ዛማረታ ሀላቃስ ፃፈትዳ ሱሱልኤን የፀትያ አሳፋ ማዝሙረ
1 ኑስ ዎልቃ ግድዳ ፆሳስ ኡፋይሳን የፅተ፤
ያይቆባ ፆሳስ እልልተ።
2 የꬅ ዶምተ፤ ካራቦ ባቅተ፤
ዲꬃንነ ማስንቆን የፅተ።
3 አጌን ፄርያ ዎደ፥
ቃስ ꬉማ ኡትያ ዎደ፥
ባኣለ ጋላሳን ሞይዘ ፑንተ።
4 ሄስ እስራኤለ ቢታን ህገ፤
ያይቆባ ፆሳይ እምዳ ዎጋ።
5 እ ግብፀ ቢታ ሾጭዳ ዎደ፥
ዮሰፋ ኮቻስ ሀ ዎጋ አዋጅስ።
ኤሮና ዶናን ሀይሳዳ ያግሽን ስአስ፤
6 “ህንተ ሀሽያ ቶሆፐ፥
ህንተ ኩሽያ ኬሸፐ ሸምፕሳስ።
7 ህንተ መቱዋን ታና ፄግደታ፤ ታ ህንተና አሻስ፤
ታኒ ደችያ ሻራ ግዶፈ ህንተና አላስ፤
ማርባ ፑልቱዋ ማታን ታ ህንተና ፓጫስ።”
ሳላሀ
8 “ታ አሳዉ፥ ታ ህንተና ሴረይሳ ስእተ፤
እስራኤለ አሳዉ ህንተ ታና ስእኮ አይቤ?
9 ህንተ ግዶን አላጋ ፆሲ ደኦፖ፤
ሀራ ፆሰ ጎይኖፍተ።
10 ግብፀ ቢታፈ ህንተና ከስዳ፥
ታኒ ጎዳ ህንተ ፆሳ፤
ነ ዶና ሎይꬃዳ ሀካንካ፤
ታኒ እያን ኩንꬃና።
11 “ሽን ታ አሳይ ታና ስእቦኮና፤
እስራኤለይ ታዉ ኪተትቤና።
12 ሄሳ ግሾ፥ ኤንቲ ባንታ ቆፋ ካላና መላ፥
ስሞና ኤንታ ዎዛናስ አꬃዳ እማስ።
13 ታ አሳይ ታና ስእዳኮ አይበ፤
እስራኤለይ ታ ኦግያ ካልዳኮ አይብ ደእ፤
14 ታኒ ኤንታ ሞርከታ ኤሶን ፆናናሽን፤
ኤንታ እፀይሳታ ቦላ ታ ኩሽያ ደንꬃናሽን።
15 ጎዳ እፀይሳት እያ ስንꬃን ሆካና፤
ኤንታ ሴራይ መርናዉ ግዳና።
16 ታኒ ህንተና ሎኦ ግስተ ሙዛና፤
ዛላፈ ከይያ ኤሳን ህንተና ካልሳና።”