84
ፆሳ ኬꬅ ብሸ የፅያ ማዝሙረ
ዛማረታ ሀላቃስ ቆረ ናይት ፃፍዳ ሱሱልኤን የፀትያ ማዝሙረ
1 ኡባፈ ዎልቃማ ጎዳዉ፥
ነ ደእያ በሳይ ዋን ሎእ!
2 ታኒ ጎዳ ኬꬃ ዳባባ ላሞታይስ፤
ታ ኩመꬃ አሳተꬃይ
ደኦ ፆሳስ ኡፋይሳን የፄስ።
3 ኡባፈ ዎልቃማ ጎዳዉ፥
ታ ካዋዉ፥ ታ ፆሳዉ፥
ነ ያርሾ በሳ ማታን
ቡበ ካፎይ ባዉ ደእያ በሲ ደማሱ፤
ሆለይካ ባ ናይታ ዎꬅያ ኬ ኬፃሱ።
4 ነ ኬꬃን ደኤይሳትነ
መርናዉ ነና ሳበይሳት አንጀትዳይሳታ።
ሳላሀ
5 ነና ባንታ ምኖተꬅ ኦይሳት፥
ባንታ ዎዛና ፅዮነ ኦግያ ቦላ፥
ዎይሳት አንጀትዳይሳታ።
6 ኤንቲ ዬሆ ዛንጋራራ አꬍያ ዎደ፥
ሄ በሳይ ፑልቶይ ከይያ በሲ ግድስ፤
ቶርቸ እራይ ቡክድ ኦላ ኩንꬄስ።
7 ኤንቲ ዎልቃ ቦላ ዎልቃ ጉጅ ጉጅ ባና፤
እሶይ እሶይ ፆሳ ስንꬃን ፅዮነን በንታና።
8 ኡባፈ ዎልቃማ ጎዳዉ ፆሳዉ፥
ታ ዎሳ ኔኒ ስአ፤
ያይቆባ ፆሳዉ ሀይዛ።
ሳላሀ
9 ፆሳዉ፥ ኑ ጎንዳልያ በአ፤
ነ ዶርዳ ካዋ ኬሀ አይፈን ፄላ።
10 ታኒ ሀራ በሳን ሙኩሉ ጋላስ ዳናፐ፥
ነ ዳባባን እስ ጋላስ ደኤይስ ታዉ ሎኦ።
ኢታታ ዱንካንያን ዳናፐ፥
ፆሳ ኬꬃ ፐንገ ናጎይ ታዉ ሎኦ።
11 ጎዳ ፆሳይ ኑስ ጎንዳለነ ፖኦ፤
ኑስ ቦንቾነ ኬሀተꬅ እሜስ፤
ሱረተꬃን ሄመተይሳታ ሎኦባ ድገና።
12 ኡባፈ ዎልቃማ ጎዳዉ፥
ነናን አማነተይሳት አንጀትዳይሳታ።