አቤት ጎዳዉ፥ ታ ፆሳዉ ነ ግታ፤

ኔኒ ቦንቾነ ቴማ ማአዳሳ።

ኔኒ ሳሉዋ ዱንካነዳ ቶላዳሳ።

ሻራ ፓራ ጋረ ከሳሳ፤

ጫርኮ ቀፈ ቦላ ኡታዳ ባሳ።

ታማ ላጮ ነዉ ኦሳንቾ ኦꬃሳ።

ሄሳ ግሾ መርናዉ ቃፀና።

ሃꬃይ ግታ ደረታ ካምስ።

ነ ደሹዋ ስእዳ ዎደ ቆሰትዶሶና።

ነ ኤንታዉ ጊግስዳ በሳ ጎግዶሶና።

ኤንቲ አꬋናዉ ዳንዳኦና ዛዋ ዎꬃዳሳ።

ሻፋ ሃꬃት ደረታ ግዶራ ጎጎሶና።

ባዞ ሀረት እያፐ ሳሞ አሎሶና።

ታሽያ ግዶን የፆሶና።

እያ ኩሸ ኦሶ አይፈን ቢትያ ካላሱ።

ሄሳን አሳይ ቢታ ኦꬅድ፥ ካꬅ ሺሼስ። 15 አሳ ዎዛና ኡፋይስያ ዎይነ፥

ሶምኦ ጭልእስያ ዛይተነ

ዎልቃ እምያ ካꬅ ዶልሳሳ።

እ ቶክዳ ልባኖሰ ዝጋት፥

ዳሮ እራ ደሞሶና።

ፅሎት ፂዳ ቦላ ኬፅድ ደኦሶና።

ጉፓለት ሹቻ ቆጶን ቆሰቶሶና።

ነ አጌና መꬋዳሳ፤

አዋይ ባ ዉልያ ዎድያ ኤሬስ።

ሄ ꬉማን ዎራ ዶእ ኡባይ ከዬስ።

ኤንቲ ባንታዉ ምያባ ፆሳፈ ኮዮሶና።

ባንታ በሳ ገልድ ዝንኦሶና።

ሳእ ቃማና ጋካናዉ ኦꬄስ።

ነ ጭንጫተꬃን ነ ኤንታ ኡባ መꬋዳሳ፤

ሳእ ነ መꬍዳባን ኩምስ።

ታይቦይ ባይና ቃፅያ መተꬃን፥

ግታታነ ጉꬃ መተꬃን ኩምድ ደኤስ።

ነ መꬍዳ ሌዋታነ ጌተትያ ዳወይ እያን ካኤስ።

ምያባ እማና መላ፥

ኤንቲ ኡባይ ነና ፄሎሶና።

ኔኒ ነ ኩሽያ ምጭን፥

ኤንቲ ሎኦባ ካሎሶና።

ኔኒ ሸምፑዋ ኤክያ ዎደ ሀይቅድ፥

ባንታ ቢታ ስሞሶና።

ኤንቲ መቶሶና፤ ቢታ ኦራፅሳሳ።

ጎዳይ ባ ኦሱዋን ኡፋይቶ።

እ ደረታ ቦችያ ዎደ ደረት ጩዮሶና።

ታ ፓፃ ደእያ ዎደ ኡባን ታ ፆሳ ዛማራና።

ታ ቆፋይ እያ ኡፋይሶ።

ኢታ ኦይሳት ደኦፖ።

ጎዳይ ጋላተቶ።