ነ ታዉ ስእ ጎፓ።

ባንታ ዶና ታ ቦላ ዶይዶሶና፤

ባንታ ዎርዶ እንፃርሳን ታ ቦላ ሃሳዮሶና።

ጋሶይ ባይና ታና ኦልዶሶና።

ግዶሽን፥ ኤንቲ ታና ሞቶሶና።

ታ ኤንታ ዶስን፥ ኤንቲ ታና እፆሶና።

ሞታንቾይ እያ ኡሻቻን ኤቆ።

እያ ዎሳይ እያዉ ጎመ ግዶ።

እያ ሹማተꬃ ሀር ኤኮ።

እያ ማችያ አምኦ ግዶ።

ባንታ ደእያ ሁምፓ ኬꬃፈ ጎደቶ።

እ ዳቡርድ ከስዳባ ኡባ አላግ ቦንቆ።

እያ ናይታስ ቃትያ አስ በንቶፎ።

ካልያ የለተꬃን እያ ሱንꬃይ ዶገቶ።

እያ አየ ናጋራይ ቁሸቶፎ።

ኤንቲ ሳአ ቦላ ሀሳየቶፎ።

ማንቆታ፥ መቶታንቾታ፥

ቆሄትዳይሳታ ጎድድ ዎꬍስ።

እ ባደትዳይሳ ግዶ።

እ አንጃናዉ ዶሶና ግሾ፥

እያ አንጆይ እያፐ ሃክስ።

እያ ባደꬅ ሃꬃዳ እያ ቦላ ላክስስ፤

ዛይተዳ እያ መቀꬃ ግዶ ገሎ።

ዳንጮዳ ኡባ ዎደ እያ ፄሳን ደኦ።

ታ ቦላ ኢታ ኦደተይሳታ

ጎዳይ ሄሳዳ ኦꬅድ ሴሮ።

ነ ሱንꬃ ግሾ ታና ማዳ።

ነ ኬሀተꬃ ግሾ ታና አሻ።

ታ ዎዛናይ ማዱንፅስ።

ታ ቦለዳ ቆቆፈታስ።

ታ አሳተꬃይ ላፍን መቀꬅ አትስ።

ታና በእድ፥ ባንታ ሁጵያ ቃꬆሶና።

መርና ነ ሲቁዋዳ ታና አሻ።

ነ ሀይሳ ኦꬅዳይሳ ታ ሞርከት ኤሮ።

ታና ጎደይሳት ዬላቶ፤ ሽን ነ ታና ኡፋይሳ።

ባንታ ካዉሻ አፍላዳ ማኦ።

ደርያ ሺቁዋን እያ ሳባና።

ሀይቆስ ፕርደትዳይሳታ አሼስ።