1 ሄሳፈ ጉየ፥ ታ ሀራ ዎልቃማ ኪታንቾይ ሳሎፐ ሳአ ዎꬍሽን በአስ። እ ሻራ ማእስ፤ እያ ሁጵያ ቦላ ዙል ደኤስ። እያ ሶምኦይ አዋ መላ፤ እያ ቶሆይ ታማ ቱሳ መላ። 2 ሄ ኪታንቾይ ዶያ ደእያ እስ ጉꬃ ፃꬃ ማፃፋ ባ ኩሸን ኦይክድ፥ ባ ኡሻቻ ቶሁዋ አባ ቦላ፥ ባ ሀድርሳ ቶሁዋ ቢታ ቦላ ኤስስ። 3 ጉድያ ጋሞዳ ባ ቃላ ꬎቁ ኦꬅድ ዋስስ። እ ዋስዳ ዎደ ላፑን ዳዳት ባንታ ጉንꬃ ስስዶሶና።

4 ላፑን ዳዳት ኦደትዳ ዎደ ታ ፃፋናዉ ጊገታስ። ሽን ሳሎፐ፥ “ላፑን ዳዳት ኦድዳይሳ ማታመን ጎርዳፈ አትሽን፥ ፃፎፓ” ግያ ግርሳ ስአስ።

5 ያትድ፥ አባ ቦላነ ቢታ ቦላ ኤቅዳ፥ ታ በእዳ ኪታንቾይ፥ ባ ኡሻቻ ኩሽያ ሳሎ ፑደ ምጭስ። ከሳ 20:11፤ ዛረ 32:40፤ ዳነ 12:7፤ አሞ 3:7. 6 እ ምጭድ ሳሎንነ እያ ግዶን ደእያ ኡባ፥ ሳአንነ እያ ግዶን ደእያ ኡባ፥ አባነ እያ ግዶን ደእያ ኡባ መꬍዳ፥ መርናዉ ደእያ ፆሳ ሱንꬃን ጫቅድ፥ “ህዛፐ ጉየ፥ ፆሳይ ጋምኤና። 7 ሽን ላፑንꬃ ኪታንቾይ ባ ሞይዝያ ፑንያ ዎደ ፆሳይ ባ አይለ ግድዳ ናበታ ባጋራ ቆንጭስዳ ፁራ ቆፋይ ፖለታና” ያግስ።

8 ሄሳፈ ጉየ፥ አባ ቦላነ ቢታ ቦላ ኤቅድ፥ “እያ ኩሸን ዶየትድ ደእያ ፃꬃ ማፃፋ ኪታንቹዋ ኩሸፐ ኤካ” ያግድ ናምአንꬆ ታዉ ኦድሽን ስአስ። ህዝ 2:8—3:3.

9 ታኒ ሄ ኪታንቹዋኮ ባዳ፥ ጉꬃ ፃꬃ ማፃፋ እማ ጋዳ ኦይቻስ። እ ታኮ፥ “ኤካዳ ማ፤ እ ነ ኡሎን ጫማና፥ ሽን ነ ዶናን ኤሳዳ ማልአና” ያግስ።

10 ታኒ ኪታንቹዋ ኩሸፐ ሄ ጉꬃ ፃꬃ ማፃፋ ኤካዳ ማስ፤ ታ ዶናን ኤሳዳ ማልእስ፥ ሽን ታ ኡሎን ጫምስ። 11 ሄሳፈ ጉየ፥ ታኮ፥ “ኔኒ ያራ ኡባስ፥ ደረ ኡባስ፥ ዱማ ዱማ ዶናን ኦደተይሳታስነ ካዎታስ ትንብተ ዛራ ኦዳናዉ በሴስ” ያግስ።