1 ታ እሻቶ፥ ታኒ ኦደይ ህገ ኤርያ አሳታሳ። ህገይ እስ አስ ፓፃ ደእያ ዎደ ኡባን እያ ሃሬስ። 2 ሌምሶስ፥ አዝና ገልዳ ማጫስያ እ አዝናይ ፓፃ ደእያ ዎደ ህገን እያራ ቃሸታሱ። ሽን እ አዝናይ ሀይቅኮ እያራ እያ ጫቅዳ ጫቆይ እዮ ሃረና። 3 ሄሳ ግሾ፥ እያ ባ አዝናይ ፓፃ ደእሽን፥ ሀራ አደ ገልኮ፥ እያ ላምዳሮ ጌተታዉሱ። ሽን እ አዝናይ ሀይቅኮ፥ ጫቆይ እዮ ሃሮና ግሾ እያ ሀራ አዝና ገልኮ፥ እያ ላምዳሮ ጌተቱኩ።

4 ሄሳ ግሾ፥ ታ እሻቶ፥ ህንተ ክርስቶሳ አሳተꬃ ባጋራ ህገ ዎልቃስ ሀይቅድ፥ ፆሳስ አይፈ አይፋናዉ ሀይቆፐ ደንድዳ ክርስቶሳስ ግድደታ። 5 ኑ አሾ አሞይ ኑና ሃርን፥ ኑ ደእያ ዎደ ህገይ ጉጅ ናጋራ ኦꬃና መላ ኑና ደንꬄስ። ኑ አሳተꬃ ግዶን ኢታ አሞተꬅ ደእያ ግሾ ኑኒ ሀይቆ አይፈ አይፋና መላ ኦꬅስ። 6 ሽን ሀእ ኑኒ ኑና ቃችዳ ህግያስ ሀይቅዳ ግሾ ኑኒ ህገ ቃሾፐ ብለትዳ። ሄሳ ግሾ፥ ጌሻ አያና ኦገን ፆሳስ ኪተቶስፐ አትሽን፥ ፃፈትዳ ጭማ ህግያስ ኪተቶኮ።

7 ያትን፥ ኑኒ ዎይጋኔ? ህገይ ባ ሁጰን ናጋሬ? ግደና! ሽን ህገይ ናጋር አይበኮ ታና ኤርስስ። ህገይ፥ “አሞቶፋ” ጎናኮ፥ አሞተꬅ አይበኮ ታኒ ኤርከ። ከሳ 20:17፤ ዛረ 5:21. 8 ሽን ታ ኡባባ አሞታና መላ ናጋር ህገ ባጋራ ታናን ኦገ ደምስ። ህገይ ባይነኮ ናጋር ሀይቅዳይሳ።

9 ካሰ ህገይ ባይና ዎደ ታ ፓፃ፥ ሽን ህገይ እመትዳ ዎደ ናጋር ፓፅን ታ ቃስ ሀይቃስ። 10 ታኒ ደኦን ዳና መላ ፆሳይ እምዳ ህገይ ታዉ ሀይቆ ኤህስ። 11 ናጋር ህገ ባጋራ ታና ጭምያ ኦግያ ደምድ፥ ዎꬍስ።መ 3:13.

12 ሄሳ ግሾ፥ ህገይ ጌሽ፤ እያን ፃፈትዳ ኪታይካ ጌሽ፥ ፅሎነ ሎኦ።

13 ያትን፥ ሎኦ ግድዳባይ ታ ቦላ ሀይቆ ኤህደዬ? ግደና! ሽን ናጋር ናጋራ ግደይስ ቆንጫና መላ ሎኦባን ማደትድ ታዉ ሀይቆ ኤህስ። ሄሳ ግሾ፥ ናጋራ ናጋራተꬃይ ህገ ባጋራ አꬍድ ኤረትስ።

14 ኑኒ ህገይ አያናባ ግደይሳ ኤሮስ። ሽን ታኒ ናጋራስ ባይዘትዳ አሾ አስ። 15 ታኒ ኦꬅያባ አኬክከ፤ ታኒ ዶስያባ ኦꬃናይሳ አጋዳ ታ እፅያባ ኦꬃይስ።ጋላ 5:17. 16 ታኒ እፅያባ ኦꬅያ ግድኮ፥ ህገይ ሎኦ ግደይሳ ታ ማአይስ። 17 ሄሳ ግድኮ፥ ሄ ኦሱዋ ታናን ደእያ ናጋራይ ኦꬃይስፐ አትሽን፥ ታ ኦꬅከ።

18 ታናን፥ ሄስካ ታ አሹዋን ሎኦባይ ባይናይሳ ኤራይስ። ሎኦባ ኦꬅያ አሞተꬅ ታናን ደኤስ፥ ሽን ሎኦባ ኦꬃናዉ ዳንዳእከ። 19 ታኒ እፅያ ኢታባ ኦꬃይስፐ አትሽን፥ ታ ዶስያ ሎኦባ ኦꬅከ። 20 ታኒ እፅያባ ኦꬅያ ግድኮ፥ ሄሳ ታናን ደእያ ናጋራይ ኦꬄስፐ አትሽን፥ ኦይ ታና ግድከ።

21 ህዛ፥ ታ ሎኦባ ኦꬃናዉ ዶስሽን፥ ኢታባ ኦሶይ ዎጋ ግደይሳ ደማስ። 22 ታኒ ታ ዎዛናን ፆሳ ህግያን ኡፋይታይስ። 23 ሽን ታ አሳተꬃ ግዶን ደእያ ታ ቆፋ ህግያራ ኦለትያ ዱማ ህገ በአይስ። ሄ ህገይ ታ አሳተꬃ ግዶን ኦꬅያ ናጋራ ህግያስ ታና አይለ ኦꬅድ እሚስ። 24 ታኒ ዋንዳ ይባታ አሴ? ሀይቆስ ኤፍያ ሀ አሳተꬃፈ ታና አሻናይ ኦኔ? 25 ኑ ጎዳ የሱስ ክርስቶሳ ባጋራ ታና አሽያ ፆሳስ ጋላታይ ግዶ።

ህዛ፥ ታኒ ታ ቆፋን ፆሳ ህግያስ ሃረታይስ፤ ሽን ታ አሳተꬃን ታና ናጋራ ኦስስያ ህግያስ ሃረታይስ።