1 ሀራ ቆንጨꬃን ባ ኩሸን ዋꬋ ዎዶሮ ኦይክዳ እስ አስ በአስ። 2 ታኒ፥ “ኔኒ አዉ ባይ?” ያጋዳ ኦይቻስ።

እ ዛሪድ፥ “ታኒ የሩሳላመ ዳልጋተꬃይነ አዱሳተꬃይ አይ መለኮ ዋꬋናዉ ባይስ” ያግስ።

3 ሄሳፈ ጉየ፥ ታራ ሃሳያ ኪታንቾይ ከይድ ብስ፤ እያራ ጋሄታናዉ ሀራ ኪታንቾይ ይስ። 4 ይዳ ኪታንቾይ፥ “ዎፃ ባዳ፥ ናአተꬃ አድያኮ፥ ‘የሩሳላመን ዳሮ አስነ ዳሮ መሄይ ዳና ግሾ፥ ካታማ ዩሾን ግምበ ድርስ ኮሸና። 5 ታኒ እያ ዩሹዋን ታማ ድርስ ግዳና፤ ታኒ እያዉ ቦንቾ ግዳና’ ያጌስ ጎዳይ።

6 “ታኒ ህንተና ቢታ ኦይዱ ባጋ ላልዳ ግሾ፥ ያፐ ከይተ፤ ኤለ ከይተ፤ ፑደሀ ባጋ ቢታፈ ባቃትተ” ያጌስ ጎዳይ።

7 “ነኖ፥ ፅዮነ ከያ፤ ባብሎነ ማጫ ናይታ ግዶን ደእያረ፥ ኤንታ ግዶፈ ባቃታ” ያጌስ ጎዳይ።

8 ኡባፈ ዎልቃማ ጎዳይ እያ ቦንቹዋ ቆንጭሳና መላ፥ ባ አሳ ቦንቅዳ ካዎተꬃታኮ ታና ኪትድ፥ “ህንተና ቦችያ ኡራይ እያ አይፍያ ቡሉዋ ቦቼስ። 9 ታኒ ታ ኩሽያ ኤንታ ቦላ ደንꬃና፤ ኤንታ አይለት ኤንታ ዛሪድ ቦንቃና። ሄ ዎደ ህንተ ኡባፈ ዎልቃማ ጎዳይ ታና ኪትዳይሳ ኤራና።”

10 “ታኒ ያዳ ህንተ ግዶን ዳና ግሾ፥ ፅዮነ አሳዉ፥ ዛማርተ፤ ኡፋይትተ!” ያጌስ ጎዳይ።

11 ሄ ዎደ ዳሮ ካዎተꬃት ጎዳራ ጋሄትድ እያ አሰ ግዳና። እ ህንተ ግዶን ዳና፤ ኡባፈ ዎልቃማ ጎዳይ ታና ህንተኮ ኪትዳይሳ ሄ ዎደ ህንተ ኤራና። 12 ጌሻ ቢታን ይሁዳ፥ ባና ጋክዳ ግሾ ኦꬅድ ላታና፤ የሩሳላመ ዛሪድ ዶራና። 13 ጎዳይ ባ ደእያ ጌሻ በሳን ደንድዳ ግሾ፥ አሾ ማእዳ ኡባይ እያ ስንꬃን ስእ ጎ!