11
1 Taani Kiristoosa leemisuwa kaalleysada, hinteka tana kaallite.2 Qoro 4:16; Filphi 3:17.
Goyinno Maara
2 Hinte ubbaban tana qopiya gishonne taani tamaarsida timirtiya minthidi naagida gisho taani hintena galatayis. 3 Shin Kiristoosi adde ubbaas huuphe, addey maccasas huuphe, qassi Xoossi Kiristoosas huuphe gideysa hinte erana mela koyayis. 4 Ba huuphiya guuluntidi Xoosse woossiya woyko tinbite odiya addey ubbay huuphe gidida Kiristoosa toochees. 5 Ba huuphiya qaconna Xoosse woossiya woyko tinbite odiya maccasiya huuphe gidida ba azina toochawusu. Ba huuphiya qaconna maccasiya ba huuphiya meedetida maccasa mela.
6 Maccasi ba huuphe kammonna ixiko, ba huuphiya qanxeto. Shin iw huuphe qanxoy woyko meedoy borso gidiko, ba huuphiya qaco. 7 Addey Xoossa leemisonne Xoossa boncho gidiya gisho, ba huuphiya kammanaw bessenna, shin maccasi addes boncho.Medhe 1:26-27. 8 Maccasi addefe medhetasupe attishin, addey maccasape medhetibeenna.Medhe 2:18-23. 9 Maccasi addes medhetisipe attishin, addey maccasas medhetibeenna. 10 Haysa gishonne kiitanchota gisho maccasi baw maati de7eysa bessiya malla ba huuphen qacanaw bessees.
11 Shin Godaa qofan maccasi addey bayna deenna; addeyka maccasi bayna deenna. 12 Maccasi addefe medhetidaysada addeyka maccasape yeletis. Shin ubbayka Xoossafe medhetis.
13 Ane hinte pirdite; maccasi ba huuphe kammonna Xoossa woossanaw bessii? 14 Addey ba huuphiya dichiko iyaw borso gideysa hari attoshin medhetethi hintena tamaarsennee? 15 Shin maccasi ba huuphe dichiko iw boncho gidennee? Maccasas huuphey imetiday iya bana kammana melasa. 16 Shin haysa bolla palamanaw koya asi de7iko, nuus gidin woyko Xoossa woosa keethatas gidin haysafe hara wogi baawa.
Godaa Kaho Eko Maara
(Maato 26:26-29; Mar 14:22-25; Luqa 22:14-20)
17 Hinte issife shiiqey go77as gidonashin qohos gidiya gisho, ha77i taani immiya kiitan hintena nashike. 18 Taani koyro si7iday, woosa keethan shiiqiya wode hinte giddon shaaketethi de7eysa. Ha ta si7idaysi tuma gideysa ammanayis. 19 Hinte giddofe tumi de7eysati oonanteko eretana mela hinte giddon shaahoy daanaysi attenna. 20 Hinte issife shiiqiya wode hinte shiiqey Godaa kahuwa maanasa gidenna. 21 Hinte kathi miya wode issoy issuwa naagonna baysa baysa miya gisho, issoy koshatees hankoy qassi mathotees. 22 Tuma hinte maanawunne uyanaw hintew keethi baawee? Woyko Xoossa woosa keethi kadheetii? Aykoy bayna manqota yeellayetii? Ta hintena woygo? Haysas ta hintena nashoyee? Nashshike.
23 Taani hintew immida timirtiya Godaape ekas. Goday Yesuusi aadhidi imetiya qamma uythu ekidi, 24 Xoossaa galatis. Uythaa bathidi “He7ite; miite. Haysi hintew imetiya ta ashuwa. Haysa mishe tana hassayite” yaagis. 25 Hessadaka, kahuwa midi simmin, xuu7aa ekidi, “Haysi xuu7ay ta suuthan eqiya ooratha caaquwa. Hinte iyape uyaa wode ubban tana hassayite” yaagis.Kessa 24:6-8; Ermi 31:31-34. 26 Hinte ha uytha miya wodenne ha xuu7a uyaa wode ubban Goday yaana gakanaw iya hayquwa odeeta.
27 Hessa gisho, bessonna ogen Godaa uytha miya woyko Godaa xuu7a uya oonika iya ashuwanne suutha toochida gisho ba nagaran oyshetees. 28 Shin asi bana paaco. Yaatidi uytha mo; xuu7ape uyo. 29 Godaa ashuwaba shaakidi eronna, uytha meynne xuu7ape uyey, ba bolla pirda meesinne uyees. 30 Hessa gisho, hinte giddofe daroti daaburidosona; hargidosona; qassi undenna asati hayqidosona. 31 Shin nuuni nuna paacidi be7idaba gidiyako, nu bolla pirdetanashin. 32 Alamey pirdetiya wode nuuni alamiyara pirdetonna mela ha77i Goday nuna seerees.
33 Hessa gisho, ta ishato, Godaa kahuwa ekanaw hinte shiiqiya wode issoy issuwa naagidi ekite. 34 Hinte shiiqoy pirdas gidonna mela koshatida oonika de7iko, ba son mo.
Attidaba taani yaa bada hintew odana.