Yohaanisi Xaafida
Koyro Kiita
Gaatha Qofa
Hawaariya Yohaanisi xaafida koyro kiitay, nam7u ayfe qofata oykees.
1. Kiita nabbabeysati Xoossaranne iya na7aa Yesuus Kiristoosara issifetethi daana mela minthethanaasa.
2. Issifetethi dhaysiya wordo timirtefe haakana mela enta akeekisanaasa.
He wode dendida wordo timirtey, “Xoossay bentonna ayyaana alame medhis. Ha bentiya alamiyanne nu asatethaa Xoossi medhiboonna gisho iita. Qassi ha bentiya alameynne nu asatethay nu ayyaana qohanawunne tunisanaw danda7enna” yaagidi tamaarsoosona. Hessa guussay,
1. Yesuusi ase gididi yibeenna guussu;
2. Issi asi ba ayyaana tunisonna de7ishe ba ashon nagara oothanaw danda7ees guussu.
Hessa gisho, Yohaanisi ba kiitan, Yesuusi ase gididi yidaysa kaddiya oonika Xoossa na7a gidenna (4:2-3). Qassi Xoossafe yeletida oonika ubba wode nagaran deenna (3:6) yaagidi xaafis.
Wordo astamaareti, “Atotethi guussi, ha sa7a duussas un7etethafe keydi yeda gididi de7o” yaagosona. Hessa bolla gujidi, “Iitanne lo77o shaakidi oykethi gidin, qassi hara asi siiqo gidin, atotethara aybi gahetethika baawa” yaagosona.
Ha kiita xaafey he timirtiya palqidi, “Yesuus Kiristoosi polo ase. Yesuusa ammaneysatinne Xoosse siiqeysati ubbay banta giddon issoy issuwara siiqetanaw bessees” yaagidi odis.
Maxaafa Ayfe Qofata
De7o immiya qaala (1:1-4)
Poo7onne dhuma (1:5—2:6)
Ooratha kiita (2:7-17)
Kiristoosa morkenne Xoossa nayta (2:18—3:10)
Xoossa siiqonne nu siiqo (3:11—4:21)
Alame xooniya ammano (5:1-21)
1
De7o Qaala
1 Nuuni koyrope doomidi de7iya, nu haythan si7ida, nu xeellida, ayfen be7ida, nu kushen bochida de7o qaalaba hintew xaafoos.Yoha 1:1. 2 He de7oy qoncin, nuuni iya be7idi, iyabaa markatoos. Aawa matan de7iya nuus qoncida, merinaa de7uwabaa hintew awaajos.Yoha 1:14. 3 Nuura hintew issifetethi daana mela nuuni be7idaysanne si7idaysa hintew odoos. Hintew nuura issifetethi de7iya gisho, Aawaranne iya Na7aa Yesuus Kiristoosara issifetethi de7ees. 4 Nu ufaysay polo gidana mela hessa hintew xaafoos.
Xoossay Poo7o
5 Nuuni de7o gidida iyape si7idi, hintew odiya kiitay haysa: “Xoossay poo7o; iyan dhumi baawa” yaageysa. 6 Nuus iyara issifetethi de7ees yaagishe dhuman de7iko, nu odaaninne nu oosuwan wordotoos. 7 Shin poo7on I de7eysada, nuka poo7on de7iko, nuus woli giddon issifetethi de7ees. Iya Na7aa, Yesuusa suuthay nagara ubbaafe nuna geeshshees.
8 Nuuni, nunan nagari baawa giiko nu nuna cimmoos; nunan tumi baawa. 9 Shin Xoossaas nu nagara paaxiko, I nu nagara atto gaanawunne nu qoho ooso ubbaafe nuna geeshshanaw, ammanetidaysanne tumaa. 10 Nuuni nagara oothibooko giiko Xoossaa wordancho kessoos; iya qaalayka nunan deenna.