1 Kawota Maxaafa
Gaatha Qofa
Kawota Maxaafaa koyro kifiley, nam7u Sameela maxaafatan doometida, Isra7eele kawota taarike zeeton odees. Maxaafa heedzu waanna waanna kifiletan shaakidi be7anaw danda7etees.
1. Solomoney ba aawa Dawita bessan Isra7eelenne Yihuda bolla kawotuwanne iya aawa Dawita hayquwa odiya taarike (1:1—2:12).
2. Solomone kawotetha aysuwanne I oothida oosuwa odiya taarike (2:13—11:43).
3. Robi7aami kawotida wode, Isra7eeley pudehanne dugeha bagga kawotetha geetetidi nam7u keydi shaaketidaysanne he kawotethati Kiristoosi yeletanaape sinthe, uddufun xeetu laythi gakanaw haarida dumma dumma kawota taarike (12:1—22:53).
Ha maxaafan issi issi kawoy pirdetey, I Xoossas ammanetiya ammanetetha mela. Hessadaka he biitta dichaynne biittay demmiya injey, he kawoy Xoossas ammanetida ammanetetha keena. Pudeha bagga kawotetha kawoti ubbay paacen kundidosona. Shin Yihuda kawota taarikey iitataba gidin lo77otaba odees.
Koyro kawota maxaafan, Xoossa doona gididi tinbite odidi, asay eeqa goyinnona melanne Xoosse kiitetethi ixonna mela minthidi naagisida nabeti de7oosona. Enta giddofe daro eretiday, Eeliyaasa gidishin, I Ba7aale nabetara eqetida eqetethay maxaafan xaafetis (shem 18).
Maxaafa Ayfe Qofata
Solomoney Isra7eele bolla kawo giduwa (1:1-53)
Dawita wursetha qaalatanne hayquwa (2:1-12)
Solomoney kawotetha kumethi oytha (2:13-46)
Solomone cincatethaanne iya moorinnata (3:1—4:34)
Xoossa keetha keexuwanne anjisuwa (5:1—8:66)
Solomone kawotethan hanida hanota (9:1—10:29)
Solomone ammanetetha ixuwanne iya morketa (11:1-43)
Pudeha kochata shaaketethanne (12:1-33)
Nabeti Iyorbaama boridosona (13:1—14:20)
Yihudanne Isra7eele kawotethata (14:21—16:34)
Nabiya Eeliyaasa (17:1—19:21)
Kawa Akaabanne Elzabeelo (20:1—22:40)
Yihuda kawa Iyosaafexanne Isra7eele kawa Akaaza (22:41-53)
1
Adoniyaasi Kawotanaw Koyis
1 Kawoy Dawiti daro cimidi wode sugis. Iya aylleti ma7o iya bolla doorinka iya ho77onna ixis. 2 Hessa gisho, iya moorinnati, “Kawa matan daana melanne iya heemmana mela issi geela7o nu new koyana. Nu godaa kawa ho7ethanaw iya matan zin7anaw danda7awusu” yaagidosona. 3 Enti Isra7eele biitta ubban koyidi Abisa geetetiya issi mala lo77o geela7o Sunaama katamaape demmidi, kawas ehidosona. 4 He geela7iya daro mala lo77o. Iya kawa heemmasunne iyaw oothasu; shin kawoy iira aqi erenna.
5 Haagita na7ay Adooni, “Ta kawotanaw koyayis” yaagidi dendis; para gaareta, paratanne ba sinthan woxiya ishatamu asata giigisis. 6 Iya aaway, “Ne haysa ayis oothay?” gidi iya oychi erenna. Adoniyaasi daro mala lo77o; I Abeseloome kaallidi yeletis. 7 Adoniyaasi Xaruya na7aa Iyo7abaranne kahiniya Abyataarara zoretin, enti iya maaddanaw giigidosona. 8 Shin kahiniya Saadoqi, Yoodahe na7ay Banayi, nabiya Naatani, Saami, Resimnne Dawita naageysati Adoniyaasara dookona. 9 Issi gallas Adoniyaasi Enrogeela pultuwa matan Zoheleta Zaalla geetetiya bessan dorsata, mehetanne marata yarshis. Kawo nayta ba ishata ubbaanne kawas oothiya Yihuda asata ubbaa ba yarsho bessa xeegis. 10 Shin nabey Naatana, Banaya, kawa naageysatanne ba isha Solomone xeegibeenna.
11 Hessafe guye, Naatani Solomone aayiw Barsaabeko bidi, “Nu goday, Dawiti eronna de7ishin, Haagita na7ay Adoniyaasi kawotidaysa ne si7abikii? 12 Ne ne shempuwanne ne na7aa Solomone shempuwa waatada ashshaneko ta nena zorayis. 13 Kawa Dawitako gelada, ‘Ta godaw, Kawaw tuma, taape guye ne na7ay Solomoney kawotana; I ta araatan uttana’ yaagada taw ne ayllees caaqabikii? Yaatin, Adoniyaasi waanidi kawotidee? 14 Neeni kawuwara haasayishin ta gelada, ne oday tuma gideysa odana” yaagis.
15 Barsaaba kawa haasayisanaw I de7iya keethaa gelasu; Sunaamape yida Abisa kawa heemmawusu. 16 Barsaaba kawa sinthan bonchon som7uwa sa7a gathada ziggasu.
Kawoy, “Ay koyadii?” yaagidi oychis.
17 Iya, “Ta godaw, taw ne ayllees, ‘Taape guye ne na7ay Solomoney kawotana; I ta araatan uttana’ gada Godan, ne Xoossan, taw caaqadasa. 18 Heko, ha77i Adoniyaasi kawotis; ne ta goday, kawoy hessa eraka. 19 I daro meheta, maratanne dorsata yarshidi, kawa nayta ubbaa, kahiniya Abyataaranne toora mocona Iyo7aaba xeegis; shin ne aylliya Solomone xeegibeenna. 20 Ta godaw kawaw, ta godaape kawuwape guye ooni ne araatan uttaneeko eranaw Isra7eele asa ubbaa ayfey nena xeellees. 21 Hessi hanonna ixiko ta goday kawoy hayqidi ba mayzatan gahetiya wode tanne ta na7ay Solomoney daafaba oothida asada taybetana” yaagasu.
22 Barsaaba buroo kawuwara haasayishin, nabey Naatani kawo keethi gakis. 23 Nabey yidaysa asay kawas odidosona. Naatani kawa sinthe aadhidi, ba som7uwa sa7a gathidi ziggis.
24 Naatani, “Ta godaw kawaw, neepe guye Adoniyaasi kawotanaysanne ne araatan uttanaysa odadii? 25 Hachi I daro meheta, maratanne dorsata yarshidi, kawa nayta ubbaa, toora moconatanne kahiniya Abyataara xeegis. Enti ha77i iyara mishenne uyishe, ‘Kawoy Adoniyaasi birata tuussi gido’ yaagishe de7oosona. 26 Shin tana ne aylliya, kahiniya Saadoqa, Yoodahe na7aa Banayanne ne aylliya Solomone xeegibeenna. 27 Haysi ta godaa kawuwape guye iya araatan ooni uttaneeko ba aylleta erisonna de7ishe ta goday kawoy oothidabayee?” yaagis.
Dawiti Solomone Kawothis
28 Kawoy Dawiti, “Barsaabo taw xeegite” yaagin kawoy de7iya bessaa gelada iya sinthan eqasu. 29 He wode kawoy, “Tana meto ubbaafe ashshida Goday eriya mela. 30 Godan, Isra7eele Xoossan ta new caaqida caaquwa tuma hachi polana; taape guye ne na7ay Solomoney kawotana; ta araatan, I ta bessan uttana” yaagidi caaqis.
31 Barsaaba kawa sinthan ba som7uwa sa7a gathada ziggada, “Ta goday, Kawoy Dawiti merinaw kawoto!” yaagasu.
32 Hessafe guye Kawoy Dawiti, “Taw kahiniya Saadoqa, nabiya Naatananne Yoodahe na7aa Banaya xeegite” yaagin, enti gelidi, kawa sinthan eqidosona. 33 Kawoy “Ta aylleta hintera ekidi bidi, ta na7aa Solomone ta toggiya baquluwa togisidi, Giyoone pultuwako efite. 34 Yan kahiniya Saadoqinne nabiya Naatani iya tiyidi Isra7eele bolla kawoyo. Moyze punnishe, hinte qaala dhoqu oothidi, ‘Kawoy Solomoney birata tuussu gido’ yaagite. 35 Hinte iya ajabidi iyara biite; I ta araatan uttidi, ta bessan kawoto. Taani Isra7eelenne Yihuda haariya asi oothada iya shuumas” yaagis.
36 Yoodahe na7aa Banayi zaaridi, “Amin7i! Goday, ta godaa kawa Xoossay hessa polo! 37 Goday ta godaara kawuwara gididaysada Solomonera gido; iya araata ta godaa Kawa Dawita araatape aathidi gitayo” yaagis.
38 Hessa gisho, kahiney Saadoqi, nabey Naatani, Yoodahe na7ay Banayinne kawa naageysati Solomone Kawoy Dawiti toggiya baquluwa togisidi, Giyoone efidosona. 39 Kahiney Saadoqi Geeshsha Dunkaaniyape zayte kacen tigi ekidi, Solomone tiyidi kawothis. Enti moyze punnin, asa ubbay ba qaala dhoqu oothidi, “Kawoy Solomoney merinaw kawoto!” yaagidosona. 40 Asa ubbay iya kaallidi bidosona; enti biitti qaaxana gakanaw suusul7e punnishenne durishe daro ufaytidosona.
41 Adoniyaasinne iyara de7iya imathati gibira midi wursishe hessa si7idosona. Iyo7aabi Moyze puno si7idi, “Ha kataman si7etiya wocama girsay aybee?” yaagidi oychis.
42 I buroo odetishin, kahiniya Abyataara na7ay Yoonataani gaki wodhis. Adoniyaasi, “Ane haa gela. Ne mela lo77o asi lo77o wore ehonna aggenna” yaagis.
43 Yoonataani, “Akay, taani lo77o wore ehabike! Nu goday Kawoy Dawiti Solomone kawothis. 44 Iya ajabana mela kawoy kahiniya Saadoqa, nabiya Naatana, Yoodahe na7aa Banayanne kawa naageysata iyara yeddis; enti kawoy toggiya baquluwa iya togisidosona. 45 Kahiney Saadoqinne nabey Naatani, Giyoone pultuwa matan iya tiyidi kawothidosona; enti ililishenne durishe bidosona; kataman si7etiya girsay hessa. 46 Solomoney araatan uttis. 47 Hessa bollaka, kawa moorinnati nu godaa Kawa Dawitako shiiqidi, ‘Ne Xoossay Solomone sunthaa neysafe aathidi kesso; iya araata neysafe aathidi gitayo!’ yaagidi anjidosona. Kawoy ba algan de7ishe hokidi Xoossa goyinnis. 48 Gujidika, ‘Ta bessan kawothidi, ta araatan utisidi, tana hachi ta ayfen bessiya Goday, Isra7eele Xoossay galatetto!’ ” yaagis.
49 Adoniyaasa imathati ubbay hessa si7ida wode dagammidi, laaletidosona. 50 Adoniyaasi Solomone yayyidi, yarsho bessa kaceta oykidi woossis. 51 Asay Solomone, “Adoniyaasi Kawa Solomone yayyidi, yarsho bessa kaceta oykidi, ‘Kawoy Solomoney tana ba aylliya mashshan wodhike gidi hachi taw caaqo’ ” yaagees gidi odidosona.
52 Solomoney zaaridi, “I ba hanuwa loythiko, hari attoshin iya huuphe binaanape issoyka boshetenna; shin iyan iitatethi bentiko I hayqana” yaagis. 53 Kawoy Solomoney, Adoniyaasa yarsho bessaafe ehana mela ase kiittis. Adoniyaasi yidi, Solomones ziggis; Solomoney iyako, “Ne soo ba” yaagis.