28
Saa7olanne Moytille Xeegiya Maccasiw
1 He wode Filisxeeme asati Isra7eeleta olanaw banta olanchota shiishidosona. Ankusi Dawitako, “Nenne ne asati taara olas baanaysa tuma era utta” yaagis.
2 Dawiti, “Hessa gidiko, ta ne aylley oothanaba ne be7ana” yaagis.
Ankusi, “Daro lo77o; taani nena ta de7o laytha ubban tana naageysa oothana” yaagis.
3 Haysafe kase Sameeli hayqin, Isra7eele asa ubbay iyaw yeekidi, iya kataman Raman iya moogidosona. Saa7oli moytille xeegeysatanne marota Isra7eele biittafe yedethidi kessis.
4 Filisxeeme olanchoti shiiqidi, Suneema kataman dunkaanidosona; Saa7oli Isra7eele asa ubbaa shiishidi, Gilbo7a zuman dunkaanis. 5 Saa7oli Filisxeeme olanchota be7idi yayyis; iya wozanay daro dagammis. 6 Hessa gisho, ay oothaneko Godaa oychis; shin Goday amuhon woyko UriimenKessa 28:30. woyko nabeta baggara iyaw odibeenna. 7 Hessafe guye, Saa7oli ba aylleta, “Moytille xeegiya maro taw koyte; taani iiko bada iyo oychana” yaagidi kiittis.
Saa7ola aylleti, “Moytille xeegiya issi maroy Endooran de7ausu” yaagidosona.
8 Yaagin Saa7oli bana erisonna mela hara ma7o ma7idi, nam7u asata ekidi, qamma he mareeko bidi, maccasiw, “Hayyana, taw issi moytille xeegarki; taani suntha odiya asa taw dentharki” yaagis.
9 Yaagin maccasiya, “Moytille xeegeysatanne marota Isra7eele biittafe Saa7oli waati yedethi kessidaako, tuma neeni eraasa. Tana wodhisanaw neeni taw ayis xihe yeggay?” yaagasu.
10 Yaagin Saa7oli maccasiw, “De7o Xoossay eriya mela, neeni haysa gisho seeretaka” yaagidi Godan caaqis.
11 Maccasiya, “Taani new oona dentho?” yaagada oychasu.
Saa7oli, “Sameela taw dentha” yaagis.
12 Maccasiya Sameela be7ada, waaso goochada, Saa7olako, “Neeni tana ayis cimmadii? Neeni Saa7ola gidiki!” yaagasu.
13 Kawoy, “Yayyofa! New aybe bentey?” yaagis.
Maccasiya, “Issi moytilley biitta giddofe keyishin be7as” yaagasu.
14 Saa7oli maccasiw, “I ay daanii?” yaagis.
Maccasiya, “Kaabba ma7ida issi cima addey keyis” yaagasu.
Saa7oli he addey Sameela gideysa eridi, iya sinthan sa7an gufannis.
15 Sameeli Saa7olako, “Tana denthada ayis waaysay?” yaagis.
Saa7oli, “Taani daro un7etas; Filisxeeme asati tana oloosona; Xoossay taape shaaketis; nabeta baggara woyko amuhon I taani oychiyaba odenna. Hessa gisho, taani oothanaba ne taw odana mela nena xeegas” yaagis.
16 Sameeli, “Goday shaaketidi new morke gidiko tana ayis zore oychay? 17 Goday ta baggara kaseti odidaba oothis; Goday kawotethaa neepe ekidi, ne shooruwa Dawitas immis. 18 Neeni Godaas kiitetaboonna gishonne iya eexiya iya sheniya Amaaleqa bolla polaboona gisho Goday hachi haysa ne bolla ehis. 19 Nenanne Isra7eele, Goday Filisxeemetas aathidi immana; nenne ne adde nayti wonto tanan gahetana; Goday Isra7eele olanchota Filisxeemetas aathidi immana” yaagis.
20 Saa7oli Sameela odaa si7idi yayyida gisho daaburidi, bana dogidi sa7an kundis. Saa7oli qammanne gallas kathi miboonna gisho iyaw wolqi ixis. 21 He maccasiya Saa7olako yada, I daro kokoreysa be7ada, “Taani ne aylliya new kiitetas; neeni tana oychidaba ta shempuwa dogada oothas. 22 Ha77i taani ne aylliya giyaba hayyana si7a; neeni mada gashtada ne ogiya baana mela taani new guutha kathi giigisas” yaagasu.
23 Saa7oli, “Miike” yaagis. Shin iya asati he maccaseera gididi iya woossidosona; enta woosa si7is; biittafe dendidi hiixan uttis. 24 He maccasiya ba son de7iya anqara maraa shukasu; dhiille eka munuqada, uythi uukasu. 25 Yaatada kathaa Saa7olasinne iya asatas aathin, enti midosona. He qamma dendidi bidosona.