Phawuloosi Teselonqe Asaas
Xaafida Koyro Kiita
Gaatha Qofa
Teselonqey, Roome kawotethan de7iya Maqedoone biittas waanna katama. Phawuloosi Teselonqen woosa keetha Filphisiyuusa yeddidi bidaape guye essis. Gidoshin, Ayhudeta ammano kaallanaw giigetidi uttida Ayhude gidonna asay, Phawuloosi tamaarsiya ammano timirtiyan xoonetida gisho, Ayhudeti qanaatidi, Phawuloosa timirtiya phalqidosona. Hessa gisho, Phawuloosi gam7onashin Teselonqe yeddidi, Beeriya bis (1:9-10). Guyepe, I Teselonqe gakida wode iya maaddiya Ximotiyoosi, Teselonqe woosa keethan de7iya hanotata iyaw geeshshidi odis.
Phawuloosi koyro kiita Teselonqe asaas xaafiday, ammaniya asaa zoranaasanne minthethanaasa. I enta ammanuwabanne enta siiquwaba lo77o markatethi si7ida wode Xoosse galatis. Kase I enta giddon de7ida wode ay mela duussu de7idaako enta hassaysees. Hessafe guye, Kiristoosa nam7antho yuussaba oyshetida oyshaas zaaro immees. He oyshatape guuthati, “Kiristoosi nam7antho yaanape sinthe hayqida ammaniya asi, Kiristoosa yuussay immiya merina de7o ekanaw danda7ii? Kiristoosi nam7antho yaanay awudee?” geeteteyisata. Phawuloosi he inje wodiya go7etidi, “Kiristoosa nam7antho yuussaa ufaysan naagishe I yaana gakanaw wopu gidi hinte ooso oothite” yaagidi zorees.
Maxaafa Ayfe Qofata
Gelo qofa (1:1-3)
Teselonqe asaa ammanonne leemiso duussa (1:4—3:13)
Xoosse ufaysiya de7o (4:1-12)
Kiristoosa nam7antho yuussaba (4:13—5:11)
Wursetha zorenne sarotho (5:12-28)
1
1 Phawuloosi Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafida kiita.Hawa 17:1.
Aadho keehatethaynne saroy hintew gido.
Teselonqe Asaa De7onne Ammano
2 Nuuni Xoossaa woossiya wode ubban hintena qopishe hinte gisho ubba wode Xoossaa galatoos. 3 Xoossaa nu Aawa sinthan ammanon hinte oothida oosuwa, siiqon hinte daaburida daaburanne Yesuus Kiristoosan de7iya ufaysaa ekanaw hinte minnidi eqida equwa ubba wode nuuni qopoos.
4 Nu ishato, Xoossay hintena doseysanne ba ase oothidi hintena dooridaysa nuuni eroos. 5 Ayis giiko, nuuni Wongela doona xalaalan gidonashin, wolqan, Geeshsha Ayyaananinne Wongela tumaa ammanon hintew ehida. Nuuni hintera gam7ida wode ubban hinte gisho waanidi de7idaako hinte ereeta. 6 Hinte daro meto ekikoka Geeshsha Ayyaanay immiya ufaysan kiitaa ekideta; nunanne Godaa daanideta.Hawa 17:5-9. 7 Hessa gisho, Maqedoonenne Akaya biittan de7iya ammaniya ubbaas leemiso gidideta. 8 Godaa qaalay hintefe keyidi, Maqedooneninne Akaya xalaalan gidonashin, Xoossaa hinte ammaneysi ubbason si7etis. Hiza, nuuni gaanabay aykoyka baawa. 9 Nuuni hinteko bida wode hinte nuna mokida mokuwanne hinte, hinte eeqa aggidi tumaanne de7o Xoossaa haggaazanaw hinte simmidaysa enti banta huuphen odoosona. 10 Qassi Xoossaa Na7ay, Yesuusi, Xoossay hayqope denthidaysi, sinthafe yaana Xoossaa hanquwafe nuna ashshanaysi, salope yaanaysa hinte naageysa enti markatoosona.