1 Hessa gisho, nuus gencanaw danda7etonna ixin, Ateena kataman nurka attanaw qofa qachida.Hawa 17:15. 2 Hintena zoranaadanne ammanon hintena minthethanaada nuura issife Xoossas ootheysanne Kiristoosa Wongela odiya nu ishaa Ximotiyoosa hinteko kiitida. 3 Hintena gakida goodan hintefe oonika guye simmofo. He gooday nuus Xoossa shene gideysa hinte, hinte huuphen ereeta. 4 Nu hintera de7iya wode goodi gakanaysa hintew koyrottidi odida. Hinte ereysa mela hessada hanis. 5 Hessa gisho, taw gencanaw danda7etonna ixin, “Ooni eri Xalahey enta paacidi nu daabura mela ashshona aggenna” gada hinte ammanuwaba eranaw Ximotiyoosa hinteko kiittas.

6 Ha77i Ximotiyoosi hinte matape yidi, hinte ammanuwabanne hinte siiquwaba lo77o wore nuus odis. Qassi hinte ubba wode nuus lo77o qopeysanne nuuni hintena be7anaw laamoteysada hinteka nuna be7anaw laamoteysa I nuus odis.Hawa 18:5. 7 Ta ishato, nuna gakiya waayaninne nu meto ubban hinte ammanuwa gisho hintenan minetida. 8 Hinte Godan minnidi de7iko nuka de7on de7oos. 9 Hiza, nuuni hinte gaason demmida ufaysas Xoossaa waati galatino? 10 Nuuni hintena be7anawunne hinte ammanuwan pacidaba kunthanaw qammanne gallas nu kumetha wozanan Xoossaa woossoos.

11 Xoossay nu aaway ba huupheninne nu Goday Yesuus Kiristoosi nu hinteko baana ogiya giigiso. 12 Nu hintena daro doseysada Goday hinte issoy issuwa siiqiya siiqonne ase ubbaa siiqiya siiqo hintew darsonne gujo. 13 Nu Goday Yesuus Kiristoosi ba geeshshatara yaa wode Xoossaa, nu aawa sinthan hinte wozanay geeshshinne borey baynaysa oothidi I hintena minthethana.