1 Cima addeta ne aawada bonchafe attishin, hanqetofa. Yalaga addeta ne ishada oothada xeella. 2 Cima maccasata ne aayida, yalaga maccasata ne michida, polo geeshshatethan oyka.

3 Azini hayqida tuma am7eta boncha. 4 Shin am7ees nayti woyko nayta nayti de7iko, he nayti tuma ayyaana de7on de7eysa bessanaw bantana yelidaysatanne, banta wogga aayiwunne wogga aawa maaddidi kushe zaaro tamaaro. Hessi Xoossaa ufaysiyabaa.

5 Barka de7iya tuma am7iya Xoossafe maade demmanaw ufaysan naagasu. Gallasinne qamma Xoossay bana maaddana mela woossawusunne oychawusu. 6 Shin ha alamiyan lo77o duussaa xalaala koyiya am7iya paxa de7ashe hayqidaaro. 7 Oonika enta boronna mela ha kiitaa entaw imma. 8 Shin ba dabbotas, ubbaafe aathidi ba soo asaas qoponna oonika ba ammanuwa kaddidaysa; ammanonna asapeka aadhida iita.

9 Laythi usupun tammu kumiboona am7e sunthaa mazgaben xaafopa. Qassi hessa bolla iya ba azinaas ammanetidaro gidanaw koshshees. 10 Nayta dishon, imatha mokon, geeshshata tohuwa meechan, metootiya asaa maaden, lo77o ooso ubbaas bana aatha immidaaronne lo77o ooson eretidaaro gidanaw bessees.

11 Shin yalaga am7eta sunthaa mazgaben xaafopa. Entana azina gelo gelo giya asho amoy oykiya wode Kiristoosa aggana. 12 Enti koyro gelida qaala menthida gisho pirdetana. 13 Hessa bolla enti ooso dhayidi keethafe keethe yuuyana. Yuushsha xalaala gidonashin, zigirsaninne bantana gathonnaban gelidi bessonnaba odetoosona. 14 Hessa gisho, nu morketi nu bolla odetiya iitabaa demmonna mela yalaga am7eti azina gelidi, na7a yelidi, banta keethaa aysana mela zorayis. 15 Haysafe kase guutha am7eti Xalahe kaallanaw guye simmidosona.

16 Issi ammaniya maccasees soo asaa giddon am7eti de7iko, iya enta maaddanaw bessees. Hessada oothiko, woosa keethaas toohoy kawuyees. He wode woosa keethay maade bessiya tuma am7eta maaddanaw danda7ees.

17 Woosa keethi loythi heemmiya cimati, ubbaafe aathidi, qaala sabbakoninne tamaarson daabureysati dako boncho ekanaw bessees. 18 Geeshsha Maxaafay, “Wudumman kathaa yedhiya boora doona qachofa” hessadaka, “Oosanchoy ba damooziya ekanaw bessees”Zaare 25:4; Maato 10:10; Luqa 10:7. yaagees.

19 Nam7u woyko heedzu marki bayna, woosa keetha cima mootiyaba si7opa.Zaare 17:6; 19:15. 20 Harati yayyana mela nagara oothiya oonaka asa ubbaa sinthan hanqeta.

21 Neeni asa som7o be7onna, issuwa issuwafe dummayonna ha kiitaa naagana mela Xoossaa, Godaa Yesuus Kiristoosanne dooretida kiitanchota sinthan ta nena zorayis. 22 Oodde bollaka ne kushiya wothada shuumanaw ellesopa. Harata nagaran gelopa; nena geeshshatethan naaga.

23 Neeni ubba wode hargetiya gishonne ne ulo hargiya gisho haatha xalaala uyopa; guutha woyne uya.

24 Issi issi asata nagaray qonce; enta nagaray enta pirdanaw entafe sinthe aadhees, shin harata nagaray guyepe gam7idi qoncees. 25 Hessada, lo77o oosoyka qonce; qonconna ixikoka geemmanaw danda7enna.