1 Kawoy Iyorbaami kawotida tammanne hospuntho laythan Abiyi Yihudan kawotis. 2 Abiyi Yerusalaamen heedzu laythi kawotis. Iya aaye sunthay Mikayo; iya Gib7a addiya Uri7eela na7a.

Abiyinne Iyorbaami oletishe de7idosona. 3 Abiyi dooretida oyddu xeetu mukulu mino olanchota ekidi olas keyis. Iyorbaami dooretida hospun xeetu mukulu mino olanchota ekidi Abiyara oletanaw keyis.

4 Hessafe guye, Abiyi derey dariya Efreema biittan de7iya Xamarayma deriya huuphen eqidi, haysada yaagis; “Neno, Iyorbaama, hinteno, Isra7eele asaw, ubbay ta giyaba si7ite! 5 Goday Isra7eele Xoossay Dawitinne iya kochay Isra7eele bolla merinaw kawotana mela Dawitara Maxinen caaqidaysa ereketiyee? 6 Gidoshin, Dawita na7aa Solomone aylley, Nabaaxa na7ay Iyorbaami dendidi ba godaa bolla makallis. 7 Robi7aami yooga, eri baynaysanne entara eqetanaw danda7onna wode pathonna laafa asati Iyorbaamako shiiqidi Solomone na7aa Orobi7aama bolla dendidosona.

8 “Goday Dawita kochaas immida kawotethaara hinte eqetanaw qopeeta. Hinte hessa qopiday hinte daro gidiya gishonne xoossata gidana mela Iyorbaami worqafe medhida marati hintera de7iya gishosa. 9 Godaas oothiya Aarona koche gidida oothiya kahinetanne Leeweta hinte yedethideta. Hara biitta asay ootheysada hintew hara kahineta shuumideta. Bana dummayanaw issi wofaanonne laapun maraze ekidi yaa oonaka wordo xoossatas kahine oothidi shuumata.

10 “Gidoshin, nuus Goday nu Xoossaa; nuuni iya aggibooko. Kahine gididi oothiya Aarona kochati nuus de7oosona; Leeweti enta maaddoosona. 11 Enti ubba gallas wontanne omarsi Godaas xuussa yarsho yarshoosonanne sawiya ixaane cuyisoosona. Godaa sinthan wothiya uythaa geeshsha xarpheeza bolla wothoosona. Omarsi omarsi xompe wothiya kocaa bolla tama oythoosona. Nuuni Godaa nu Xoossaa kiita naagoos; shin hinte iya aggideta. 12 Xoossay nuura de7ees; I nuna kaalethees. Ola moyze punniya iya kahineti nuura de7oosona; nuuni hintera olaa doomanaw moyze punnana. Isra7eele asaw, Godaara hinte aawata Xoossara oletofite! Hinte iya xoonanaw danda7eketa” yaagis.

13 He wode Iyorbaami ba olanchotape issi cugaa entafe guyera zugidi naagana mela yeddis. Attida Isra7eele olanchoti Yihuda olanchota sinthan de7iya wode zugidi naagiya olanchoti entafe guyera de7oosona. 14 Yihuda olanchoti guye simmidi xeelliya wode enta olanaw yidaysati guyeranne sinthara de7eysa be7ida wode Godaako waassidosona; kahineti moyze punnidosona. 15 Yihuda olanchoti ola waaso waassida wode Goday Iyorbaamanne Isra7eele asaa ubbaa Abiya sinthaninne Yihuda sinthan xoonis. 16 Isra7eele olanchoti Yihuda olanchota sinthafe baqatin Xoossay enta Yihuda olanchota kushen aathidi immis. 17 Abiyinne iya olanchoti enta diifi oothidi wursidosona. He olan 500,000 dooretida Isra7eele olanchoti hayqidosona. 18 Isra7eele asay he wode xoonetidosona; Yihuda asay Godan banta aawata Xoossan ammanetida gisho enta xoonidosona.

19 Abiyi Iyorbaama yedethidi iyape Beetele, Yishananne Efroona enta gutatara oykis. 20 Abiyi de7ida laythan Iyorbaami simmidi minnibeenna. Goday Iyorbaama shocin hayqis.

21 Gidoshin, Abiyi minni minni bis. Abiyi tammanne oyddu macho ekidi laatamanne nam7u adde naytanne tammanne usupun macca nayta yelis. 22 Attida Abiyi taarikey, I oothidabaynne I odidabay nabiya Ido taarike maxaafan xaafetis.