1 Asa na7ay Iyosaafexi ba aawa bessan kawotis; Iyosaafexi Isra7eele olanaw bana giigisis. 2 Miixi oosetida Yihuda katamatan olanchota wothis; Yihuda biittaninne iya aaway Asi olidi oykida Efreema biittan olanchota wothis.

3 Iyosaafexi, iya aaway Dawiti koyro hemetida ogiyan hemetida gishonne Ba7aale eeqa goyinnona ixida gisho Goday iya anjis. 4 Iyosaafexi ba aawa ogen hemetidi Godaa kiita polis. Isra7eele kawoti oothida iita oosota oothibeenna. 5 Goday iya Yihuda kawotethan minthidi essis. Yihuda asa ubbay iyaw imota ehidosona; I daro duretisinne bonchetis. 6 Iyosaafexi Godaas kumetha wozanan oothiya asi. Dhoqa goyinno bessatanne Asheera geetetiya xoosse eeqa misileta Yihuda biittafe dhaysis.

7 Iyosaafexi kawotida heedzantho laythan Yihuda katamatan tamaarsana mela ba moorinnata Benihaala, Abdiyu, Zakariyasa, Natina7eelanne Mikiyaasa yeddis. 8 Entara guutha Leeweta Shamaya, Naatana, Zabada, Asaheela, Samiramoota, Yoonataana, Adoniyaasa, Xoobanne Xobadoona yeddis; qassi entara kahineta Elsamaananne Iyoraama yeddis. 9 Enti Godaa higge maxaafa ekidi Yihuda biittan de7iya katamata ubbaa bidi yan asaa tamaarsidosona.

10 Yihuda yuushon de7iya kawotethata ubbaa Goday yashisin, enti Iyosaafexara oletibookona. 11 Filisxeemepe guutha asati Iyosaafexas imotanne bira giira ehidosona; Arabati iyaw laapun mukulunne laapun xeetu dorsa urgetanne laapun mukulunne laapun xeetu koleta ehidosona. 12 Iyosaafexi minni minni bis. Yihudan miixatanne shalo minjiya katamata keexis. 13 Yihuda katamatan darobaa minjis.

Yerusalaamen iyaw mino olanchoti de7oosona. 14 Enti banta aawata soo asan asan haysafe kaallidi xaafetidosona. Yihuda kochaafe shaalaqay Adina; iyara heedzu xeetu mukulu mino olanchoti de7oosona.

15 Adina kaallidi de7iya halaqay Yohaana; iyara nam7u xeetanne hospun tammu mukulu mino olanchoti de7oosona.

16 Godaas ba shenen bana dummayida Zikira na7ay Amasayi iya kaallidi de7iya heedzantho halaqa; iyara nam7u xeetu mukulu mino olanchoti de7oosona.

17 Biniyaame kochaafe halaqay mino olanchuwa Eliyaada; iyara dongenne gondalle oykiya nam7u xeetu mukulu olanchoti de7oosona.

18 Eliyaada kaallidi de7iya halaqay Yozabaata; iyara ola baanaw dancida issi xeetanne hospun tammu mukulu olanchoti de7oosona.

19 Haysati kawas Yerusalaamen oothidaysata; haysati Yihudan gimbetida katamatan de7iya kawoy wothida olanchotape haraa.