1 Hessafe guye, Moo7abetinne Amooneti Ma7uunati Iyosaafexa bolla dendidosona. 2 Guutha asati Iyosaafexako yidi, “Maxine Abbaafe hefinthan de7iya Edoomepe daro olanchoti nena olanaw yidosona. Enti Hasasoon-Tamaaran de7oosona” yaagidi odidosona. (Hasasoon-Tamaari Engaadas hara sunthu.)

3 Iyosaafexi yayyida gisho Godaa oychanaw qofa qachis; Yihuda biitta ubban xooma awaajis. 4 Yihuda asa ubbay Godaape maado koyanaw shiiqidosona; enti Godaape maado koyanaw Yihuda katama ubbaafe yidosona.

5 Iyosaafexi, Yihudanne Yerusalaame shiiquwa giddon, xoossaa keethan de7iya ooratha dabaaba sinthan eqis. 6 Ba qaala dhoqu oothidi, “Abeeti Godaw, nu aawata Xoossaw, salon de7iya Xoossay nena gidikii? Sa7an de7iya kawotethata ubbaa haarey nena. Gitatethinne wolqi ne kushen de7iya gisho neera eqetanaw danda7ey baawa. 7 Abeeti nu Xoossaw, kase ha biittan de7iya asaa, Isra7eele sinthafe yedethada ne laggiya Abrahaame zerethaas merinaw immiday nena gidikii? 8 Enti ha biittan de7idosona; yan ne sunthaas keethe keexidi, 9 ‘Nu bolla iita metoy woyko oli woyko gadoy woyko koshi gakiko, ne sunthay de7iya ne keethaa sinthaninne ne sinthan eqidi, nu metuwan neeko waassana. Ne nu waasuwa si7ada nuna ashshana’ yaagidosona.

10 “Heko, ha77ika, Isra7eele asay Gibxefe keyida wode, enta biitta olonna mela oothada enta dhaysona mela diggida Amooneti, Moo7abetinne Sayreti ha biittan de7oosona. 11 Nu oothidobas enti nuus zaaridaba be7a. Ne nuus immida laata biittafe enti nuna yedethanaw yidosona. 12 Abeeti nu Xoossaw, ne enta pirdikii? Nuna olanaw yida ha daro olanchotara oletanaw nuus wolqi baawa. Nuuni oothanaba eroko; shin nu ayfeti nena xeelloosona” yaagis.

13 Yihuda asa ubbay banta naytaranne banta machetara shiiqidi Godaa sinthan eqidosona.

14 He wode Zakariyasa na7ay Yahazi7eeli shiiquwa giddon eqidashin Godaa Ayyaanay iya bolla wodhis. Zakariyasi Banaya na7a; Banayi Yi7eela na7a; Yi7eeli Mataana na7a; Mataani Leewe kochenne Asaafa yara. 15 Godaa Ayyaanay Yahazi7eela bolla wodhin, “Kawaw Iyosaafexa, Yihudaninne Yerusalaamen de7iya asaw, ubbay si7ite! Goday hintena yaagees. ‘Ha daro olanchota gaason yayyofitenne dagammopite. Olay hintebaa gidonashin Xoossaba. 16 Wonto enta bolla keyidi Xiixa geetetiya bessaa pude keyishin Yiru7eela mela biittan de7iya zangaara wursethan hinte enta demmana. 17 Ha olaa oletey hintena gideketa. Yihudanne Yerusalaame asaw, hinte bessaa bessaa oykidi minnidi eqite. Goday hintena ashshiya ashuwa be7ite. Yayyofite; dagammofite; wonto enta bolla keyite; Goday hintera gidana’ ” yaagis.

18 Iyosaafexi som7o sa7a gathidi goyinnis; Yihuda asa ubbay Yerusalaamen de7iya asa ubbay Godaa sinthan kundidi goyinnidosona. 19 Qahaatanne Qore kochaafe guutha Leeweti eqidi banta qaala dhoqu oothidi, Godaa Isra7eele Xoossaa galatidosona.

20 Enti wonta guura dendidi Tequhe mela biitta bidosona. Enti keyida wode Iyosaafexi dendi, “Yihudaninne Yerusalaamen de7iya asaw taani geysa si7ite. Godan, hinte Xoossan ammanetite; hinte minnana; nabeta ammanite ubbay hintew injetana” yaagis. 21 Iyosaafexi asaara zoretidaape guye,

22 Enti mazmure yethinne galata doomida wode Yihuda olanaw yida Amooneta bolla, Moo7abeta bollanne Sayreta bolla Goday dagama yeddis. 23 Amoonetinne Moo7abeti Sayreta bolla dendidi, enta kumethi dhaysidosona. Enti Sayreta dhaysidaape guye banta giddon issoy issuwa dhaysidosona. 24 Yihuda asay mela biittan de7iya olanchota be7anaw yida wode banta morketi de7iya bessaa be7idosona. Enta ahay biittan zin7idaysa demmidosona; entafe issi asika kessi ekibeenna.

25 Hessafe guye, Iyosaafexinne iya asay di7o ekanaw bidi shinqe, ola miishe, ma7otanne hara al7o miisheta demmidosona. Shin di7o ubbaa efanaw danda7ibookona; di77idabay daro gidida gisho shiishanaw heedzu gallas ekis. 26 Enti oyddantho gallasan Baraka Zangaaran shiiqidi Godaa galatidosona. Hessa gisho he bessaa “Anjo Zangaara” yaagidi sunthidosona.

27 Hessafe guye, Yihuda asaynne Yerusalaame asa ubbay Iyosaafexi kaalethin, ufaysan Yerusalaame simmidosona. 28 Enti Yerusalaame gakidi diithara, maasinqoranne zayera Xoossa keethi gelidosona.

29 Isra7eele morketa Goday olidaysa biittan de7iya kawotethati ubbay si7ida wode yayyidosona. 30 Yaatidi Xoossay Iyosaafexas ubba baggara shempo immida gisho iya kawotethay sarotethi demmis.

31 Iyosaafexi Yihudan kawotiya wode iya laythi hastamanne ichasha; I Yerusalaamen laatamanne ichashu laythi kawotis. Iya aayiya Shiliha na7iw Azuubo. 32 Iyosaafexi ba aawa Asa ogiyan hemetis; I he ogiyape haddirsi ushachi gibeenna; Godaa sinthan suureba oothis. 33 Gidoshin, dhoqa goyinno bessata dhaysibeenna; asay buroo ba kumetha wozanan banta aawata Xoossaako simmibeenna.

34 Iyosaafexi oothidabay koyrope wursethi gakanaw Isra7eele kawota taarike maxaafan, Hanaana na7aa Iyyu taarike maxaafan xaafetis.

35 Issi wode Yihuda kawoy Iyosaafexi iitabaa oothida Isra7eele kawa Akaziyaasara issifetethi oothis. 36 Nam7ay zal7e markabe medhanaw zoretidosona; Exiyoon-Gabiran markabeta medhidosona. 37 Gidoshin Mareesa addey Dooda na7ay Alaazari, “Neeni Akaziyaasara issifetethi medhida gisho ne oothidaba Goday dhaysana” yaagidi Iyosaafexa bolla tinbite odis. Hessa gisho, markabeti meqidosona; enti zal7e oosuwa oothanaw danda7ibookona.