1 Taani nam7antho hinteko biike gada qofa qachiday hintena azzanthonna agganaasa. 2 Taani hintena azzanthikoka ta azzanthida hintefe hari tana ufaysanaw de7ey oonee? 3 Taani hintew he dabdaabiya xaafiday, ta hintena be7anaw biya wode tana ufaysanaw bessiya asan ta azzananaw koyonna gishosa. Ta ufaytiya wode hinte ubbayka ufaytanaysa ta ammanayis. 4 Taani daro waayeninne un7an qassi daro afuthan xaafiday, hintena azzanthanaasa gidonashin, taani hintena ubbaa ay mela dosiyako hintena erisana melasa.

5 Ase azzanthida oonika de7iko ta iya naaquwa darsanaw koyikefe attishin, tana gidonashin, hintefe darota azzanthis. 6 Hintefe dariya asay he uraa seerida seeray iyaw gidana. 7 Hessa gisho, he uray daro azzanidi, ufaysi qanxonna mela hinte iya maaranawunne minthethanaw bessees. 8 Hinte iya siiqeysa zaari iyaw qoncisana mela ta hintena woossayis. 9 Ta he dabdaabiya hintew xaafiday, hinte paacetidi, ubbaban taw kiiteteysa eranaw koyida gishosa. 10 Hinte maariya uraa taka maarana. Taani maaranabay aybi de7ikoka, Kiristoosa sinthan hinte gisho gada maaras. 11 Taani hessa oothiday Xalahiya cimo oosuwa nu eriya gisho, xalahen cimetonna attana melasa.

12 Taani Kiristoosa Wongela sabbakanaw Xiro7aada bida wode, Goday yan taw ooso oge giigisidi wothis.Hawa 20:1. 13 Shin taani ta ishaa Tito yan demmaboonna gisho ta wozanay shempibeenna. Hessa gisho, yan de7iya asaa sarothada iya koyanaw Maqedoone bas.

14 Shin Kiristoosa baggara ubba wode nuna xoonon kaalethiyanne shitto mela sawiya Kiristoosaba nu eriya timirtiya ubba bessi gathana mela oothiya Xoossaa galati gako. 15 Nuuni attiya asaa giddoninne dhayiya asaa giddon Kiristoosa baggara Xoossas imetida sawiya shitto mela. 16 Dhaya asaas hayqoko efiya hayqo peeno; qassi attiya asaas de7oko efiya de7o sawo; yaatin, hessa mela oosos gidanay oonee? 17 Nuuni Xoossaa qaala wodhe demmanaw koyidi walakidi zal7iya daro asaa mela gidoko. Shin Xoossay kiitida suure asata mela Kiristoosan de7idi Xoossaa sinthan qaala odoos.