2 Kawota Maxaafa
Gaatha Qofa
Nam7antho kawota maxaafay, 1 Kawota maxaafapenne Sameela maxaafape kaallidi xaafetida maxaafa. Ha maxaafan Elsanne Eeliyaasa taarikey daro qoncidi xaafetis. Ha maxaafay, Yihuda taarike darsidi odikoka, Isra7eeley kumethi dhayana gakanaw Yihudanne Isra7eele kawota taarike aathi aathi denthidi odees.
2 Kawota maxaafa nam7u waanna waanna kifiletan shaakidi be7anaw danda7etees.
1. Kiristoosi yeletanaape sinthe 900 laytha baggafe doomidi, Kiristoosi yeletenape sinthe 722 laythan pudeha bagga kawotethay kundana gakanaw de7iya nam7u kawotethata taarike (Shem 1-17).
2. Isra7eele kawotetha kundethape bidi, Kiristoosi yeletanaape sinthe 586 laythan kawoy Nabukadanaxoorey Yerusalaame katama oykidi dhaysida wode gakanaw de7iya Yihuda kawotetha taarike (Shem 18-25).
Ha dhayo ubbay Isra7eele bolla yida gaasoy, Yihudanne Isra7eele asay hesadaka enta kawoti Xoossas ammanetetha aggida gishosa. Yerusalaame katamay laaletidaynne Yihuda asaape daro baggay banta biittafe betiday hessa gaasona.
“Goday hanqetida gisho, Yerusalaame asa bollanne Yihuda asaa bolla haysi hanis; wursethan I, enta ba sinthafe diggis.”
2 Kawota maxaafa daro eretida nabey, Eeliyaasa bessan dendida Elsa.
Maxaafa Ayfe Qofata
Eeliyaasi Isra7eele kawa Akaaza boris (1:1-18)
Nabiya Elsa (2:1—8:15)
Yihudanne Isra7eele Kawota (8:16—16:20)
Isra7eele kawa Hosenne pudeha kawotetha kundethaa (17:1-41)
Yihuda kawa Hizqiyaasanne Asoore oyketetha (18:1—20:21)
Iita gidida Yihuda kawo Minaasenne Amoxe (21:1-26)
Iyosyaasa aysuwanne higge maxaafa (22:1—23:30)
Wursetha Yihuda kawota (23:31—24:20)
Babiloone di7uwanne Yerusalaame kundethaa (25:1-30)
1
Eelyiasanne Kawa Akaziyaasa
1 Akaabi hayqidaape guye, Moo7abe asay Isra7eele bolla dendidosona.
2 He wode kawoy Akaziyaasi Samaare katama bolla de7iya pooqiya barandaafe kundidi deshetis. Hessa gisho, asatako, “Bidi, taani ha hargiyafe paxaneko paxonnaako Eqroona xoossaa Bi7eel-Zebuula ane oychite” yaagidi kiittis.
3 Shin Godaa kiitanchoy Tesiba addiya Eeliyaasa haysada yaagis; “Pude bada, Samaare kawoy kiitida asatara gahetada, ‘Hinte Eqroona xoossaa Bi7eel-Zebuula oychanaw biday, Isra7eelen Xoossi dhayineyee?’ 4 Goday haysada yaagees; ‘Kawaw, neeni hayqanaape attishin, ha zin7ida hiixape dendaka’ yaagees” yaaga. Hessa gisho, Eeliyaasi bidi entaw odis.
5 Kiitetida asati kawako guye simmin, “Ayis simmidetii?” yaagidi enta oychis.
6 Enti, “Issi addey nuura gahetanaw yidi, hintena kiitida kawako simmidi, haysada yaagidi odite. Goday neeko, ‘Eqroona xoossa Bi7eel-Zebuula oychanaw neeni ase kiittey, Isra7eelen xoossi dhayneyee? Hessa gisho, neeni hayqanaape attishin, ha zin7ida hiixape dendaka’ yaagees” yaagidosona.
7 Kawoy, “Hintera gahetanaw yidi, haysa hintew odida addey ay mela asee?” yaagidi oychis.
8 Enti, “Ikisepe oosetida ma7o ma7idi, ba xeessan dafo dancees” yaagidi zaaridosona.
Kawoy, “Hessi Tesiba addiya Eeliyaasa” yaagis.
9 Hessafe guye, kawoy issi toora mocona ishatamu wotaadaretara kiittis. Toora moconay dere huuphen uttida Eeliyaasako keyidi, “Xoossa aso, kawoy nena, duge wodhada haaya” yaagees.
10 Shin Eeliyaasi toora moconaako, “Taani Xoossaa asi gidiko, tami salope wodhidi, nenanne ne wotaadareta mo” yaagidi zaaris. Tami salope wodhidi, iyanne iya wotaadareta mis.
11 Kawoy hara toora mocona ishatamu wotaadaretara Eeliyaasako kiittis. Tora moconay Eeliyaasako, “Xoossa aso, kawoy nena duge wodhada haaya” yaagees.
12 Eeliyaasi, “Taani Xoossaa asi gidiko, tami salope wodhidi, nenanne ne wotaadareta mo” yaagis. Xoossa tami salope wodhidi, iyanne iya wotaadareta mis.
13 Kawoy heedzantho hara tora mocona ishatamu wotaadaretara Eeliyaasako kiittis. tora moconay Eeliyaasako bidi, iya sinthan gulbatidi, “Xoossa aso, hayyana tawunne taara de7iya asaas qadheta; nu shempuwa hayqope ashsha. 14 Heko, tami salope wodhidi, kase nam7u toora moconatanne enta wotaadareta mis. Shin ha77i taw qadheta!” yaagidi woossis.
15 Godaa kiitanchoy Eeliyaasako, “Yayyofa! Iyara duge wodha” yaagis.
Eeliyaasi dendidi, iyara kawako duge bis. 16 “Goday haysada yaagees; ‘Isra7eelen Xoossi dhayine, neeni Eqroona xoossaa Bi7eel-Zebuula oychanaw ase kiittiday? Neeni haysa oothida gisho, hayqana! Ne zin7ida hiixape dendaka’ ” yaagees.
17 Eeliyaasi odida Xoossaa qaalada Akaziyaasi hayqis; Akaziyaasas adde na7i bayna gisho, iya ishay Iyoraami iya bessan kawotis. Hessi haniday Iyosaafexa na7ay Iyoraami Yihudan kawotida nam7antho laythana. 18 Akaziyaasi oothida haraba ubbay Isra7eele Kawota Taarike Maxaafan xaafetidi de7ees.