6
Haathan Wodhida Beexe Ayfe
1 Nabeta cugay, Elsako, “Heko, nuuni de7iya bessay nuus daro xuummis. 2 Nuuni ubbay mithi qanxanaw Yordaanose Shaafa boos. Yan nuus duussa bessi keexoos” yaagidosona. Elsi, “Biite” yaagis.
3 Nabetape issoy, “Hayyana neenika nuura ne aylletara yedharkii?” yaagis. Elsi, “Ero baana” yaagidi zaaris; 4 Entara issife bis. Enti Yordaanose gakida wode mithi qanxo doomidosona. 5 Shin entafe issoy mithi qanxishin, beexiya ayfey kessi ekidi, haathan wodhis. He addey, “Ta godaw, taani garxa ekida beexe; taani hiza waano!” yaagidi waassis.
6 Elsi, “Awun gelidee?” yaagidi oychis; addey gelida bessa bessis. Elsi xam7a qanxidi, haathan holis; beexiya ayfey haatha bolla tooketis. 7 Elsi addiya, “Kessada eka” yaagis. Addey ba kushiya yeddidi ekis.
Araame Olanchota
8 Araame kawoy Isra7eeletara oletishe de7ees. I ba toora moconatara, “Taani dumma dumma bessan miixa medhana” yaagis.
9 Elsi, “Araame asay he bessan qosetida gisho, he bessaara yaa boopa” yaagidi Isra7eele kawas kiitta yeddis. 10 Hessa gisho, Isra7eele kawoy Xoossaa asi mallida bessaa ase kiittidi, yan de7iya asay naagetana mela odis. Kawoy naagetana mela Elsi woden woden odees.
11 Ha hanotay Araame kawa daro hanqethin, ba toora moconata xeegidi, “Nu giddon Isra7eele kawa bagga gididi de7ey ooneko ane taw odite” yaagidi oychis.
12 Iya toora moconatape issoy, “Ta godaw, kawaw, nu giddon hessa oothiya oonika baawa. Shin neeni ne qol7an odetiyaba ubbaa Isra7eelen de7iya nabey Elsi Isra7eele kawas odees” yaagis.
13 Kawoy, “Taani ase kiittada iya di7ana mela bidi awun de7iyako koyite” yaagis. Enti, “Heko, I, Dootanen de7ees” yaagidi odidosona.
14 Kawoy daro olanchota parataranne para gaaretara yaa yeddis. I yeddida asati qamma yidi, katama teqidosona. 15 Elsa aylley wontetha gallas guura dendidi, kare keyiya wode, olanchoti parataranne para gaaretara katamaa teqidosona. He aylley, “Heko, nuuni dhayida! Ta godaw, nu waanino?” yaagidi oychis.
16 Elsi, “Yayyofa! Nuura de7eysati entara de7eysatape aadhosona” yaagidi zaaris.
17 Hessafe guye, Elsi, “Abeeti Godaw, I be7ana mela iya ayfiya dooya” yaagidi woossis. Goday Elsa aylliya ayfiya dooyin, Heko, Elsa yuusho ubban de7iya tama paratinne para gaareti zumaa ma7is.
18 Sooreti iya teqida wode Elsi, “Ha asata ayfiya qooqisarki” yaagidi Godaa woossis. Elsi woossidaysada Goday enta ayfiya qooqisis. 19 Hessafe guye, Elsi, “Ogey haysara deenna; katamay haysa gidenna. Hinte koyiya uraa ta hintena bessaana; tana kaallite” yaagidi, enta kaalethidi, Samaare katamaa efis.
20 Enti Samaare katamaa gelida wode Elsi, “Abeeti Godaw, ha asati xeellana mela enta ayfiya dooya” yaagis. Goday enta ayfiya dooyin, Heko, enti Samaare giddon de7eysa be7idosona. 21 Isra7eele kawoy enta be7ida wode, “Ta aawaw, taani enta wodho? Taani enta wodho?” yaagidi oychis.
22 Elsi, “Akay, wodhopa! Hari attoshin, neeni ne mashshaninne ne dongiyan di77idaysataka wodhanaw bessenna. Enti midi uyidi banta godaako baana mela kathi enta muza” yaagis. 23 Hessa gisho, Isra7eele kawoy entaw gibira giigisin, enti midaapenne uyidaape guye, enta yeddin, banta godaako simmidosona. He wodepe doomin, Araameti Isra7eeleta bolla dendeysa aggaagidosona.
24 Hessafe guye, Araame kawoy Wolde-Adari ba olanchota ubbaa shiishidi, Samaare katama teqis. 25 Hessa gaason Samaare kataman gita koshi gelin, issi hare huuphey hospun tammu bira santimen, nam7u xeetu giraame gidiya holle shi7i ichashu bira santimen bayzetis.
26 Isra7eele kawoy katamaa dirsa gimbiya bollara aadhishin, issi maccasiya, “Ta godaw, kawaw, tana maaddarki” yaagada waassasu.
27 Kawoy, “Nena Goday maaddonna ixiko, taani new maado awupe ehanee? Katha bukiya wudummafeye, woyne ayfiya gum7iya bessaafee?” yaagis. 28 Kawoy, “Ne metoy aybee?” yaagidi oychis.
Maccasiya zaarada, “Ha maccasiya, ‘Hachi maanaw ne na7a ekada ya; qassi wonto ta na7aa maana’ yaagasu. 29 Yaatin, ta na7aa kathidi mida; wontetha gallas taani, ‘Nuuni maanaw ne na7aa ekada ya’ yaagas. Shin iya ba na7aa qosasu” yaagasu.
30 Kawoy maccasiya odidaysa si7idi, ba ma7uwa daakis. I gimbiya bollara aadhishin, asay garsa baggara I ma7ida kayo ma7uwa be7idosona. 31 Kawoy, “Safaaxa na7aa Elsa guuggey iya bolla hachi pee7iko, Xoossi tana pirdo!” yaagis.
32 He wode Elsi ba son uttis; cimatika iyara issife de7oosona. Kawoy baape sinthe ase kiittis; shin he addey gakanaape sinthe, Elsi cimatako, “Ha shempo wodheysi ta qoodhiya muucisanaw ase kiittidaysa hinte be7eetii? He kiitetidaysi yida wode ibithe gordidi gelsofite; iya godayka iya kaallidi yishe de7ees” yaagis. 33 I cimatara odetishin, Heko, kiitetidaysi gaki wodhis; I, “Ha metoy Godaape yis. Yaatin, taani Godaa ayis naagiyana?” yaagis.