1 Iyo7akaaza na7ay, Isra7eele kawoy Yo7aasi kawotida nam7antho laythan, Yihuda kawa Iyo7aasa na7ay Amasiyaasi kawotis. 2 I kawotiya wode laythi iyaw laatamanne ichasha; I Yerusalaamen laatamanne uddufun laythi kawotis. Iya aaye sunthay Yoodanoo; iya Yerusalaame maccas. 3 Amasiyaasi Godaa sinthan suureba oothis; shin iya mayzay Dawiti oothidaysada gidonashin, ba aawa Iyo7aasa ogiya kaallis. 4 Asay dhoqa goyinno bessata dhaysibeenna; asay he bessan yarsho yarsheysanne ixaane cuyiseysa aggibokona.

5 Amasiyaasi kawotethaa minthidi oykidaape guye, kase kawa, ba aawa Iyo7aasa wodhida shuumata wodhis. 6 Muse higge maxaafan xaafetidaysada, Goday, “Nayti oothida nagara gisho, aawata wodhanaw bessenna; qassi aawati oothida nagaraa gisho, nayta wodhanaw bessenna. Asi ubbay ba oothida nagaran nagaran hayqanaw bessees”Zaare 24:16. yaagidi kiittidaysada ba aawa wodhida asaa nayta wodhibeenna. 7 Amasiyaasi Maxine Zangaaran tammu mukulu Edoome asaa wodhidi, Seela katamaa olan oykidi, he bessa Yoqiti7eela gidi sunthis; hachi gakanaw he sunthan xeegetees.

8 Hessafe guye, Amasiyaasi Iyyu na7aa na7aa, Iyo7akaaza na7aa, Yo7aasako, “Haaya; ane nam7ay ola gahetoos” yaagidi ase kiittidi mandis. 9 Shin Isra7eele kawoy Yo7aasi, Yihuda kawa Amasiyaasako, “Libaanosen de7iya kinchotey, Libaanosen de7iya zigaako, ‘Ne na7iw ta na7aas imma’ yaagis. Shin Libaanosen de7iya issi do7ay yaara kanthidi, he kinchotiya yedhis. 10 Ee, neeni tuma Edoome biitta xoonadasa; ha77i otortadasa. Neeni ne xoonuwan ufaytada, ne son wopu gada utta. Ne bollanne ne biitta Yihuda bolla metonne dhayo ehiyaba ayis denthethay?” yaagidi zaaris.

11 Shin Amasiyaasi iya si7ibeenna. Isra7eele kawoy Yo7aasi olas keyin, inne Yihuda kawoy Amasiyaasi Yihudan de7iya Beet-Sameesa kataman ola gahetidosona. 12 Isra7eeley Yihuda xoonin, Yihuda asa ubbay baqatidi, banta soo banta soo bidosona. 13 Isra7eele kawoy Yo7aasi Akaziyaasa na7aa na7aa, Iyo7aasa na7aa, Yihuda kawa Amasiyaasa Beet-Sameesa kataman di77is. Yerusalaame dirsa gimbiya, Efreema Pengiyafe bidi, Maazane Pengiya gakanaw de7iya oyddu xeetu wadha gidiya bessaa laallis. 14 Xoossa keethaninne kawo gadhon shalo minjiya keethan de7iya worqaa, biraanne miishe ubbaa ekis; qassi oythi gididi di7etida asaaka ekidi, Samaare simmis.

15 Yo7aasi hanida harabay, I oothidabay, iya minotethaynne Yihuda kawa Amasiyasara oletidabay Isra7eele kawota Taarike Maxaafan xaafetis. 16 Yo7aasi hayqidi, ba mayzata gakis; Samaaren Isra7eele kawotara moogetis. Iya bessan iya na7ay Iyorbaami kawotis.

17 Iyo7akaaza na7ay, Isra7eele kawoy Yo7aasi hayqidaape guye, Yo7aasa na7ay, Yihuda kawoy Amasiyaasi tammanne ichashu laythi de7is. 18 Amasiyaasi hanida harabay Yihuda kawota Taarike Maxaafan xaafetis.

19 Amasiyaasa wodhanaw asay Yerusalaamen maqetis; yaatin I Laakiso katama baqatis. Shin enti iya geedo Laakiso katama ase kiittin, iya yan wodhidosona. 20 Wodhidi iya aha paran caani ehidi, Dawita kataman Yerusalaamen iya mayzatara moogidosona. 21 Hessafe guye, Yihuda asa ubbay tammanne usupun laytha na7aa Azaariyasa iya aawa Amasiyaasa bessan kawothidosona. 22 Iya aaway Amasiyaasi hayqidaape guye, Azaariyasi Elata katama zaari keexidi, Yihudan gathis.

23 Iyo7aasa na7ay, Yihuda kawoy Amasiyaasi kawotida tammanne ichashantho laythan, Isra7eele kawa Yo7aasa na7ay Iyorbaami Samaaren kawotis; I oytamanne issi laythi kawotis. 24 Nam7antho Iyorbaami Godaa sinthan iitabaa oothis; Isra7eele asaa nagara oosisida Nabaaxa na7aa Iyorbaami ogiyape haakibeenna. 25 Gaat-Hefera addiya Amaate na7aa nabiya, ba aylliya Yoonasa baggara Goday Isra7eele Xoossay ba qaalan odidaysada, Hamaata Pinuwa geetetiya bessaafe doomidi, Maxine Abbaa gakanaw de7iya Isra7eele zawa Yo7aasa na7ay Iyorbaami xoonidi zaaris.Yoona 1:1. 26 Isra7eelen asa ubbay aylle gidin, womaanno gidin, ay mela un7etidaako, Goday be7is; enta maaddiya oonika baawa. 27 Goday Isra7eele asaa sunthaa salope garsan quchana gibeenna. Hessa gisho, Goday enta Yo7aasa na7aa Iyorbaama baggara ashshis.

28 Iyorbaami hanida harabay, I oothidaba ubbay, oletidabaynne Yihuda bagga gidida Damasqonne Hamaata katamata Isra7eeles zaaridabay Isra7eele kawota Taarike Maxaafan xaafetis. 29 Iyorbaami hayqidi, ba mayzata, Isra7eele kawota gakis; iya bessan iya na7ay Zakaryaasi kawotis.