1 He wode kawoy Hizqiyaasi hargidi, hayqanaw matis. Amoxe na7ay nabey Isayaasi iyako bidi, “Goday, ‘Neeni ne hargiyafe paxaka; ne hayqana; hessa gisho, ne keetha giigisa’ ” yaagis.

2 Hizqiyaasi godaako simmidi, Xoossaa woossis. 3 “Abeeti Godaw, taani ne sinthan tumatethan, kumetha wozanan hemetidaysanne nena ufaysiyabaa oothidaysa neeni qopana mela taani ne woossayis” yaagidi, daro cametidi, yeekidi woossis.

4 Isayaasi kawa sinthafe keyidi, kawo gadho dabaaba kanthidi boonna de7ishin, Godaa qaalay haysada yaagishe iyako yis. 5 “Guye simmada bada ta asaa kaalethiya Hizqiyaasas haysada yaagada oda. Goday, ne mayza Dawita Xoossay haysada yaagees; ‘Taani ne woosa si7as; ne afuthaa be7as. Heko, taani nena pathana; heedzu gallasape guye, neeni Xoossa keethi baana. 6 Ne laytha bolla taani new tammanne ichashu laythi gujana. Taani nenanne ha katamaa Asoore kawa kushepe ashshana. Taani ta bonchuwa gishonne ta aylliya Dawita gisho, ha katamaas oletada ashshana’ yaagees” yaagis. 7 Isayaasi, “Balase teera daaxidi, iya kixa bolla wothite; I paxana” yaagis.

8 Hizqiyaasi Isayaasa, “Goday tana pathanaysanne taani heedzantho gallas Xoossa keetha baanaysas malaatay aybee?” yaagidi oychis.

9 Isayaasi, “Goday ba gida qaala polanaw new malaata immana. Hiza neeni haysatape awusa dooray? Kuyay tammu dethaa sintha baana mela koyayee? Tammu dethata guye baana mela koyay?” yaagidi oychis.

10 Hizqiyaasi, “Kuyay sinthe baanaysi metenna; kuyay guye simmanaada ootha” yaagis. 11 Nabey Isayaasi Godaa woossin, Goday Kawoy Akaazi gimbisida dethaa bolla shempida kuyay tammu dethaa guye zaaris.

12 He wode Baldaana na7ay, Babiloone kawoy, Marodaaki Baldaani Hizqiyaasi hargidaysa si7ida gisho, dabdaabenne imota Hizqiyaasas yeddis. 13 Hizqiyaasi kiitetidi yida asata mokis. Ba shalo minjiya keethan de7iya bira, worqaa, sawuwa, al7o zaytiya, ba ola miishiyanne ba shalo minjiya keethan de7iyaba ubbaa enta bessis. Ba son woyko ba gadhon de7iyaba ubbaafe Hizqiyaasi enta bessonna aggidabay aybika baawa.

14 Nabey Isayaasi kawa Hizqiyaasako bidi, “Ha asati woygidona? Enti awupe yidona?” yaagidi oychis.

Hizqiyaasi, “Enti taako haaho biittafe, Babiloonepe yidosona” yaagis.

15 Isayaasi, “Enti ne son ay ay be7idonaa?” yaagis.

Hizqiyaasi, “Enti ta gadhon de7iya ubbaa be7idosona; ta shalo minjiya keethan de7iyabaape taani enta bessaboonabay baawa” yaagis.

16 Isayaasi Hizqiyaasako, “Goday giyaba si7a. 17 ‘Heko, ne gadhon de7iyaba ubbaynne ne mayzati hachi gakanaw shiishidaba ubbay di7etidi, Babiloone biitta baana gallas yaana; iyape aybika attenna. 18 Qassi new yeletana, ne ashonne ne suuthu gidida ne adde nayti di7etidi bidi, Babiloone kawo gadhon shuufa gididi oothana’ ” yaagis.

19 Hizqiyaasi zaaridi, “Neeni odida Godaa qaalay lo77o” yaagis. Hizqiyaasi, “Taani de7ida laythan saroynne wopatethi daana gidenne” yaagidi qopis.

20 Hizqiyaasi hanida harabay, iya minotethaynne haatha zeeridi, biitta giddora haathe katama gelsidabay Yihuda kawota Taarike Maxaafan xaafetis. 21 Hizqiyaasi hayqidi, ba mayzatan gahetis; iya bessan iya na7ay Minaasey kawotis.