3
1 Saa7ola soo asaynne Dawita asay daro wode oletidosona; Dawiti olan minni minni biya wode Saa7ola asay daaburi daaburi bis.
2 Kebroonan Dawitas nayti yeletidosona; Izira7eele Aknahooma yelida bayra na7ay Amnoona; 3 Qarmeloosa Abigiya kase Naabala machiya yelida Kil7aabi nam7antho na7a. Gashura kawa Talmaya na7iya Ma7ika yelida Abeseloomey heedzantho na7a. 4 Oyddanthoy Haagita na7aa Adoona; ichashanthoy Abixaala na7aa Safaaxa. 5 Usupunthoy Dawita mache Egili na7aa Yitra7aama; ha nayti ubbay Kebroonan yeletidosona.
Abeneeri Dawitara Caaqis
6 Saa7ola soo asaaranne Dawita soo asaara oletiya wode Abeneeri Saa7ola asaa bolla minni minni bis. 7 Saa7olas Iyoheela na7a gidida Irxifo geetetiya issi laggethiya de7awusu; Iyabustey Abeneerako, “Ta aawa laggethera ayis aqadii?” yaagidi oychis.
8 Abeneeri iya odan daro yilotidi, “Tana neeni Yihudako simmida gaata kana gadiyee? Taani ne aawa Saa7olas, iya ishatasinne iya dabbotas ammanetada de7as; nenaka Dawitas aathada immabike. Shin ha77i neeni tana ha maccase gisho mootaasa! 9 Xoossay Dawitas oothana gidi caaqida qaala taani polonna ixiko, Xoossi tana pirdo. 10 Saa7ola kochaafe kawotethaa wosisidi, Daanepe Barsaabe gakanaw Isra7eele bollanne Yihuda bolla, Dawita araata minthanaw Goday caaqis” yaagis. 11 Iyabustey Abeneeras yayyida gisho hara qaala pogibeenna.
12 Abeneeri Dawitako, “Biittay oossee? Neeni taara caaqa; Isra7eele asa ubbay neeko simmana mela ta nena maaddana” yaagidi ase kiittis.
13 Dawiti, “Lo77o! Ta neera caaqana. Shin taani nena issiba oychayis; neeni tana be7anaw yaa wode Saa7ola na7iw Melkoolo ekonna yoopa” yaagis. 14 Hessafe guye, Dawiti Saa7ola na7a Iyabusteko, “Xeetu Filisxeemeta qaaratada koyta oothada immida ta machiw Melkoolo taw imma” yaagidi ase kiittis. 15 Iyabustey ase kiittidi I azina Lawusha na7a Palxi7eelape kessi ekis. 16 I azinay Biraqima katama gakanaw yeekishe I geedo kaallis. Abeneeri iyako, “Guye soo ba” yaagin addey guye simmidi bis.
17 Abeneeri Isra7eele cimatako bidi, “Dawiti hinte bolla kawotana mela daro wode amotideta. 18 Ha77i polite! Goday, ‘Ta asaa Isra7eele, Filisxeemeta kushepenne enta morketa ubbaa kushepe ta aylliya Dawita baggara ashshana’ gidaysa hassayite” yaagis. 19 Abeneeri Biniyaame kochatas hessa odis. Isra7eele asaynne Biniyaame asa ubbay oothanaw koyida ubbaa Dawitas odanaw Abeneeri Kebroona bis.
20 Abeneeri baara laatamu asi ekidi, Kebroona bin, Dawiti iyawunne iya asaas gibira giigisis. 21 Abeneeri Dawitako, “Enti neera caaqana melanne ne wozanay amotiya ubbaa ne haarana mela ta bada Isra7eele asaa kawas ta godaas shiishana” yaagis. Yaagin Dawiti Abeneera moyzidi saro yeddis.
Iyo7aabi Abeneera Wodhis
22 He wode Dawita asaynne Iyo7aabi olape darobaa di77idi simmidosona. Shin Dawiti iya saro ba gidi yeddida gisho, Abeneeri Kebroonan Dawitara deenna. 23 Iyo7aabinne iyara de7iya olanchoti gakiya wode asay, “Neera na7aa Abeneeri kawa Dawitako yin, kawoy iya yeddin saro bis” yaagidi odidosona.
24 Hessa gisho, Iyo7aabi kawako bidi, “Hessi waanidi hanidee? Abeneeri neeko yin, ayis yeddadii? Heko I bikichis! 25 Neera na7ay Abeneeri nena cimmanaw, neeni geliyasonne keyaso be7anawunne neeni oothiya ubbaa eranaw yis” yaagis.
26 Iyo7aabi Dawita sinthafe keyidi, Abeneera geedo kiitaa yeddin, enti iya Siira olla haatha matape guye zaaridosona; shin Dawiti hessa erenna. 27 Abeneeri Kebroona simmidi yida wode Iyo7aabi iyara dumma odetanaw koyida daanisidi dirsa pengiyako de7iya kifiliyanne iya efis. Ba ishaa Asaheela suutha zaaranaw Abeneera ulon caddin Abeneeri he bessan hayqis.
28 Dawiti guyepe hessa si7ida wode, “Taaninne ta kawotethay Neera na7aa Abeneera suuthaa gisho Godaa sinthan merinaw oyshetoko. 29 Iya suuthay Iyo7aabanne iya aawa soo asa acho; madunthi de7iya asi woyko goga hargey de7iya asi woyko wobbe asi woyko mashshan hayqiya asi woyko koshatiya asi Iyo7aaba kochan dhayopo” yaagis. 30 Gaba7oonan keyida olan banta ishaa Asaheela Abeneeri wodhida gisho, Iyo7aabinne iya isha Abisi Abeneera wodhidosona.
31 Dawiti Iyo7aabanne iyara de7iya asaa, “Hinte ma7uwa daakite; baana qolite; Abeneera halaa sinthan yeekite” yaagis. Kawo Dawiti hala kaallidi duufo bis. 32 Abeneeri Kebroonan moogetis; kawoy ba qaala dhoqu oothidi duufon yeekis; asa ubbay yeekidosona. 33 Kawoy Abeneeras,
“Abeneeri eeya asada hayqanaw bessii?
34 Ne kushey qashetibeenna;
Ne tohoy santhalaatan oyketibeenna.
Asi iita asa kushen hayqeysada hayqis”
yaagidi zeleelis. Asa ubbay Abeneeras zaaridi yeekidosona.
35 He gallas Dawiti kathi maana mela asay iya shoobbidosona. Shin Dawiti, “Awa ayfey de7ishin, kathi woyko haraba baariko Xoossi tana pirdo” yaagidi caaqis. 36 Kawoy oothidaba asa ubbay be7idi ufaytidosona; tumaka kawoy oothidaba ubbay asaa ufaysis. 37 Hessa gisho, he gallas Dawita asaynne Isra7eele asa ubbay kawoy Neera na7aa Abeneera wodhisiboonaysa eridosona.
38 Kawoy ba aylletako, “Isra7eele biittan gita asinne halaqi hayqidaysa hinte akeekeketii? 39 Taani Xoossay tiyida kawo gidikoka, taani daaburancho; haysati Xaruya nayti ta bolla minnidosona; iita oothidaysatas Goday enta oosuwada zaaro” yaagis.