1 Dawiti, “Yoonatana gisho taani iyaw keehatethi oothanaw Saa7ola keethafe attida asi de7isha?” yaagidi oychis.

2 He wode Siiba geetetiya issi aylley Saa7ola son de7ees. I Dawita sinthe yaana mela xeegin, kawoy, “Neeni Siibee?” yaagidi oychis.

Siibi, “Ee, taani ne aylliya Siiba” yaagis.

3 Kawoy, “Xoossa keehatethi taani bessaana mela Saa7ola keethafe attida asi baawee?” yaagis.

Siibi, “Nam7u tohoy silida Yoonataana naytape issoy hanno gakanaw paxa de7ees” yaagis.

4 Kawoy, “I awun de7ii?” yaagis.

Siibi, “Lodobaara geetetiya bessan Ami7eela na7aa Makira son de7ees” yaagis.

5 Kawoy Dawiti Lodobaarape Ami7eela na7aa Makira soope Mempiboste ehisis.

6 Saa7ola na7aa Yoonataana na7ay Mempibostey Dawitako yidi, Dawita sinthan ziggidi bonchis.

Dawiti, “Mempiboste” yaagidi xeegis.

I, “Abe ta godaw, ta ne aylliya” yaagis.

7 Dawiti, “Yayyofa; ne aawa Yoonataana gisho taani new keehana. Ne aawa aawa Saa7ola gadiya ubbaa taani new zaarana; qassi neeni ubba wode ta gaytape maana” yaagis.

8 Mempibostey ziggidi, “Hayqida kana daaniya tana neeni wudada xeellanaw ne aylley taani oonee?” yaagis.

9 Kawoy Saa7ola aylliya Siiba xeegidi, “Saa7olabaanne iya soo asaaba gididaba ubbaa taani ne godaa na7aa na7aas immas. 10 Ne godaa na7aa na7ay maana mela neeni, ne naytinne ne aylleti iya gadiya goyidi, kaxida kathaa iyaw ehite. Gidoshin, ne godaa na7aa na7ay Mempibostey ubba wode ta gaytape maana” yaagis. Siibas tammanne ichashu adde naytinne laatamu aylleti de7oosona.

11 Siibi, “Neeni ta goday, kawoy ne aylliya kiitida ubbaa taani ne aylley oothana” yaagis. Hessa gisho, Mempibostey kawa naytape issuwa mela kawo gaytape mees.

12 Mempibostes Mika geetetiya guutha na7i de7ees. Siiba son de7iya asa ubbay Mempibostes aylle gididosona. 13 Nam7u tohoti silida Mempibostey ubba wode kawa gaytape mishe Yerusalaamen de7is.